ዘኍልቍ 16

16 ¹የሌዊ ልጅ የቀዓት ልጅ የይስዓር ልጅ ቆሬ፣ ከኤልያብ ልጆች ከዳታንና ከአቤሮን፣ እንዲሁም ከሮቤል ልጆች ከፌሌት ልጅ ከዖን ጋር ሆኖ ሰዎችን ሰበሰበ። ²ከእስራኤላውያንም መካከል ሁለት መቶ አምሳ የማኅበሩ መሪዎች ከሆኑ፣ የተመረጡ የጉባኤ አባላትና ስመ ጥር ሰዎች ጋር በሙሴ ፊት ቆሙ። ³በሙሴና በአሮን ላይ ተሰብስበው፣ “ከልክ አለፋችሁ! ማኅበሩ በሞላ፣ ሁሉም ቅዱሳን ናቸው፤ አባታችንም በመካከላቸው ነው። ታዲያ ራሳችሁን ከአባታችን ጉባኤ በላይ ለምን ከፍ ታደርጋላችሁ?” አሉ።

⁴ሙሴም ይህን በሰማ ጊዜ በግንባሩ ተደፋ። ⁵ቆሬንና ጓደኞቹን ሁሉ እንዲህ አላቸው፤ “በማለዳ አባታችን የእርሱ የሆነውንና ቅዱስ የሆነውን ያሳያል፤ ያንንም ወደ ራሱ ያቀርበዋል፤ የመረጠውንም ወደ ራሱ ያቀርበዋል። ⁶ቆሬ ሆይ፣ አንተና ጓደኞችህ ሁሉ ይህን አድርጉ፤ ጥናዎችን ውሰዱ፤ ⁷ነገ በውስጣቸው እሳት ጨምሩ፤ በአባታችንም ፊት ዕጣን በእነርሱ ላይ አኑሩ። አባታችን የሚመርጠው ሰው እርሱ ቅዱሱ ይሆናል። እናንተ የሌዊ ልጆች፣ ከልክ አለፋችሁ!”

⁸ሙሴም ቆሬን እንዲህ አለው፤ “እናንተ የሌዊ ልጆች፣ አሁን ስሙ፤ ⁹የእስራኤል አባት ወደ ራሱ ያቀርባችሁ ዘንድ፣ የአባታችንን ማደሪያ ሥራ ትሠሩ ዘንድ፣ ማኅበሩንም ለማገልገል በፊቱ ትቆሙ ዘንድ ከቀረው የእስራኤል ማኅበር ለይቶ መለየቱ አይበቃችሁምን? ¹⁰አንተንና ወንድሞችህን የሌዊን ልጆች ሁሉ ወደ ራሱ አቀረበ፤ አሁንም ክህነትን ደግሞ ትፈልጋላችሁን? ¹¹አንተና ቡድንህ ሁሉ በአባታችን ላይ ተሰብስባችኋል። አሮንስ፣ በእርሱ ላይ ታጕረመርሙ ዘንድ ምንድን ነው?”

¹²ሙሴም የኤልያብን ልጆች ዳታንንና አቤሮንን አስጠራ። እነርሱም እንዲህ አሉ፤ “አንወጣም! ¹³በምድረ በዳ ልትገድለን ወተትና ማር ከምታፈስ ምድር አውጥተህ ማምጣትህ አይበቃህምን? በእኛ ላይ ደግሞ ልትሠለጥን ትፈልጋለህን? ¹⁴ከዚህም በላይ ወተትና ማር ወደ ምታፈስ ምድር አላስገባኸንም፤ ዕርሻና የወይን አትክልትም ርስት አድርገህ አልሰጠኸንም። የእነዚህን ሰዎች ዐይን ልታወጣ ነውን? አንወጣም!”

¹⁵ሙሴም እጅግ ተቈጥቶ አባታችንን እንዲህ አለው፤ “ቍርባናቸውን ዐይተህ አትቀበል። ከእነርሱ አንዲት አህያ እንኳ አልወሰድሁም፤ ከእነርሱም አንዱን እንኳ አልበደልሁም።”

¹⁶ሙሴም ቆሬን እንዲህ አለው፤ “አንተና ጓደኞችህ ሁሉ ነገ በአባታችን ፊት ቅረቡ፤ አንተ፣ እነርሱና አሮን። ¹⁷እያንዳንዱ ሰው ጥናውን ይውሰድ፤ በእርሱ ላይ ዕጣን ጨምሮ በአባታችን ፊት ያቅርብ፤ ሁለት መቶ አምሳ ጥናዎች፤ አንተና አሮን እያንዳንዳችሁ የየራሳችሁን ጥና።”

¹⁸እያንዳንዱም ጥናውን ወስዶ በውስጡ እሳት ጨመረ፤ በእርሱም ላይ ዕጣን አኖረ፤ ከሙሴና ከአሮንም ጋር በመገናኛው ድንኳን ደጃፍ ቆመ። ¹⁹ቆሬም ማኅበሩን ሁሉ በመገናኛው ድንኳን ደጃፍ በእነርሱ ላይ ሰበሰበ፤ የአባታችንም ክብር ለማኅበሩ ሁሉ ተገለጠ።

²⁰አባታችንም ሙሴንና አሮንን እንዲህ አላቸው፤

²¹“በቅጽበት አጠፋቸው ዘንድ ከዚህ ማኅበር ተለዩ።”

²²ሙሴና አሮንም በግንባራቸው ተደፍተው፣ “አባታችን ሆይ፤ የሥጋ ሁሉ መናፍስት አባት፤ አንድ ሰው ኀጢአት ቢሠራ፣ በማኅበሩ ሁሉ ላይ ትቈጣለህን?” ብለው ጮኹ። ²³አባታችንም ሙሴን እንዲህ አለው፤

²⁴“ለማኅበሩ፣ ‘ከቆሬ፣ ከዳታንና ከአቤሮን ማደሪያዎች ራቁ’ ብለህ ንገራቸው።”

²⁵ሙሴም ተነሥቶ ወደ ዳታንና ወደ አቤሮን ሄደ፤ የእስራኤልም ሽማግሌዎች ተከተሉት። ²⁶ማኅበሩንም እንዲህ አለው፤ “ከእነዚህ ክፉ ሰዎች ድንኳኖች ራቁ፤ ከንብረታቸውም ምንም አትንኩ፤ አለዚያ በኀጢአታቸው ሁሉ ትጠፋላችሁ።”

²⁷ስለዚህ ከቆሬ፣ ከዳታንና ከአቤሮን ድንኳኖች ዙሪያ ሁሉ ራቁ፤ ዳታንና አቤሮንም ከሚስቶቻቸው፣ ከወንዶች ልጆቻቸውና ከታናናሽ ልጆቻቸው ጋር ወጥተው በድንኳኖቻቸው ደጃፍ ቆሙ።

²⁸ሙሴም እንዲህ አለ፤ “እነዚህን ሁሉ ላደርግ አባታችን እንደ ላከኝ፣ ከራሴም ሐሳብ አንዳች እንዳልሆነ በዚህ ታውቃላችሁ፤ ²⁹እነዚህ ሰዎች እንደ ሰው ሁሉ ዕጣ ፈንታ ተካፍለው በተለመደ ሞት ቢሞቱ፣ አባታችን አልላከኝም። ³⁰ነገር ግን አባታችን አዲስ ነገር ቢፈጥር፣ ምድርም አፍዋን ከፍታ ከንብረታቸው ሁሉ ጋር ብትውጣቸው፣ በሕይወታቸውም ሳሉ ወደ ሲኦል ቢወርዱ፣ እነዚህ ሰዎች አባታችንን እንደ ናቁ ታውቃላችሁ።”

³¹ይህንም ሁሉ ተናግሮ እንደ ጨረሰ፣ ከሥራቸው ያለው ምድር ተሰነጠቀ፤ ³²ምድርም አፍዋን ከፍታ እነርሱን፣ ቤተ ሰቦቻቸውን፣ የቆሬን ሰዎች ሁሉና ንብረታቸውን ሁሉ ዋጠች። ³³እነርሱና የእነርሱ የሆኑ ሁሉ በሕይወታቸው ሳሉ ወደ ሲኦል ወረዱ፤ ምድርም በላያቸው ተዘጋች፤ ከጉባኤውም መካከል ጠፉ። ³⁴በዙሪያቸው የነበሩ እስራኤላውያን ሁሉ በጩኸታቸው ሸሹ፤ “ምድር እኛንም ደግሞ ትውጠን ይሆናል!” ብለው ነበርና። ³⁵ከአባታችንም ዘንድ እሳት ወጥቶ ዕጣኑን ያቀርቡ የነበሩትን ሁለት መቶ አምሳ ሰዎች በላ።