Miriamu na Harũni Magĩũkĩrĩra Musa
Miriamu na Harũni moigaga atĩ o nao maarĩrĩria Ithe witũ o ta Musa. Nake agacookia atĩ arĩanagĩria na Musa kanua kũrĩ kanua, ti na ndaĩ. Miriamu akoima arĩ na mũrimũ wa ngoma; Musa akamũthaithĩra o narua ahonio, nayo kambĩ yothe ĩgeetereria mĩthenya mũgwanja.
12 1Nao Miriamu na Harũni makĩaria ũũru wa Musa nĩ ũndũ wa mũtumia ũrĩa Mũkushi aahikĩte—nĩgũkorwo nĩaahikĩte mũtumia Mũkushi. 2Nao makiuga atĩrĩ, “Kaĩ Ithe witũ aarĩtie na kanua ka Musa wiki? Githĩ ndaarĩtie o na na kanua gaitũ?” Nake Ithe witũ akĩigua ũhoro ũcio.
3Na rĩrĩ, mũndũ ũcio Musa aarĩ mwĩnyiihia mũno, gũkĩra andũ othe arĩa maarĩ thĩ ĩno.
4O rĩmwe Ithe witũ akĩĩra Musa, na Harũni, na Miriamu atĩrĩ, “Umaai inyuĩ atatũ, mũũke Hemainĩ ya Gũtũnganwo.” Nao acio atatũ makiuma.
5Nake Ithe witũ agĩikũrũka arĩ gĩtugĩinĩ kĩa itu, akĩrũgama hau mũromoinĩ wa hema, agĩĩta Harũni na Miriamu, nao eerĩ magĩũka mbere.
6Nake akiuga atĩrĩ, “Iguai ciugo ciakwa: mũnabii angĩkorwo arĩ gatagatĩ kanyu, niĩ Ithe wanyu, nĩndĩĩonanagia kũrĩ we na kĩoneki, ngaaria nake na kĩroto. 7No ti ũguo harĩ ndungata yakwa Musa; we nĩ mwĩhokeku nyũmbainĩ yakwa yothe. 8Niĩ njaragia nake kanua kũrĩ kanua, na njĩra theri no ti na ndaĩ, nake nĩonaga mũhianĩre wa Ithe witũ. Nĩ kĩĩ gĩgĩtũmire mũage gwĩtigĩra gũkĩaria ũũru wa ndungata yakwa Musa?”
9Nĩ ũndũ ũcio marakara ma Ithe witũ magĩakana nĩ ũndũ wao, nake agĩĩthiĩra.
10Rĩrĩa itu rĩehereire hau igũrũ rĩa hema, hagĩkorwo Miriamu arĩ na mangũ, erũ o ta ira. Nake Harũni akĩĩhũgũrĩra Miriamu, na akĩmuona arĩ na mangũ. 11Nake Harũni akĩĩra Musa atĩrĩ, “Ndagũthaitha, mwathi wakwa, ndũgatũcookererie wĩhia ũrĩa twĩhĩtie na ũrimũ, o na ũũru ũrĩa twĩkĩte. 12Ndũkareke atuĩke ta mwana ũciarĩtwo arĩ mũkuũ, ũrĩa mwĩrĩ waguo ũrĩkĩtie kũrĩĩo nuthu akiuma nda ya nyina.”
13Nake Musa agĩkaĩra Ithe witũ, akiuga atĩrĩ, “Ndagũthaitha, Ithe wakwa, mũhonie!”
14No Ithe witũ akĩĩra Musa atĩrĩ, “Korwo ithe aamũtuĩrĩire mata ũthiũinĩ, githĩ ndangĩaconokire mĩthenya mũgwanja? Mũhingĩrĩrie nja ya kambĩ mĩthenya mũgwanja; thuutha ũcio mũcookie.”
15Nake Miriamu akĩhingĩrĩrio nja ya kambĩ mĩthenya mũgwanja; nao andũ matiigana kuuma nginya rĩrĩa aacookirio. 16Thuutha ũcio andũ makiuma Hazerothu, magĩthiĩ makĩamba hema werũinĩ wa Parani.