Miriam hoba Aron Mosa khulimbo ngüh angbü
Miriam si Aronei, haoen inei Mosa tegütham seneibü Bou shanga joyoda dogo lauda. Lausikei haoei jongaiko, Mosa yoa sembung to sembung joyoda, hushangabü ngüh danko aying dogo laukei. Miriam to im longan saopobü la yeikei; Mosaei kheijinei tham sao shat semtibü shanga welaukei, hoba kamshang pendouei chalou nyet haiyeikei.
12 1Mosaei lebü Kush yaksa shanga, Miriam hoba Aronei Mosa khulimbo ngüh angkei; aishanga haoei Kush yaksa che lekei. 2Haoenei laukei, “Seneibü Bouei Mosa danko ong joyokei lo? Haoei kün danko tokei ajoyokei lo?” Hobaje Bouei kho ditkei.
3Tou Mosa müt kho kaodaka kibü müt pendou tokei aeibou eaaoabü müt kikei.
4Mangde ong Bouei Mosa, Aron hoba Miriam to lenkei, “Lemshang neichem to kan sem longjan.” Haoen sem longkei.
5Hobaje Bouei sangmei thaonyua louyanan neichem koukhüna loan, Aron si Miriam ngakei, hoba haosi penyi nyangko loukei.
6Haoei laukei, “Ngeibü ngüh ditashi: kan yoa thuseibü che kialonga, ngei kaneibü Bou ki, ngei mangsanga hao to ngo lolo tang khittida, hoba mangha hao to joyoda. 7Kü khangenbou Mosa yoa kho tegü aying; haoei kü chemdang pendoua ngühmaanglanbü ki. 8Ngei hao yoa sembung to sembung joyoda, shangashatko, hushangabü ngüh danko aki, hoba haoei Boueibü mang hapda. Kheijinei kanei aila kü khangenbou Mosa khulimbo ngüh angla ahatkei?”
9Kheijinei Bou khau haoen khulimbo angkei, hoba haoei haoen jungkaje bangan satkei.
10Ladang sangmei kho neichem thüka ka tonenkei, chühashi, Miriam im longan ninthu tegü thupaian kikei. Hobaje Aronei Miriam phaito chühkei, hoba chühashi, sao imbü kikei. 11Hobaje Aronei Mosa to laukei, “O ngeibü bunyubou, künei ngoubü hoba amaibüei kümbü shabü kün khulimbo aphojan. 12Aoeibü haonyueibü shimung ka longjinei aoeibü phe jamde mautibü haibü bukbü shou tegü, sao akijan.”
13Hibü Mosaei Bou to ngekkei, “O kü Bou, sudajada, sao maitishima!”
14Lausikei Bouei Mosa to laukei, “Saoeibü bouei saoeibü thenyeka eok ong thoklabü kialonga, sao chalou nyet himouko akilabü lo? Sao shaishang khong aeto chalou nyet khinan phokushi; kho phaia sao leian loukushi.”
15Hobaje Miriam shaishang khong aeto chalou nyet khinan phobei; hoba sao leian loukbü shongko mütshuong ameimei. 16Kho phaia mütshuong Hazeroth ka meimeijung hauan, Paran lamanga shaikei.
