1 Wungnaobing 10

10 ¹Shebawui awungva̱na, ithumwui Avāwui mingli ngashiklaga khalei Solomonwui mingkhamayāng chi shālaga, ali kasasaka ngahān eina chāng tam khavai vai. ²Ana rao kachungkhali thānphunglaga—utbingna nganamkaphā otyur, sinā kachungkha kala aman kasaka ngalung khuiphungda—Jerusalemli vai. Solomonli thānglaga, awui ningli khalei saikora chi ali hānga. ³Solomonna awui khangahān saikora chi ngahānkāmisera; ali mangahānkākharar thumkahai awungali khikhala maleisāmana. ⁴Shebawui awungva̱na Solomonwui thangmei saikora kala ana sākahai shim chi theilaga, ⁵awui kashakazā, kathānabingwui otpam, raobingna athumwui sāri khangavaia otram khangatha̱, awui khorkhong singmebing kala ithumwui Avā shimli awungana kachigat rikkatā—chi saikora theilaga awungva̱ khakshingda khaowa. ⁶Ana awungali hānga, "Nawui tui kala nawui thangmeiwui pongli iwui ngaleili ina shākahai pao chi mashunga. ⁷Kha, eina tangda imik eina kahāng marātheiranglakha, kashā chi mashitsangsāmana; yanglu, hakkhamahā tangkhaila ili mahangrangsai! Nawui thangmei kala kashāng chi ina shākahai paoli henmei. ⁸Nawui mibing kalā ringkaphāna! Kala nawui mangāli atam kachida nganingda nawui thangmei kashā khalei nawui raobing kalā ringkaphāna! ⁹Nali ningyāng unglaga Israelwui wungpamkhongli nali chipam kahai PROHO nawui Vareli soranu! PROHO Varena Israelli mashimānda leishikharewui vang, mashun kala khamashung khangarong sākhavai nali awunga sākahaina." ¹⁰Ana awungali sinā kg. thingmati, nganamkaphā otyur kachungkha kala aman kasaka ngalungbing mi. Shebawui awungva̱na Solomon Awungali khamikasā thāda nganamkaphā otyur chikathā chi, latluida maleilakranga.

¹¹Ophirwui eina sinā khuikahai Hiramwui jahasna, Ophirwui eina almug thing kachungkha kala aman kasaka ngalungla khuiungmi. ¹²Awungana almug thing chi ithumwui Avā shim kala awungawui shimwui vang tektā, kala laa kasābingwui vang tingteilā kala lyre sākhui. Chikathā almug thing latluida marākha lah matheila maleiluimana.

¹³Awunga Solomonna awungawui khangachā athishurda ali khami chila lāngda, Shebawui awungva̱li a kapopo saikora, awui ningchānga kachikathā mi. Chiwui thili ana awui raobingli ngasoda awui ngaleili latunga.

Solomonwui Tekhamatei, Avāwui Lemmet

¹⁴Kumkhali Solomonna samkaphang sināwui kharit chi kg. thingmaga̱da kathumna, ¹⁵chili lāngda leihkhalonbingwui eina shai kakhui, leih kasābingwui tongkazā, kala Arabia awungabing saikora eina ngalei governorbingwui einala samphanga. ¹⁶Awunga Solomonna sinā kazanga eina chāngvei hakva shākhani sākhui; chāngvei kachiva̱li sinā onlaga pound 15 zanga. ¹⁷Ana sinā kazanga eina chāngvei teokhamei shākathum sākhui; kachiva̱li sinā onlaga pound 3.75 zanga; awungana saikora chi Lebanon Ngahong shimli haihai. ¹⁸Kala awungana mafahāwui wungpamkhong kahakva akhala sākhuilaga mathāmeikap kaje sinā heirormithai. ¹⁹Wungpamkhong chiwui chonchak tharuk kala akhanukshong aton khoram kahaina. Wungpamkhongwui uishong yāshongli pāngpo kai leihai, kala kazingkha̱ khani chi pāngpowui ngalemli runghai. ²⁰Kazingkha̱ tharāda khani chonchak tharukli runghaida, lākharip akharip akha runghai. Hikatha ot wungram kachilikha masālakmana. ²¹Mangkhavai Solomonwui adānatui khorkhong katonga chi sinā eina sākahaina, kala Lebanon Ngahong Shim manungli leibing saikora chi sinā kachangamāng china. Khikhakha lupāsā eina masāmana; Solomonwui tam chili lupāsā hi khikhakhana da makhuimana. ²²Kaja awungana Hiramwui jahasbing ngasoda shamadruli leihkhalonawui jahas lei. Kakathuma zingkum kachida athumna sinala, lupāsāla, mafahāla, nāyongla kala yongyingguila khuiungda latunga.

²³Chithāda, Awunga Solomonna lanwui ponglila thangmeiwui ponglila okathuiwui awunga saikorali mataimeisersai. ²⁴Ithumwui Avāna awui ningli sangkasā thangmei chi nganā khavai, okathui katongana Solomonwui ngalemli vāngai. ²⁵Kum kumli khavā kachiva̱na awui khavā—sināwui, lupāsāwui chara̱-chasān, kashankachon, raisāri, nganamkaphā thao, sigui, kala gadhā—khuirāmi.

²⁶Solomonna siguigarila, siguiraimila kazipkhui; awui siguigari chi thingkha shāmati, sigui raimi chi thingtharāda khani, kala athumli siguigari keinungli kala awungali ngasoda Jerusalemli ngayarhai. ²⁷Awungana Jerusalemli lunggui thāda lupāsā singnganaowa, kala Shephelahwui sycamore thing sorngasaida leikasā thāda cedarthing chi singngasaka. ²⁸Egyptli kala Kueli eina Solomonwui siguibing alokhui; awungawui leih kasābingna siguibing chi Kue ramli eina aman mida samphanga. ²⁹Siguigari akha Egyptwui eina lupāsā shātharuk mida khuiunga, kala sigui akha lupāsā shākha hangphangā mida khuiunga. Chi leih kasābing tākam eina siguigari kala siguibing chi Hitnaobingwui awunga kala Aramwui awungabing saikorali yorsanga.