ଦ୍ଵିତୀୟ ବିବରଣ 30 FHB Father's Heart Bible™

30 ¹ମୁଁ ତୁମ୍ଭ ସମ୍ମୁଖରେ ଯେଉଁ ଆଶୀର୍ବାଦ ଓ ଅଭିଶାପ ରଖିଅଛି, ଏହିସବୁ ଘଟଣା ଯେତେବେଳେ ତୁମ୍ଭ ପ୍ରତି ଘଟିବ ଓ ତୁମ୍ଭ ପିତା ତୁମ୍ଭକୁ ଯେଉଁ ସମସ୍ତ ଦେଶମଧ୍ୟକୁ ତଡ଼ିଦେଇଅଛନ୍ତି, ସେସବୁ ଦେଶ ମଧ୍ୟରେ ତୁମ୍ଭେ ଏହିସବୁ ସ୍ମରଣ କରିବ, ²ପୁଣି ତୁମ୍ଭେ ଓ ତୁମ୍ଭ ସନ୍ତାନଗଣ ଆପଣା ପିତାଙ୍କ ନିକଟକୁ ଫେରିଆସି ମୁଁ ଆଜି ତୁମ୍ଭକୁ ଯାହାସବୁ ଆଜ୍ଞା ଦେଉଅଛି, ସେସବୁରେ ଆପଣାର ସମସ୍ତ ଅନ୍ତଃକରଣ ଓ ସମସ୍ତ ପ୍ରାଣ ସହିତ ତାହାଙ୍କ ବାକ୍ୟ ପାଳନ କରିବ, ³ସେତେବେଳେ ତୁମ୍ଭ ପିତା ବନ୍ଦୀତ୍ଵରୁ ତୁମ୍ଭକୁ ଫେରାଇ ଆଣିବେ, ତାହାଙ୍କ ହୃଦୟ କୃପାରେ ତୁମ୍ଭ ପ୍ରତି ଫେରିବ, ପୁଣି ତୁମ୍ଭ ପିତା ତୁମ୍ଭକୁ ଯେଉଁ ସମସ୍ତ ଲୋକଙ୍କ ମଧ୍ୟରେ ଛିନ୍ନଭିନ୍ନ କରିଅଛନ୍ତି, ସେସବୁଠାରୁ ସେ ତୁମ୍ଭକୁ ପୁନର୍ବାର ସଂଗ୍ରହ କରିବେ। ⁴ଯଦି ତୁମ୍ଭେ ଆକାଶର ପ୍ରାନ୍ତ ପର୍ଯ୍ୟନ୍ତ ଛିନ୍ନଭିନ୍ନ ହୋଇ ରହିଥାଅ, ତେବେ ସେଠାରୁ ତୁମ୍ଭ ପିତା ତୁମ୍ଭକୁ ସଂଗ୍ରହ କରିବେ, ସେଠାରୁ ସେ ତୁମ୍ଭକୁ ଆଣିବେ। ⁵ତୁମ୍ଭ ପିତୃପୁରୁଷମାନେ ଯେଉଁ ଦେଶ ଅଧିକାର କରିଥିଲେ, ସେହି ଦେଶକୁ ତୁମ୍ଭ ପିତା ତୁମ୍ଭକୁ ଆଣିବେ; ତୁମ୍ଭେ ତାହା ଅଧିକାର କରିବ, ପୁଣି ସେ ତୁମ୍ଭ ପିତୃପୁରୁଷମାନଙ୍କ ଅପେକ୍ଷା ତୁମ୍ଭର ଅଧିକ ମଙ୍ଗଳ କରି ତୁମ୍ଭକୁ ବହୁବଂଶ କରିବେ। ⁶ତୁମ୍ଭେ ଯେପରି ବଞ୍ଚିବ, ଏଥିପାଇଁ ଆପଣାର ସମସ୍ତ ଅନ୍ତଃକରଣ ଓ ସମସ୍ତ ପ୍ରାଣ ସହିତ ଆପଣା ପିତାଙ୍କୁ ପ୍ରେମ କରିବା ନିମନ୍ତେ ତୁମ୍ଭ ପିତା ତୁମ୍ଭର ହୃଦୟ ଓ ତୁମ୍ଭ ବଂଶଜମାନଙ୍କ ହୃଦୟ ସୁନ୍ନତ କରିବେ। ^a a v6 ଆମ୍ଭମାନଙ୍କ ପିତା ଏହି ଆନ୍ତରିକ କାର୍ଯ୍ୟ ଆପେ କରିବେ ବୋଲି ପ୍ରତିଜ୍ଞା କରନ୍ତି — ହୃଦୟକୁ ପରିବର୍ତ୍ତନ କରି, ଯେପରି ତାହାଙ୍କ ସନ୍ତାନମାନେ ତାହାଙ୍କୁ ପ୍ରକୃତରେ ପ୍ରେମ କରିପାରିବେ। ଯେତେବେଳେ ଆତ୍ମା ଆମ୍ଭମାନଙ୍କ ଅନ୍ତରରେ ପ୍ରେମ ଲେଖନ୍ତି, ସେତେବେଳେ ନୂତନ ନିୟମ ଯେଉଁ ହୃଦୟର ପରିବର୍ତ୍ତନ ସଫଳ କରେ, ଏହା ତାହା ଅଟେ। ⁷ତୁମ୍ଭ ପିତା ଏହିସବୁ ଅଭିଶାପ ତୁମ୍ଭ ଶତ୍ରୁମାନଙ୍କ ଉପରେ ଓ ଯେଉଁମାନେ ତୁମ୍ଭକୁ ଘୃଣା କଲେ ଓ ଅନୁଧାବନ କଲେ, ସେମାନଙ୍କ ଉପରେ ଘଟାଇବେ। ⁸ତୁମ୍ଭେ ପୁନର୍ବାର ଆପଣା ପିତାଙ୍କ ବାକ୍ୟ ପାଳନ କରିବ, ପୁଣି ମୁଁ ଆଜି ତୁମ୍ଭକୁ ଯେଉଁ ସମସ୍ତ ଆଜ୍ଞା ଦେଉଅଛି, ସେସବୁ କରିବ। ⁹ତୁମ୍ଭ ପିତା ତୁମ୍ଭ ହସ୍ତକୃତ ସମସ୍ତ କାର୍ଯ୍ୟରେ, ତୁମ୍ଭ ଉଦରର ଫଳରେ, ତୁମ୍ଭ ପଶୁଗଣର ଫଳରେ ଓ ତୁମ୍ଭ ଭୂମିର ଫଳରେ ତୁମ୍ଭର ମଙ୍ଗଳ ନିମନ୍ତେ ତୁମ୍ଭକୁ ପ୍ରଚୁର ଆଶୀର୍ବାଦ କରିବେ। କାରଣ ତୁମ୍ଭ ପିତା ଯେପରି ତୁମ୍ଭ ପିତୃପୁରୁଷମାନଙ୍କଠାରେ ସନ୍ତୁଷ୍ଟ ହୋଇଥିଲେ, ସେପରି ପୁନର୍ବାର ତୁମ୍ଭ ମଙ୍ଗଳ ନିମନ୍ତେ ତୁମ୍ଭଠାରେ ଆନନ୍ଦ କରିବେ, ¹⁰ଯେତେବେଳେ ତୁମ୍ଭେ ଆପଣା ପିତାଙ୍କ ବାକ୍ୟ ପାଳନ କରିବ, ଏହି ବ୍ୟବସ୍ଥା-ପୁସ୍ତକରେ ଲିଖିତ ତାହାଙ୍କ ଆଜ୍ଞା ଓ ବିଧି ରକ୍ଷା କରିବ, ପୁଣି ଆପଣାର ସମସ୍ତ ଅନ୍ତଃକରଣ ଓ ସମସ୍ତ ପ୍ରାଣ ସହିତ ଆପଣା ପିତାଙ୍କ ପ୍ରତି ଫେରିବ।

ତୁମ୍ଭ ଭାବନା ଅପେକ୍ଷା ନିକଟ

¹¹ମୁଁ ଆଜି ତୁମ୍ଭକୁ ଯେଉଁ ଆଜ୍ଞା ଦେଉଅଛି, ତାହା ତୁମ୍ଭ ପକ୍ଷରେ ଅତି କଠିନ ନୁହେଁ, କିଅବା ଦୂରବର୍ତ୍ତୀ ନୁହେଁ। ¹²ତାହା ସ୍ଵର୍ଗରେ ନାହିଁ ଯେ, ତୁମ୍ଭେ କହିବ, “ଆମ୍ଭେମାନେ ଯେପରି ତାହା ଶୁଣି ପାଳନ କରିପାରିବୁ, ଏଥିପାଇଁ କିଏ ଆମ୍ଭମାନଙ୍କ ନିମନ୍ତେ ସ୍ଵର୍ଗକୁ ଯାଇ ତାହା ଆଣି ଆମ୍ଭମାନଙ୍କ ନିକଟକୁ ଆଣିବ?” ¹³କିଅବା ତାହା ସମୁଦ୍ର ସେପାରିରେ ନାହିଁ ଯେ, ତୁମ୍ଭେ କହିବ, “ଆମ୍ଭେମାନେ ଯେପରି ତାହା ଶୁଣି ପାଳନ କରିପାରିବୁ, ଏଥିପାଇଁ କିଏ ଆମ୍ଭମାନଙ୍କ ନିମନ୍ତେ ସମୁଦ୍ର ପାର ହୋଇ ତାହା ଆମ୍ଭମାନଙ୍କ ନିକଟକୁ ଆଣିବ?” ¹⁴ମାତ୍ର ସେହି ବାକ୍ୟ ତୁମ୍ଭର ଅତି ନିକଟରେ, ତୁମ୍ଭ ମୁଖରେ ଓ ତୁମ୍ଭ ହୃଦୟରେ ଅଛି, ଯେପରି ତୁମ୍ଭେ ତାହା ପାଳନ କରିପାରିବ। ^b b v14 ପାଉଲ ଏହି ପଦ ଗ୍ରହଣ କରି ସୁସମାଚାରକୁ ବର୍ଣ୍ଣନା କରନ୍ତି — ବିଶ୍ଵାସର ଯେଉଁ ବାକ୍ୟ ଆମ୍ଭମାନଙ୍କ ନିକଟରେ, ଆମ୍ଭମାନଙ୍କ ମୁଖ ଓ ହୃଦୟରେ ଅଛି, ଯାହା ଦ୍ଵାରା ଆମ୍ଭେମାନେ ଯୀଶୁଙ୍କଠାରେ ବିଶ୍ଵାସ କରି ପରିତ୍ରାଣ ପ୍ରାପ୍ତ ହେଉ। ¹⁵ଦେଖ, ଆଜି ମୁଁ ତୁମ୍ଭ ସମ୍ମୁଖରେ ଜୀବନ ଓ ମଙ୍ଗଳ, ମୃତ୍ୟୁ ଓ ଅମଙ୍ଗଳ ରଖିଅଛି। ¹⁶ଯଦି ତୁମ୍ଭେ ଆଜି ଆପଣା ପିତାଙ୍କୁ ପ୍ରେମ କରି, ତାହାଙ୍କ ପଥରେ ଚାଲି, ତାହାଙ୍କ ଆଜ୍ଞା, ବିଧି ଓ ଶାସନ ପାଳନ କରି ତାହାଙ୍କ ଆଜ୍ଞା ମାନିବ, ତେବେ ତୁମ୍ଭେ ବଞ୍ଚିବ ଓ ବହୁବଂଶ ହେବ, ପୁଣି ଯେଉଁ ଦେଶ ଅଧିକାର କରିବାକୁ ତୁମ୍ଭେ ପ୍ରବେଶ କରୁଅଛ, ସେଠାରେ ସେ ତୁମ୍ଭକୁ ଆଶୀର୍ବାଦ କରିବେ। ¹⁷ମାତ୍ର ଯଦି ତୁମ୍ଭ ହୃଦୟ ବିମୁଖ ହୁଏ ଓ ତୁମ୍ଭେ ଶୁଣିବାକୁ ଅସମ୍ମତ ହୋଇ ପ୍ରଲୋଭିତ ହୋଇ ଅନ୍ୟ ଦେବତାମାନଙ୍କ ଆଗରେ ପ୍ରଣାମ କରି ସେମାନଙ୍କର ସେବା କର, ¹⁸ତେବେ ମୁଁ ଆଜି ତୁମ୍ଭକୁ ଜଣାଉଅଛି, ତୁମ୍ଭେ ନିଶ୍ଚୟ ବିନଷ୍ଟ ହେବ; ଯେଉଁ ଦେଶ ଅଧିକାର କରିବାକୁ ତୁମ୍ଭେ ଯର୍ଦ୍ଦନ ପାର ହୋଇ ପ୍ରବେଶ କରୁଅଛ, ସେଠାରେ ତୁମ୍ଭେ ଦୀର୍ଘ କାଳ ବଞ୍ଚିବ ନାହିଁ। ¹⁹ଆଜି ମୁଁ ତୁମ୍ଭ ବିରୁଦ୍ଧରେ ଆକାଶ ଓ ପୃଥିବୀକୁ ସାକ୍ଷୀ କରୁଅଛି; ମୁଁ ତୁମ୍ଭ ସମ୍ମୁଖରେ ଜୀବନ ଓ ମୃତ୍ୟୁ, ଆଶୀର୍ବାଦ ଓ ଅଭିଶାପ ରଖିଅଛି। ଏଣୁ ଜୀବନ ମନୋନୀତ କର, ଯେପରି ତୁମ୍ଭେ ଓ ତୁମ୍ଭ ସନ୍ତାନଗଣ ବଞ୍ଚିବ, ²⁰ଆପଣା ପିତାଙ୍କୁ ପ୍ରେମ କରି, ତାହାଙ୍କ ବାକ୍ୟ ପାଳନ କରି ଓ ତାହାଙ୍କଠାରେ ଆସକ୍ତ ହୋଇ ରହିବ; କାରଣ ସେ ତୁମ୍ଭର ଜୀବନ ଓ ତୁମ୍ଭ ଆୟୁର ଦୀର୍ଘତା ଅଟନ୍ତି, ଯେପରି ତୁମ୍ଭ ପିତା ତୁମ୍ଭ ପିତୃପୁରୁଷ ଅବ୍ରହାମ, ଇସ୍‌ହାକ ଓ ଯାକୁବଙ୍କୁ ଯେଉଁ ଦେଶ ଦେବା ନିମନ୍ତେ ଶପଥ କରିଥିଲେ, ସେଠାରେ ତୁମ୍ଭେ ବାସ କରିବ।