اووۀ ځله صفا شوې چاندى
د ساز د مشر دپاره. د شمينى په طرز باندې. د داؤد يو زبور.
وفادار ورک شوي او هر څوک په دوه زړه غوړه مالي کوي. زبور ویونکی غواړي چې ویاړونکې ژبې پرې شي، او ځواب ترلاسه کوي: ځکه چې اړ خلک ساندې وهي، زموږ پلار وايي چې هغه به پاڅېږي. د هغه خبرې هغه سپین زر دي چې اوه ځله پاک شوي.
12 1اے زمونږ پلاره، مدد وکړه، ځکه چې وفادار ختم شول؛ د بنى آدمو نه ايماندار ورک شول. 2هر څوک د خپل ګاونډى سره دروغ وائى؛ په چاپلوسو شونډو او دوه زړۀ سره خبرې کوى. 3زمونږ پلار دې ټولې چاپلوسې شونډې پرې کړى، او هره هغه ژبه چې د لويو خبرو فخر کوى، 4هغه څوک چې وائى، ”په خپله ژبه به مونږ غالب شُو؛ زمونږ شونډې زمونږ خپلې دى، زمونږ مالِک څوک دے؟“
5زمونږ پلار فرمائى، ”ځکه چې غريبان لوټ کيږى، ځکه چې محتاجان کوکارى کوى، نو زۀ به اوس پاڅم. زۀ به هغه چا له سلامتى ورکړم څوک چې د دې اُميد لرى.“
6د زمونږ پلار خبرې پاکې خبرې دى، داسې چاندى چې د مځکې په تنور کښې صفا شوې وى، اووۀ ځله پاکه شوې. 7اے زمونږ پلاره، تۀ به محتاجان په سلامتى ساتې؛ تۀ به مونږ د دې نسل نه د تل دپاره ساتې. 8کله چې د بنى آدمو په مينځ کښې بدى لوړيږى، نو بدکاران هرې خوا ته ګرځى.
