ዘኍልቍ 12

12 ¹ማርያምና አሮን ሙሴ ስላገባት ኢትዮጵያዊት ሴት ተቃወሙት፤ እርሱም ኢትዮጵያዊት ሴት አግብቶ ነበር። ²እነርሱም፣ “አባታችን የተናገረው በሙሴ ብቻ ነውን? በእኛስ አልተናገረምን?” አሉ፤ አባታችንም ይህን ሰማ።

³ሙሴ የተባለው ሰው በምድር ላይ ካሉት ሰዎች ሁሉ ይልቅ እጅግ ትሑት ነበር።

⁴አባታችንም ድንገት ሙሴን፣ አሮንንና ማርያምን፣ “እናንተ ሦስታችሁ ወደ መገናኛው ድንኳን ውጡ” አላቸው፤ ሦስቱም ወጡ።

⁵አባታችንም በደመና ዐምድ ወረደ፤ በድንኳኑ መግቢያ ቆሞ አሮንንና ማርያምን ጠራ፤ ሁለቱም ወደ ፊት መጡ።

⁶እንዲህም አለ፤ “ቃሌን ስሙ፤ በመካከላችሁ ነቢይ ቢኖር፣ እኔ አባታችሁ በራእይ እገለጥለታለሁ፤ በሕልምም እናገረዋለሁ። ⁷ባሪያዬ ሙሴ ግን እንደዚህ አይደለም፤ እርሱ በቤቴ ሁሉ የታመነ ነው። ⁸ከእርሱ ጋር አፍ ለአፍ፣ በእንቆቅልሽ ሳይሆን በግልጽ እናገራለሁ፤ እርሱም የአባታችንን መልክ ይመለከታል። ታዲያ ባሪያዬን ሙሴን ለመቃወም ለምን አልፈራችሁም?”

⁹የአባታችንም ቍጣ በእነርሱ ላይ ነደደ፤ እርሱም ሄደ።

¹⁰ደመናውም ከድንኳኑ ላይ በተነሣ ጊዜ፣ እነሆ ማርያም በለምጽ ተይዛ እንደ በረዶ ነጭ ሆና ነበር፤ አሮንም ወደ ማርያም ዘወር ባለ ጊዜ፣ እነሆ በለምጽ ተይዛ አየ። ¹¹አሮንም ሙሴን፣ “ጌታዬ ሆይ፣ እባክህ በስንፍናችን የሠራነውን ኀጢአትና በደል አትቍጠርብን። ¹²ከእናቱ ማሕፀን ሲወጣ ሥጋው እኩሌታ የበሰበሰ፣ ሞቶ እንደተወለደ ሕፃን አታድርጋት” አለው።

¹³ሙሴም ወደ አባታችን ጮኾ፣ “አባቴ ሆይ፣ እባክህ ፈውሳት!” አለ።

¹⁴አባታችን ግን ሙሴን እንዲህ አለው፤ “አባትዋ በፊትዋ ተፍቶባት ቢሆን እንኳ፣ ሰባት ቀን ትዋረድ አይደለምን? ሰባት ቀን ከሰፈሩ ውጭ ዝጊያት፤ ከዚያም መልሳት።”

¹⁵ማርያምም ሰባት ቀን ከሰፈሩ ውጭ ተዘጋች፤ ሕዝቡም እስክትመለስ ድረስ አልተጓዙም። ¹⁶ከዚያም በኋላ ሕዝቡ ከሐጼሮት ተነሥተው በፋራን ምድረ በዳ ሰፈሩ።