Amar Pitri pora Tar manuh khan ke bonai ase

Kumhar laga chakka te, ekta bigri ja kolsi ke aru notun kori bonai diye, aru amar Pitri koi jati khan ke bhi eneka kore — koi diya bipod tu ghurai lobo pare jodi taikhan ghuri ahe. Judah jowab diye, eitu kunu asha nai aru taikhan nijor laga bhabona hisab te cholibo. Pichete manu khan Jeremiah laga biruddhe jukti kore.

Adhyay 18.

Amar Pitri pora Jeremiah ke aha kotha tu:

“Uthibi, kumar laga ghor te namikena jabi, aru ta te Moi laga kotha khan tumi ke hunai dibo.”

Karne moi kumar laga ghor te namikena jaise, aru ta te tai chaka te kaam kori thakise. Tai bonai thaka mati laga bertan tu tar hath te biya hoi jaise, karne tai bhal luwa nisena eitu ke dusra bertan ekta te aru bonai dise.

Titia amar Pitri laga kotha moi ke ahhise:

“Israel laga ghor, eitu kumar pora kora nisena Moi tumikhan ke koribo napare naki? tumar Pitri koi ase. Kumar laga hath te mati thaka nisena, Israel laga ghor, tumikhan bhi Moi laga hath te eneka ase. ‘Kunbi somoi te Moi ekta desh nohoile rajyo laga bishoi te kobo pare, eitu ke jor pora ulai phelabole, bhangai dibole, aru khotom koribole nimite, kintu jodi Moi birodh te kowa hei desh tu nijor biya kaam pora ghurise, titia Moi eitu nimite bhabi rakha dukh laga bhabona bodli koribo. Aru kunbi somoi te Moi ekta desh nohoile rajyo laga bishoi te kobo pare, eitu ke bonabole aru ropabole nimite, kintu jodi eitu Moi laga suku age te biya kaam kore, Moi laga awaj ke nahuni, titia Moi eitu nimite bhabi rakha bhal laga bhabona bodli koribo.

“Etiya Judah laga manuh khan aru Jerusalem te thaka manuh khan ke kobi: Tumar Pitri eneka koi ase: Sabi, Moi tumikhan birodh te dukh bonai ase, tumikhan birodh te bhabona kori ase. Tumikhan sob manuh nijor biya rasta pora ghuri ahhibi; nijor rasta aru kaam khan bhal banabi.’” ^a

Kintu tarkhan koise, “Asha nai! Ami nijor laga bhabona khan piche koribo, sob manuh nijor tan aru biya mon hisab te koribo.”

Karne amar Pitri koi ase: Desh khan ke hudibi—kun pora eneka kotha hunise? Kumari Israel pora bisi bhoyonkor kaam korise. Lebanon laga borop tu kitia bhi pathor pahar khan pora najai naki? Dur laga jaga pora bohi aha thanda pani khan kitia bhi sukhi najai naki? Hoilebi Moi laga manuh khan Moi ke pahori jaise; tarkhan eku daam nathaka murti khan ke dhup julai ase, eitu pora Moi laga manuh khan ke purana rasta pora giribole aru kitia bhi naja thaka digdari rasta khan te berabole bonai ase, tarkhan laga desh ke ujar jaga bonai ase, hodai nimite sorom laga jinis bonai ase; eitu usor pora juwa sob manuh asurit hobo aru nijor matha khan hilabo. Purab phale laga hawa nisena Moi tarkhan ke dushman age te titili dibo; tarkhan laga dukh laga din te Moi tarkhan ke Moi laga chehera nohoi kintu pichha phale dikhai dibo.

Tarkhan koise, “Ahibi, ami Jeremiah birodh te bhabona koribo—purohit pora niyom, gyani pora salah, nohoile bhabobadi pora kotha kitia bhi harai najabo. Ahibi, ami jiba pora tar ke maribo; tai kowa sob kotha ke dhyan nadibo.” Moi laga Pitri, Moi phale dhyan dibi, aru moi ke golti diya khan laga awaj hunibi! Bhal kaam laga bodla te biya dibo lage naki? Hoilebi tarkhan moi laga jibon lobole ekta gath khundise. Moi kineka Apuni age te khara hoi kene tarkhan nimite bhal kotha kobole, Apuni laga khong tarkhan pora hatai dibole thakise, eitu yaad koribi. Karne tarkhan laga bacha khan ke akal te di dibi; tarkhan ke talwar laga takot te di dibi. Tarkhan laga maiki khan bacha nathaka aru bidhowa hobole dibi; tarkhan laga mota manuh khan ke morai dibi, tarkhan laga jawan khan ke lorai te talwar pora morai dibi. Jitia Apuni achanak pora tarkhan birodh te chor-dakait khan ke anibo, titia tarkhan laga ghor khan pora kanda awaj ulabole dibi, kilemane tarkhan moi ke dhoribole ekta gath khundise aru moi laga bhori nimite phanda khan lukai rakhise. Kintu Apuni, moi laga Pitri, tarkhan pora moi ke morai dibole kora sob bhabona jane. Tarkhan laga golti maph nakoribi aru tarkhan laga paap Apuni laga suku age pora nasaribi. Tarkhan ke Apuni age te giri jabole dibi; Apuni laga khong laga somoi te tarkhan logot te hisab koribi.