Mi eng' bukuit

Kaitosyek 12 FHB Father's Heart Bible™

Kiistoi 15% eng' kiy ne iale korook →
Bukuit

Ng'alaalen Miriam ak Aron agaigai Musa

Mwaei Miriam ak Aron kole ng'alaalei Kwandanyo eng' icheek ko uu eng' Musa. Ki walji kole ng'alaaljini Musa eng' kutit ak kutit, komyee ak ma eng' ng'aleek che ung'otin. Ki manda Miriam kotinyei mogondosaik; ki saaei Musa kityo agobo chametapkei nenyi, ak ki koganyei nganaseet komugul peetuusyek tisap.

Ng'alaali Kwandanyo eng' mustarisyek 4, 6–8, 14

Sura 12.

Ki ng'alaal Miriam ak Aron agaigai Musa agobo kwondo ne po Kus ne ki itun; amu ki itun kwondo ne po Kus. Ki le icheek, “Tos ki mwa Kwandanyo eng' Musa kityo? Tos ma ki mwa eng' acheek kora?” Ak ki kas Kwandanyo.

Ago ki iming'inegei chiito Musa miising', kosiir piik tugul che mi ng'wony.

Ki leenji anyun Kwandanyo Musa ak Aron ak Miriam, “Omande okweek somok oba emaitap tuiyet.” Ki manda icheek somok.

Yeityo koroo Kwandanyo eng' toloitap pooldet, ak kotonon eng' kurgeetap ema, ak koguur Aron ak Miriam, ak komong' icheek tuwai.

Ki le, “Ogaso ng'aleekyuk: ngot komi maotyot among okweek, anee Kwandang'wong', ang'aang'jigei ineendet eng' ng'ang'utyet, ang'alaalji eng' karwotitoet. Ma uu nooto otwogindennyu Musa; iman ineendet eng' kaanyo tugul. Ang'alaalji ineendet eng' kutit ak kutit, komyee ak ma eng' ng'aleek che ung'otin, ak keerei itoondap Kwandanyo. Amu nee anyun si ma oiywei ong'alaalji otwogindennyu Musa?”

Ki nereech anyun Kwandanyo agaigai icheek, ak ki wo.

Ye kingo togosta pooldet eng' paragutap ema, ogeero, ki tinyei Miriam mogondosaik, koleelit ko uu teluji. Ki rugutkei Aron Miriam, ogeero, ki tinyei mogondosaik. Ki leenji Aron Musa, “Asaain kiptaiyandennyu, mat inam agaigai acheek tengektap abusnateennyo ak yaityennyo. Mat ingoek ineendet ko uu lakweet ne kigosich kobek, ne kagowong' kebebertap panyeennyi ye mong'u eng' moetap kamennyi.”

Ki riirchi anyun Musa Kwandanyo, kole, “Asaain, ee Kwanda, asaain ale isoop ineendet!”

Ago ki leenji Kwandanyo Musa, kole, “Ngot koging'utyi kwandanyi togeennyi kityo, tos ma lilan peetuusyek tisap? Iger ineendet saang'utap nganaseet peetuusyek tisap; yeityo iwekta ineendet koweek.”

Ki keger Miriam saang'utap nganaseet peetuusyek tisap; ak ma ki pa piik agoi ki kiweekta ineendet koweek. Yeityo koba piik eng' Haserot, ak komuung'e eng' surkwen ne po Paran.