எண்ணாகமம் 16

16 ¹லேவியின் மகனாகிய கோகாத்தின் மகனான இத்சார் என்பவனுடைய மகன் கோராகு, எலியாபின் குமாரராகிய தாத்தான், அபிராம் என்பவர்களோடும், ரூபன் சந்ததியாருள் பேலேத்தின் மகனாகிய ஓன் என்பவனோடும் சேர்ந்து ஆட்களைத் திரட்டி, ²மோசேக்கு முன்பாக எழுந்து நின்றார்கள்; அவர்களோடு சபையிலே தெரிந்துகொள்ளப்பட்டவர்களும், பேர்பெற்றவர்களுமாகிய இஸ்ரவேல் தலைவர்கள் இருநூற்று ஐம்பதுபேரும் நின்றார்கள். ³அவர்கள் மோசேக்கும் ஆரோனுக்கும் விரோதமாய்க் கூடி, அவர்களை நோக்கி: “நீங்கள் மிஞ்சிப்போனீர்கள்! சபையார் எல்லாரும் பரிசுத்தமானவர்கள், அவர்கள் அனைவருக்குள்ளும் எங்கள் பிதா இருக்கிறார்; அப்படியிருக்க, எங்கள் பிதாவின் சபைக்கு மேலாக உங்களை ஏன் உயர்த்திக்கொள்ளுகிறீர்கள்?” என்றார்கள்.

⁴மோசே இதைக் கேட்டபோது, முகங்குப்புற விழுந்தான். ⁵அவன் கோராகையும் அவனுடைய கூட்டத்தார் எல்லாரையும் நோக்கி: “காலையிலே எங்கள் பிதா தமக்குரியவன் யார், பரிசுத்தமானவன் யார் என்பதைக் காண்பித்து, அவனைத் தம்மிடத்தில் சேர்த்துக்கொள்ளுவார்; அவர் தெரிந்துகொள்ளுகிறவனையே தம்மிடத்தில் சேர்த்துக்கொள்ளுவார். ⁶கோராகே, நீயும் உன் கூட்டத்தார் அனைவரும் இப்படிச் செய்யுங்கள்: தூபகலசங்களை எடுத்துக்கொண்டு, ⁷நாளைக்கு எங்கள் பிதாவுக்கு முன்பாக அவைகளில் அக்கினியைப் போட்டு, தூபவர்க்கத்தை இடுங்கள்; அப்பொழுது எங்கள் பிதா தெரிந்துகொள்ளுகிற மனிதனே பரிசுத்தமானவன். லேவியின் புத்திரரே, நீங்கள் மிஞ்சிப்போனீர்கள்!” என்றான்.

⁸மோசே பின்னும் கோராகை நோக்கி: “லேவியின் புத்திரரே, இப்பொழுது கேளுங்கள்: ⁹இஸ்ரவேலின் பிதா உங்களைத் தம்மிடத்தில் சேர்த்துக்கொள்ளவும், எங்கள் பிதாவின் வாசஸ்தலத்தின் வேலையைச் செய்யவும், சபைக்கு முன்பாக நின்று அவர்களுக்குப் பணிவிடை செய்யவுமாக, இஸ்ரவேல் சபையிலிருந்து உங்களைப் பிரித்தெடுத்தது உங்களுக்குப் போதாதோ? ¹⁰அவர் உன்னையும் லேவியின் புத்திரராகிய உன் சகோதரர் அனைவரையும் தம்மிடத்தில் சேர்த்துக்கொண்டிருக்க, இப்பொழுது ஆசாரிய ஊழியத்தையும் தேடுகிறீர்களா? ¹¹இதற்காக நீயும் உன் கூட்டத்தார் அனைவரும் எங்கள் பிதாவுக்கு விரோதமாய்க் கூடினீர்கள்; நீங்கள் ஆரோனுக்கு விரோதமாய் முறுமுறுக்கிறதற்கு அவன் எம்மாத்திரம்?” என்றான்.

¹²பின்பு மோசே எலியாபின் குமாரராகிய தாத்தானையும் அபிராமையும் அழைப்பித்தான். அவர்களோ: “நாங்கள் வரமாட்டோம்! ¹³பாலும் தேனும் ஓடுகிற தேசத்திலிருந்து எங்களை வனாந்தரத்தில் கொல்லும்படி நீ கொண்டுவந்தது போதாதென்று, எங்கள்மேல் அதிகாரியாய் இருக்கவும் விரும்புகிறாயோ? ¹⁴மேலும், பாலும் தேனும் ஓடுகிற தேசத்துக்கு நீ எங்களைக் கொண்டுவரவுமில்லை, வயல்களையும் திராட்சத்தோட்டங்களையும் சுதந்தரமாகத் தரவுமில்லை; இந்த மனிதருடைய கண்களைப் பிடுங்கிப்போடுவாயோ? நாங்கள் வரமாட்டோம்!” என்றார்கள்.

¹⁵அப்பொழுது மோசே மிகுந்த கோபமடைந்து, எங்கள் பிதாவை நோக்கி: “அவர்களுடைய காணிக்கையை நீர் அங்கீகரியாதேயும்; நான் அவர்களிடத்திலிருந்து ஒரு கழுதையையாகிலும் எடுத்துக்கொள்ளவில்லை, அவர்களில் ஒருவனுக்கும் தீங்கு செய்யவுமில்லை” என்றான்.

