Mi eng' bukuit

Jeremiah 18 FHB Father's Heart Bible™

Kiistoi 15% eng' kiy ne iale korook →
Bukuit

Chobei Kwandanyo Piikyik

Eng' kurereetap chepyaindet, chobchini kogeny tereet ne kagong'emak; ak mwaei Kwandanyo kole kiyaei pororyosyek ko uu nooto—ng'emisyet ne kagimwa ko muuchi koweeksei ngot koleen pororyet kong'eetee yaityennyi. Kowol Judah kole mami kiy ne muuchi keyai, ak kole kisubei kabwaatutikwak icheegei. Yeityo koyan piik ng'aalseet agobo Jeremiah.

Ng'alaali Kwandanyo eng' mustarisyek 2, 6–11, 13–17

Sura 18.

Ng'olyoot ne ki nyoonji Jeremiah kobun Kwandanyo:

“Ng'eet, ui ng'wony koitap chiito ne chobei tereet, ak yooto agoochini igas ng'aleekyuk.”

Ka awe anyun ng'wony koitap chiito ne chobei tereet, ak ogeero, ki poisyei eng' kurereet. Tereet ne po ng'ung'unyek ne ki chobei ko ng'emak eng' eunnyi, ak kochobei kogeny koek tereet age, ko uu ye keere kole myee.

Yeityo konyoonjo ng'olyootap Kwandanyo anee, koleenji:

“Tos ma amuuch ayaiywok ko uu chiito ne chobei tereet ni, ee kootap Israel? mwaei Kwandang'wong'. Ko uu ng'ung'unyek eng' eutap chiito ne chobei tereet, ko uu nooto omi okweek eng' eunnyu, ee kootap Israel. ‘Eng' sait age tugul amuuch amwa agobo pororyet anan laitornatet, si atut ak agabui ak ang'em; ago ngot koweektagei pororyonooto ne ki amwa agobo ineendet kong'eetee yaityennyi, awal mindilileennyu agobo yaityet ne ki abwaati ale ayachini. Ak eng' sait age tugul amuuch amwa agobo pororyet anan laitornatet, si ateech ak amin; ago ngot koyai yaityet eng' koonyek, ma koepchi iit kutinnyu, awal anyun mindilileennyu agobo myee ne ki abwaati ale ayachini.

“Ara anyun, mwachi murenigap Judah ak piigap Jerusalem, ile: Mwaei Kwandang'wong' kole: Achobei yaityet agobo okweek, ak achopchini okweek pwaatutik. Oweegitu, chii age tugul eng' okweek, kong'eetee oreng'ung' ne ya; oyai ortinwekwok ak yaitwogikwok koek che myee.’” a a v11 Ng'olyoondet ne po “chobei” ole ki mitei yu ko ineendet kityo ne kiboisyeenji chiito ne chobei tereek eng' kurereennyi — koarorji Kwandanyo, chiito ne chobei tereek, kole achobei nguno tuguuk che ibunu lewenisyegap piikyik icheegei.

Ago mwaei icheek kole, “Mami katyaget! Kesubi pwaatutikyok echeek, ak koyai chii age tugul ko uu muguleldanyi ne uueen ak ne ya.”

Mwaei anyun Kwandanyo kole: Teebee pororyosyek—ng'oo ne ki kas kiit ne uu ni? Kagoyai chepto ne pergeiya Israel kiit ne yaach miising'. Tos istoegei teluji ne po Lebanon eng' chepkeigeusyek che po koik? Tos koyamei peek che karon che rootei che bunu ole loo? Ago kagiutye anee piikyuk; lalei icheek ubani eng' kanamonik che mami boisyennywa, koyae piikyuk koriichkei kong'eetee ortinwek che po keny, ak kobendi ortinwek che komosta—che sing'ortot, che ma ki tee. koyae emennywa koek kuberot, koek kiy ne sasisyet koigeny; age tugul ne siirtoe yooto kokwong'yo ak kowiir metowekwak. Ko uu koristotap kong'asiis, aiyestochini icheek eng' taitap puunyoot; aboorchini icheek letnyu, ak ma koonyek, eng' peetuut po yaityennywa.

Komwa icheek kole, “Nyoo, kechopchi Jeremiah yaityet—ma lusyo ng'atuutyet eng' tisiindet, anan kabwaatet eng' chii ne utyot, anan ng'olyoot eng' maotindet. Nyoo, kebir ineendet ak ng'elyep; ak kemeuny ng'aleekyik tugul.” Igas anee kiy, Kwandanyu, ak igas kutitap che baooryanjo! Tos kigeere yaityet eng' nebo myee? Ago kigobal keriinget si konam saboondanyu. Ibwaat ole ki atonon eng' taing'ung' si amwa che myee agobo icheek, si awal nereegeng'ung' kong'eetee icheek. Agoochi anyun lagokwak rubeet; iyook icheek eng' kimnateetap rotweet. Ingoek osotikwak chilili ak manong'otyot; kebarei murenikyik, ak kobir rotweet lagok che murenik eng' pooryeet. Ingogaseksei riirek kong'eetee koorikwak ye ibunji icheek luulik eng' min, amu kigobal keriinget si konam anee, ak kagoun mestonik eng' keelyekyuk. Ago inyee, Kwandanyu, ingen pwaatutikwak tugul che chobei si kobara. Amat inyochi yaitwogikwak anan itindiny tengekwogikwak eng' taing'ung'. Ingoriichkei eng' taing'ung'; yachi icheek eng' sait po angeeng'ung'.