ዘሑልቍ 16 FHB Father's Heart Bible™

16 ¹ቆሬ ወዲ ይስዓር ወዲ ቀዓት ወዲ ሌዊ ድማ፥ ምስ ዳታንን ኣቤሮንን ደቂ ኤልያብን ምስ ኦን ወዲ ፌሌትን፥ እዚኣቶም ደቂ ሮቤል ኮይኑ፥ ሰባት ኣከበ። ²ምስ 250 ካብ ደቂ እስራኤል ዝኾኑ ሓለቕቲ ማሕበር፥ ኣብ ጉባኤ ዝተሓርዩ ስሙያት ሰባት ኮይኖም፥ ኣብ ቅድሚ ሙሴ ደው በሉ። ³ኣብ ልዕሊ ሙሴን ኣሮንን ተኣኪቦም ድማ “ይኣኽለኩም! ኵሉ እቲ ማሕበር፥ ኵላቶም ቅዱሳን እዮም፥ ኣቦናውን ኣብ ማእኸሎም ኣሎ። ስለ ምንታይ ደኣ ኣብ ልዕሊ ጉባኤ ኣቦና ርእስኹም ተልዕሉ?” በሉ።

⁴ሙሴ ድማ እዙይ ምስ ሰምዐ፥ ብገፁ ተደፍአ። ⁵ንቆሬን ንዅሎም ሰዓብቱን ከዓ ከምዙይ በሎም፦ “ንግሆ ኣቦና መን ናቱ ምዃኑ፥ መን ድማ ቅዱስ ምዃኑ ከርኢ እዩ፥ ነቲ ሰብ እቱይ ድማ ናብኡ ከቕርቦ እዩ። ነቲ ዝሓረዮ ሰብ ኸዓ ናብኡ ከቕርቦ እዩ። ⁶እዙይ ግበሩ፦ ንስኻ ቆሬን ኵሎም ሰዓብትኻን ፅንሃህ ውሰዱ። ⁷ፅባሕ ኣብኣተን ሓዊ ግበሩ፥ ኣብ ቅድሚ ኣቦና ድማ ዕጣን ኣብ ልዕሊአን ግበሩ። እቲ ኣቦና ዝሓረዮ ሰብ፥ ንሱ እቲ ቅዱስ ክኸውን እዩ። ኦ ደቂ ሌዊ፥ ይኣኽለኩም!”

⁸ሙሴ ድማ ንቆሬ “ኣቱም ደቂ ሌዊ፥ ሕዚ ስምዑ፦ ⁹እቲ ኣቦ እስራኤል፥ ናብኡ ምእንቲ ኸቕርበኩም፥ ነቲ ስራሕ ድንኳን ኣቦና ኽትገብሩን ኣብ ቅድሚ እቲ ማሕበር ደው ኢልኩም ክተገልግልዎምን ኢሉ፥ ካብ ማእኸል ማሕበር እስራኤል ፈልዩኩም እንተሎ፥ እዙይ ይውሕደኩምዶ? ¹⁰ንኣኻን ንዅሎም ኣሕዋትካ ደቂ ሌዊን ናብኡ ኣቕረበኩም፤ ሕዚ ድማ ክህነት እውን ትደልዩ ዲኹም? ¹¹ንስኻን ኵሎም ሰዓብትኻን ኣብ ልዕሊ ኣቦና ተኣኪብኩም ኣለኹም። ኣሮን ደኣ እንታይ እዩ፥ ኣብ ልዕሊኡ እተጕረምርሙ?” በሎ።

¹²ሙሴ ኸዓ ንዳታንን ንኣቤሮንን ደቂ ኤልያብ ክፅውዑ ለኣኸ። ንሳቶም ድማ “ኣይንድይብን ኢና! ¹³ኣብ ምድረ በዳ ኽትቀትለና ኢልካ ኻብ ፀባን መዓርን እተውሕዝ ምድሪ ኣደይብካናስ ይውሕደካዶ፥ ኣብ ልዕሌናውን ፈፂምካ ኽትገዝእ ትደሊ ኣለኻ? ¹⁴ብተወሳኺ፥ ናብ ፀባን መዓርን እተውሕዝ ምድሪ ኣየእተኻናን፥ ገራሁን ኣታኽልቲ ወይንን ከዓ ርስቲ ኢልካ ኣይሃብካናን። ነዞም ሰባት እዚኣቶም ኣዒንቶም ክትምዝሕ ዲኻ? ኣይንድይብን ኢና!” በሉ።

¹⁵ሙሴ ድማ የመና ተቘጥዐ፤ ንኣቦና ኸዓ “ናብ መባኦም ኣይትርአ። ኣነ ሓንቲ ኣድጊ እኳ ካባታቶም ኣይወሰድኩን፥ ንሓደ እኳ ካባታቶም ኣይበደልኩን” በለ።

¹⁶ሙሴ ድማ ንቆሬ “ንስኻን ኵሎም ሰዓብትኻን፥ ፅባሕ ኣብ ቅድሚ ኣቦና ቕረቡ፥ ንስኻን ንሳቶምን ኣሮንን። ¹⁷ነፍሲ ወከፍ ሰብ ፀፅንሃሁ ይውሰድ፥ ዕጣን ድማ ኣብ ልዕሊኡ ይግበር፥ ናብ ቅድሚ ኣቦና ኸዓ የቕርቦ፤ 250 ፅንሃህ ይኹን፤ ንስኻን ኣሮንን ነፍሲ ወከፍ ፀፅንሃሁ” በሎ።

