Cheeng'ei Laitoryat ne po Sheba Utaatyet
Ki nyoonu laitoryat ne po Sheba kotyem kalasunet ne ki koonu Kwandanyo Solomon, ak kometen muguleldanyi, kole ma kinga mwachiwa agot kebeber. Kotuigei thahabu, ak kelogap tambeesik, ak kuserik, ak kipkaanik, agoi koek fedha ma kiy eng' Jerusalem, ak kocheeng' laitoryat age tugul koger ineendet.
10 1Kingo kogas laitoryat ne po Sheba kalasunetap Solomon, ne ki kanamgei ak kainetap Kwandanyo, kobwa koemdai eng' ng'olyoot che nyigoonen. 2Ki pwa Jerusalem kobooto piik che chaang' miising' che isup—tambeesik che ibei tuguuk che ng'uu ne anyiny, thahabu che chaang' miising', ak koiik che po kamanuutyet. Kingo koit ole mi Solomon, kong'alaalji tuguuk tugul che ki mi muguleldanyi. 3Ki wolji Solomon ng'olyootosyekyik tugul; ma kimi ng'olyoo ne ung'oot ne komagimuuch laitoryat koboorwo. 4Kingo keer laitoryat ne po Sheba utaatyetap Solomon tugul ak koot ne ki teech, 5amitwogik che ki mi mesennyi, otwogikyik che kitebee, kuserennyi che poisyee kolaachi ngoroikwak che po laitornatet, piigap riibiik che po tuguuk che kieei, ak koroosiosyek che ibeelei che ki yachi eng' kootap Kwandanyo—kot kometen muguleldanyi. 6Ki leenji laitoryat, “Imanda kalasunet ne ki agas eng' emennyu agobo ng'aleeguk ak utaatyeng'ung'. 7Ma kinga yan kalasunet kot anyo ageer eng' konyeguk. Ma kinga mwachi kot ak rubeet! Siirei utaatyeng'ung' ak poroteng'ung' kalasunet ne ki agas. 8Agasigei piiguk! Agasigei otwogiguchu che tonone koigeny eng' taing'ung' ak kogas utaatyeng'ung'! 9Keberurin Kamuktaindet ne Toroor Kamuktaindeng'ung'! Ineendet ne ki boiboitu agobo inyee ak kigoonin ng'echereetap laitornatet ne po Israel. Amu ki chamei Kamuktaindet ne Toroor piigap Israel koigeny, kigoonin ie laitoryat si iyai kirwooget ne imanit ak imanda.” 10Ki igoochi laitoryat keruutik eliphuusyek somok ak pogol lo che po thahabu, tuguuk che ng'uu ne anyiny che chaang' miising', ak koiik che po kamanuutyet. Ma ki pwoonei kogeny tuguuk che ng'uu ne anyiny che chaang' ko uu che ki igoochi laitoryat ne po Sheba Laitoryat Solomon.
11Melisyegap Hiram, che ki ibei thahabu eng' Opir, ki ibei agine keetiigap almug che chaang' miising' ak koiik che po kamanuutyet eng' Opir. 12Ki yachi laitoryat keetiigap almug kariik che tonone kootap Kwandanyo ak kootap laitoryat, ak kibugandisyek ak kibugandinik che po tyennik. Ma ki pwa anan koger keetiigap almug che uu nooto agoi nguno.
13Ki igoochi Laitoryat Solomon laitoryat ne po Sheba tuguuk tugul che kimachei, ne ki soomei, kobooto che ki igoochi eng' mogornatetap laitornatennyi. Yeityo koweech koba emennyi, ineendet ak otwogikyik.
Toroornatetap Solomon, Kabutetap Kwanda
14Weigeitap thahabu ne ki nyoorunee Solomon eng' kenyiit agenge ko ki keruutik eliphuusyek pogol aeng' ak sisiit, 15kobatee che ki nyooru eng' chemung'arainik, keljinet ne po piigap chokindo, laitorinik tugul che po Arabah, ak pounigap emet. 16Ki yai Laitoryat Solomon long'onik che eecheen pogol aeng' che po thahabu ne kibir, ne ki mi pounatennyi taman ak mut che po thahabu eng' age tugul. 17Ki yai long'onik che mengech pogol somok che po thahabu ne kibir, che ki mi pounatennyi somok ak nusu eng' age tugul; ak ki inde laitoryat chooto eng' Kootap Timdap Lebanon. 18Ki yai agine laitoryat ng'echereetap laitornatet ne oo ne po kelegap peeleek ak kotuge thahabu ne myee kosiir. 19Ki tinyei ng'echereet tyegutik lo ak paragutap ng'echereet ne kayiem murot let. Ki mi kariigap eunek eng' tuwai aeng' che po ng'echereet, ak ki tonone ng'etuunyik aeng' eng' ngeguut. 20Ki tonone ng'etuunyik taman ak aeng' eng' tyegutichooto lo, agenge eng' luuk age tugul. Ma ki yae kiit ne uu nooto eng' laitornatet age tugul. 21Tuguugap kieei che po Laitoryat Solomon tugul ko ki po thahabu, ak che ki mi Kootap Timdap Lebanon tugul ko ki po thahabu ne tiliil. Ma ki mi che po fedha; amu eng' peetuusyegap Solomon ko ki ma kiger fedha koik kiit. 22Ki tinyei laitoryat melisyegap chokindo eng' nyanjet kobooto melisyegap Hiram. Eng' kenyiisyek somok tugul koweech koip thahabu, fedha, kelegap peeleek, ng'oosisyek, ak lugosyek.
23Ki siir anyun Laitoryat Solomon laitorinik tugul che po ng'wony eng' mogornateet ak eng' utaatyet. 24Ki cheeng'ei ng'wony komugul taitap Solomon, kogas utaatyet ne ki inde Kwandanyo muguleldanyi. 25Eng' kenyiit age tugul ko ki ibei chii tugul kaatunennyi: tuguuk che po fedha ak che po thahabu, ngoroik, kariik, tuguuk che ng'uu ne anyiny, paraisisyek, ak nyumbusyek.
26Ki yum Solomon charunee ak paraisisyek: charunee tausinik agenge ak pogolusyek ang'wan, ak paraisisyek eliphuusyek taman ak aeng', che ki kiistochin nganasoogap charunee ak kobooto laitoryat eng' Jerusalem. 27Ki yai laitoryat fedha koik ye tuiyo ko uu koiik eng' Jerusalem, ak keetiigap seda koik che chaang' ko uu sosiigap komoswek che eecheen. 28Ki ibune paraisisyegap Solomon eng' Misiri ak eng' Kue; ki alda chemung'arainigap laitoryat eng' Kue eng' beeshaitap chokindo. 29Ki ki ibune charu agenge eng' Misiri eng' pounatennyi taman ak mut che po fedha, ak paraisiit agenge eng' pounatennyi ang'wan; ak eng' chemung'arainichuuto ko ki itei charunee ak paraisisyek laitorinik tugul che po Hitik ak Aram.