Pilak nga Gin-ulay sing Makapito
Sa pangulo sang mga manug-amba. Suno sa sheminith. Salmo ni David.
Nadula na ang mga matutom kag ang tanan nagadayaw sing butig nga may nabahin nga tagipusuon. Ginapangayo sang salmista nga utdon ang mga dila nga hambugero, kag may sabat: tungod kay nagaugayong ang mga nagakinahanglan, nagasiling ang aton Amay nga magabangon sia. Ang iya mga pulong pilak nga ginpuro sing makapito.
Nagahambal ang aton Amay sa bersikulo 5
12 1Buligi kami, Amay namon, kay nagkalawala na ang mga matutom; nadula na ang mga maunungon sa tunga sang mga anak sang katawohan. 2Ang tagsatagsa nagabutig sa iya isigkatawo; sa bibig nga nagaulo-ulo kag sa tagipusoon nga napihak sila nagahambal. 3Kabay nga utdon sang aton Amay ang tanan nga bibig nga nagaulo-ulo kag ang tagsa ka dila nga nagapabugal sang dalagkung mga butang, 4ang mga nagasiling, “Paagi sa amon dila magadaug kami; ang amon mga bibig amon gid—sin-o ang ginoo sa amon?”
5“Bangud ginakawatan ang mga imol, bangud nagaugayong ang mga kinawad-an, mabangon ako karon,” siling sang aton Amay. “Dalhon ko sa kaluwasan ang nagahandum sini.”
6Ang mga pulong sang aton Amay mga pulong nga putli, pilak nga gin-ulay sa hurno nga duta, gin-ulay sing makapito. 7Ikaw, Amay namon, magatipig sang mga kinawad-an; bantayan mo kami gikan sa sini nga kaliwatan sa walay katubtuban. 8Nagalibotlibot ang mga malaut sa tagsa ka dampi kon ginabayaw ang kahalitan sa tunga sang mga anak sang katawohan.