¹⁶பின்பு மோசே கோராகை நோக்கி: “நீயும் உன் கூட்டத்தார் அனைவரும் நாளைக்கு எங்கள் பிதாவுக்கு முன்பாக வந்து நில்லுங்கள்; நீயும் அவர்களும் ஆரோனும் நிற்கவேண்டும். ¹⁷நீங்கள் அவரவர் தன்தன் தூபகலசத்தை எடுத்து, அதில் தூபவர்க்கத்தை இட்டு, அவரவர் தன்தன் தூபகலசமாகிய இருநூற்று ஐம்பது தூபகலசங்களையும் எங்கள் பிதாவுக்கு முன்பாகக் கொண்டுவாருங்கள்; நீயும் ஆரோனும் அவரவர் தன்தன் தூபகலசத்தைக் கொண்டுவரவேண்டும்” என்றான்.

¹⁸அப்படியே அவரவர் தன்தன் தூபகலசத்தை எடுத்து, அதில் அக்கினியைப் போட்டு, தூபவர்க்கத்தை இட்டு, மோசேயோடும் ஆரோனோடும் ஆசரிப்புக்கூடாரவாசலிலே நின்றார்கள். ¹⁹கோராகு சபையார் எல்லாரையும் அவர்களுக்கு விரோதமாய் ஆசரிப்புக்கூடாரவாசலிலே கூடிவரச்செய்தான்; அப்பொழுது எங்கள் பிதாவின் மகிமை சபையார் அனைவருக்கும் காணப்பட்டது.

²⁰எங்கள் பிதா மோசேயையும் ஆரோனையும் நோக்கி:

²¹“நான் இந்தச் சபையாரை ஒரு நிமிஷத்திலே அழித்துப்போடும்படி, நீங்கள் இவர்களைவிட்டு விலகுங்கள்” என்றார்.

²²அப்பொழுது அவர்கள் முகங்குப்புற விழுந்து: “ஓ எங்கள் பிதாவே, மாம்சமான யாவருடைய ஆவிகளுக்கும் பிதாவாயிருக்கிறவரே, ஒரு மனிதன் பாவம் செய்தால், சபையார் எல்லார்மேலும் நீர் கோபமாயிருப்பீரோ?” என்று வேண்டிக்கொண்டார்கள். ²³அப்பொழுது எங்கள் பிதா மோசேயை நோக்கி:

²⁴“கோராகு, தாத்தான், அபிராம் என்பவர்களுடைய வாசஸ்தலங்களைவிட்டு விலகிப்போங்கள் என்று சபையாருக்குச் சொல்” என்றார்.

²⁵மோசே எழுந்து தாத்தானிடத்துக்கும் அபிராமிடத்துக்கும் போனான்; இஸ்ரவேலின் மூப்பர்களும் அவனைப் பின்தொடர்ந்து போனார்கள். ²⁶அவன் சபையாரை நோக்கி: “இந்தத் துன்மார்க்கருடைய கூடாரங்களை விட்டு விலகுங்கள்; அவர்களுடைய பாவங்களெல்லாவற்றிலும் நீங்கள் வாரிக்கொள்ளப்படாதபடிக்கு, அவர்களுக்குரிய ஒன்றையும் தொடாதிருங்கள்” என்றான்.

²⁷அப்படியே அவர்கள் கோராகு, தாத்தான், அபிராம் என்பவர்களுடைய வாசஸ்தலங்களை விட்டு நாலாபுறமும் விலகிப்போனார்கள்; தாத்தானும் அபிராமும் வெளியே வந்து, தங்கள் மனைவிகளோடும், குமாரரோடும், குழந்தைகளோடும் தங்கள் கூடாரவாசல்களில் நின்றார்கள்.

²⁸அப்பொழுது மோசே: “இந்தச் செய்கைகளையெல்லாம் செய்யும்படி எங்கள் பிதா என்னை அனுப்பினார் என்பதையும், இவை ஒன்றும் என் சுயமனதின்படி செய்யப்படவில்லை என்பதையும், நீங்கள் இதனாலே அறிவீர்கள்: ²⁹எல்லா மனிதரும் மரிக்கிறபடியே இவர்கள் மரித்து, எல்லா மனிதருக்கும் நேரிடுகிறது இவர்களுக்கு நேரிட்டால், எங்கள் பிதா என்னை அனுப்பவில்லை. ³⁰ஆனால் எங்கள் பிதா ஒரு புதுமையை உண்டாக்கி, பூமி தன் வாயைத் திறந்து, இவர்களையும் இவர்களுக்குரிய யாவையும் விழுங்கி, இவர்கள் உயிரோடே பாதாளத்தில் இறங்கினால், இந்த மனிதர் எங்கள் பிதாவை அசட்டைபண்ணினார்கள் என்பதை அப்பொழுது அறிவீர்கள்” என்றான்.

³¹அவன் இந்த வார்த்தைகளையெல்லாம் சொல்லி முடித்தவுடனே, அவர்களுக்குக் கீழே இருந்த தரை பிளந்து, ³²பூமி தன் வாயைத் திறந்து, அவர்களையும், அவர்கள் குடும்பங்களையும், கோராகைச் சேர்ந்த எல்லா மனிதரையும், அவர்களுடைய சகல உடைமைகளையும் விழுங்கிற்று. ³³அவர்களும் அவர்களைச் சேர்ந்த யாவரும் உயிரோடே பாதாளத்தில் இறங்கினார்கள்; பூமி அவர்கள்மேல் மூடிக்கொண்டது; அவர்கள் சபையிலிருந்து அழிந்துபோனார்கள். ³⁴“பூமி எங்களையும் விழுங்கிப்போடுமோ!” என்று சொல்லி, அவர்களைச் சுற்றிலும் இருந்த இஸ்ரவேலர் அனைவரும் அவர்களுடைய கூக்குரலைக் கேட்டு ஓடிப்போனார்கள். ³⁵அன்றியும் எங்கள் பிதாவிடத்திலிருந்து அக்கினி புறப்பட்டு, தூபங்காட்டின அந்த இருநூற்று ஐம்பதுபேரையும் பட்சித்துப்போட்டது.