Miriam aser Aroni Mosa Anema Jembi
Miriam aser Aroni parnok Tebu asoshi Mosa mesüka jembir ta ashi. Pai parnok dang Mosa den tebang o tebang jembir, temiim o nung masü ta langzü. Miriam zütsüra adok; idangyongjisa Mosai la tanebtsü asoshi mepishi, aser tanendak ajaki anogo tenet yongya-a atar.
12 1Mosai Kush nunger tetsür ka agi; aser pai agiba Kush nunger tetsür indang Miriam aser Aroni pa anema jembi. 2Parnoki ashi, “Tebui Mosa ajanga taiji jembi ama? Pai asenoka ajanga jembi masü no?” Aser Tebui aji angashi.
3Mosa nisungji, alima tejak nung aliba nisung ajak dang nungi, kanga ajemalur liasü.
4Ajongbena Tebui Mosa, Aron aser Miriam dang ashi, “Nenok asem sentep süki jagi adokang.” Anungji parnok asem adok.
5Anungji Tebui mepet tongshi nung alua, süki temalen noktaka, Aron aser Miriam aja, aser tenaprongla anasa or.
6Pai ashi, “Kü otem angang: nenok rongnung ainkar ka alira, Ni, nenok Tebu, mangdang nung pa dang kü sasa jungkai adoktsü, pungmang nung pa den jembitsü. 7Kü tenzüker Mosa den aji oda masü; pai kü ki ajak nung azüita lir. 8Pa den ni jangjajangja-a tebang o tebang jembir, temiim o nung masü; aser pai Tebu tereprangtsü angur. Anungji kechiba nenoki kü tenzüker Mosa anema jembitsü matsübu?”
9Anungji Tebu ain parnok anema kanga adoka, aser pai parnok nungi pila ao.
10Kodang mepetji süki nungi ajungket, ajiang, Miriam zütsüra aketera, rüjep ama temesüng liasü. Aroni Miriam sülen reprang, aser ajiang, pa zütsüra aketer liasü. 11Aroni Mosa dang ashi, “Oh kü kibur, ni ne dang mepishir, asenoki tamashi aser tamajunga inyakba temenen asenok dak tesotma. 12La tetsü nu menden nungi adokdang shi tesadang meyokadokba tasümang asoba ama lidakma.”
13Anungji Mosai Tebu dang ayimtena ashi, “Oba, yimlibilema la anebjangma.”
14Saka Tebui Mosa dang ashi, “La tebui la tejak nung metsü metsüloktsüra taiji, la anogo tenet maktepa malitsü no? La tanendak tezülen anogo tenet shibangtsü; anungji la meyipa bener arudakjang.”
15Miriam tanendak tezülen anogo tenet shibang; aser la tanaben meyipa bener aru tashi nüburtemi mapuso. 16Iba sülen nüburtemi Hazerot nungi apusoa oa, Paran lisem lima nung anen.