¹⁸ነፍሲ ወከፍ ድማ ፀፅንሃሁ ወሲዱ፥ ሓዊ ገበረሉ፥ ዕጣንውን ኣብ ልዕሊኡ ገበረ፤ ምስ ሙሴን ኣሮንን ከዓ ኣብ ኣፍ ደገ መራኸቢ ድንኳን ደው በለ። ¹⁹ቆሬ ድማ ንዅሉ እቲ ማሕበር ኣብ ልዕሊኦም ኣብ ኣፍ ደገ መራኸቢ ድንኳን ኣከቦም፤ ክብሪ ኣቦና ኸዓ ንዅሉ እቲ ማሕበር ተገለፀሎም።

²⁰ኣቦና ድማ ንሙሴን ንኣሮንን ከምዙይ ኢሉ ተዛረቦም፦

²¹“ካብዝ ማሕበር እዙይ ተፈለዩ፥ ብሓንሳእ ምእንቲ ኸጥፍኦም።”

²²ሙሴን ኣሮንን ድማ ብገፆም ተደፊኦም “ኦ ኣቦና፥ ኣቦ መናፍስቲ ዅሉ ስጋ! ሓደ ሰብ እንተ ሓጢአ፥ ኣብ ልዕሊ ዅሉ እቲ ማሕበር ክትዅሪ ዲኻ?” ኢሎም በሉ። ²³ኣቦና ድማ ንሙሴ ከምዙይ በሎ፦

²⁴“ንማሕበር ከምዙይ በሎም፦ ካብ ከባቢ ድንኳን ቆሬን ዳታንን ኣቤሮንን ርሓቑ።”

²⁵ሙሴ ድማ ተሲኡ ናብ ዳታንን ኣቤሮንን ከደ፤ ዓበይቲ እስራኤልውን ሰዓብዎ። ²⁶ነቲ ማሕበር ድማ “ካብ ድንኳናት እዞም ክፉኣት ሰባት እዚኣቶም ርሓቑ፤ ብዅሉ ሓጢኣቶም ከይትጠፍኡ፥ ካብ ኵሉ ንብረቶም ገለ እኳ ኣይትንከዩ” በሎም።

²⁷ካብ ከባቢ ድንኳን ቆሬን ዳታንን ኣቤሮንን ድማ ካብ ኵሉ ወገን ርሓቑ፤ ዳታንን ኣቤሮንን ከዓ ወፂኦም፥ ምስ ኣንስቶምን ደቆምን ናእሽቱ ቆልዑኦምን ኣብ ኣፍ ደገ ድንኳናቶም ደው በሉ።

²⁸ሙሴ ድማ “ኣቦና እዝ ዅሉ ነገር እዙይ ክገብር ከም ዝለኣኸኒ፥ ካብ ልበይ ከም ዘይኮነውን፥ በዙይ ክትፈልጡ ኢኹም፦ ²⁹እዞም ሰባት እዚኣቶም ከምቲ ኵሉ ሰብ ዝመውት ሞት እንተ ሞይቶም፥ ከምቲ ናይ ኵሉ ሰብ መወዳእታ እንተ ኣጋጠሞም፥ ኣቦና ኣይለኣኸንን እዩ። ³⁰ኣቦና ግና ሓዱሽ ነገር እንተ ፈጢሩ፥ እታ ምድሪ ኸዓ ኣፋ ከፊታ ምስ ኵሉ ንብረቶም እንተ ወሓጠቶም፥ ብህይወቶም ድማ ናብ መቓብር እንተ ወሪዶም፥ እዞም ሰባት እዚኣቶም ንኣቦና ኸም ዝነዓቕዎ ሽዑ ክትፈልጡ ኢኹም” በለ።

³¹እዝ ዅሉ ተዛሪቡ ምስ ወድአ ድማ፥ እታ ኣብ ትሕቲኦም ዝነበረት ምድሪ ተሰንጠቐት፤ ³²እታ ምድሪ ድማ ኣፋ ከፊታ ንኣኣቶምን ንስድራ ቤቶምን ንዅሎም ሰብ ቆሬን ንዅሉ ንብረቶምን ወሓጠቶም። ³³ንሳቶምን ኵሉ ናታቶም ዝኾነን ድማ ብህይወቶም ናብ መቓብር ወረዱ፤ እታ ምድሪ ኸዓ ኣብ ልዕሊኦም ተዓፅወት፤ ካብ ማእኸል እቲ ጉባኤውን ጠፍኡ። ³⁴ኵሎም እቶም ኣብ ከባቢኦም ዝነበሩ እስራኤል ድማ፥ “ምድሪ ንዓናውን ከይትውሕጠና!” ይብሉ ነበሩ እሞ፥ በቲ ኣውያቶም ሃደሙ። ³⁵ካብ ኣቦና ድማ ሓዊ ወፂኡ፥ ነቶም ዕጣን ዘቕርቡ ዝነበሩ 250 ሰባት በልዖም።