Plata nga Giulay sa Makapito
Alang sa pangulo sa mga mag-aawit. Sumala sa sheminit. Usa ka salmo ni David.
Ang mga matinumanon nahanaw na ug ang tanan nag-ulog-ulog uban sa nabahin nga kasingkasing. Gihangyo sa salmista nga putlon ang mga dila nga hambogiro, ug nakadawat og tubag: tungod kay ang mga hangol nag-agulo, ang atong Amahan nag-ingon nga mobangon siya. Ang iyang mga pulong pilak nga gidalisay makapito.
12 1Tabangi kami, Amahan namo, kay nangawala na ang mga matinud-anon; ang mga maunongon nangahanaw gikan sa mga anak sa katawhan. 2Ang matag usa namakak ngadto sa iyang silingan; uban sa maulog-ulogong mga ngabil ug kasingkasing nga binahin sila nagasulti. 3Hinaut nga putlon sa atong Amahan ang tanang maulog-ulogong mga ngabil ug ang matag dila nga nagapanghambog sa dagkong mga butang, 4kadtong nagaingon, “Pinaagi sa among dila kami modaog; ang among mga ngabil among kaugalingon—kinsa may agalon kanamo?”
5“Tungod kay ang mga kabos gidagit, tungod kay ang mga timawa nag-agulo, motindog na ako karon,” nag-ingon ang atong Amahan. “Dad-on ko sa kaluwasan ang nagapangandoy niini.”
6Ang mga pulong sa atong Amahan maoy putling mga pulong, plata nga giulay sa hudno sa yuta, giputli sa makapito. 7Ikaw, Amahan namo, maoy magbantay nga luwas sa mga timawa; panalipdan mo kami gikan niini nga kaliwatan sa walay kataposan. 8Ang mga daotan nagalibotlibot sa tanang dapit sa dihang ang kangil-ad gibayaw taliwala sa mga anak sa katawhan.
