Sat Bar Sapha Kora Chandi
Gana cholawta nimite. Sheminith hisab te. David laga ekta Bhajan.
Biswasi manuh khan nai hoi gaise aru sob manuh dui mon pora misthi kotha koi. Bhajan likha jon phutani kora jibhra khan katibole mange, aru jowab pai: kele koile gorib manuh khan karahe, amikhan laga Pitri koi Tai uthibo. Tai laga kotha khan saat bar sapha kora chandi ase.
12 1Modot koribi, amar Pitri, kilemane biswasi khan harai jaise; vishwas thaka manuh khan manuh laga bacha khan majot pora harai gaise. 2Sob manuh pora nijor ghor usor manuh ke misa koi ase; tarif kora oth aru duita bhag kora mon pora tarkhan koi ase. 3Amar Pitri pora sob tarif kora oth khan, aru dangor jinis phutani kora sob jiba ke kati dibi, 4kun khan koi ase, “Amikhan laga jiba pora amikhan jiti lobo; amikhan laga oth tu amikhan laga nijor ase—kun amikhan uporte malik ase?”
5“Gorib khan ke lut korise karne, dukhia khan kandi ase karne, etiya Moi uthibo,” amar Pitri koi ase. “Kun pora eitu itcha kori ase, taike Moi surakshit jagate anibo.”
6Amar Pitri laga kotha khan sapha kotha ase, matir chulah te sapha kora chandi nisina, sat bar sapha korise. 7Apuni, amar Pitri, dukhia khan ke surakshit rakhibo; Apuni amikhan ke eitu jamana pora hodai nimite bachai rakhibo. 8Manuh laga bacha khan majot te letera kaam untcha huwa homoi te, dusto manuh khan sob phale ghuri thake.