ዮሐንስ 15

15 ¹“እውነተኛው የወይን ግንድ እኔ ነኝ፤ አባቴም አትክልተኛው ነው። ²በእኔ ያለ ፍሬ የማያፈራ ቅርንጫፍ ሁሉ ያስወግደዋል፤ ፍሬ የሚያፈራውን ሁሉ ግን የበለጠ ፍሬ እንዲያፈራ ይከረክመዋል። ³ስለ ነገርኋችሁ ቃል አሁን ንጹሓን ናችሁ። ⁴በእኔ ኑሩ፤ እኔም በእናንተ እኖራለሁ። ቅርንጫፍ በወይኑ ግንድ ካልኖረ በቀር በራሱ ፍሬ ማፍራት እንደማይችል፣ እናንተም በእኔ ካልኖራችሁ በቀር ፍሬ ማፍራት አትችሉም። ⁵የወይኑ ግንድ እኔ ነኝ፤ እናንተ ቅርንጫፎች ናችሁ። በእኔ የሚኖር እኔም በእርሱ የምኖር ብዙ ፍሬ ያፈራል፤ ከእኔ ተለይታችሁ ምንም ማድረግ አትችሉምና። ⁶በእኔ የማይኖር ማንም እንደ ቅርንጫፍ ወደ ውጭ ይጣላል፤ ይደርቅማል፤ ቅርንጫፎችም ተሰብስበው ወደ እሳት ተጥለው ይቃጠላሉ። ⁷በእኔ ብትኖሩ ቃሎቼም በእናንተ ቢኖሩ፣ የምትፈልጉትን ሁሉ ለምኑ፤ ይሆንላችኋልም። ⁸አባቴ የሚከብረው በዚህ ነው፤ ብዙ ፍሬ ብታፈሩና ደቀ መዛሙርቴ መሆናችሁን ብታረጋግጡ ነው።

⁹“አብ እንደ ወደደኝ፣ እኔም እንዲሁ ወደድኋችሁ። በፍቅሬ ኑሩ። ¹⁰ትእዛዛቴን ብትጠብቁ፣ እኔ የአባቴን ትእዛዛት ጠብቄ በፍቅሩ እንደምኖር፣ እናንተም በፍቅሬ ትኖራላችሁ። ¹¹ደስታዬ በእናንተ እንዲሆንና ደስታችሁም እንዲሞላ ይህን ነገርኋችሁ።

¹²“ትእዛዜ ይህ ነው፤ እኔ እንደ ወደድኋችሁ እናንተም እርስ በርሳችሁ ተዋደዱ። ¹³ነፍሱን ስለ ወዳጆቹ ከመስጠት የሚበልጥ ፍቅር ያለው ማንም የለም። ¹⁴የማዝዛችሁን ብታደርጉ ወዳጆቼ ናችሁ። ¹⁵ከእንግዲህ ባሪያዎች ብዬ አልጠራችሁም፤ ባሪያ ጌታው የሚያደርገውን አያውቅምና። ከአባቴ የሰማሁትን ሁሉ ስለ ገለጥሁላችሁ ወዳጆች ብዬ ጠራኋችሁ። ^a a v15 ኢየሱስ ከአባቱ የሰማውን ሁሉ በማካፈል ደቀ መዛሙርቱን ከባሪያነት ወደ ወዳጅነት ያሸጋግራል፤ ይህም ለእያንዳንዱ አንባቢ የአባት የልብ ዓላማ ነው፤ በወልድ በኩል የሚገኝ ወዳጅነት። ¹⁶እናንተ አልመረጣችሁኝም፤ እኔ ግን መረጥኋችሁ፤ ሄዳችሁም ጸንቶ የሚኖር ፍሬ እንድታፈሩ ሾምኋችሁ፤ ስለዚህ አብን በስሜ የምትለምኑትን ሁሉ ይሰጣችኋል። ¹⁷የማዝዛችሁ ይህ ነው፤ እርስ በርሳችሁ ተዋደዱ።

ዓለም በሚጠላችሁ ጊዜ

¹⁸“ዓለም ቢጠላችሁ፣ ከእናንተ በፊት እኔን እንደ ጠላኝ እወቁ። ¹⁹ከዓለም ብትሆኑ ኖሮ ዓለም የራሱ እንደ መሆናችሁ ይወዳችሁ ነበር። እናንተ ግን ከዓለም አይደላችሁም፤ ይልቁንም እኔ ከዓለም መረጥኋችሁ፤ ስለዚህ ዓለም ይጠላችኋል። ²⁰የነገርኋችሁን አስታውሱ፤ ባሪያ ከጌታው አይበልጥም። እኔን አሳደው ከሆነ፣ እናንተንም ያሳድዳሉ፤ ቃሌን ጠብቀው ከሆነ፣ የእናንተንም ይጠብቃሉ። ²¹ነገር ግን የላከኝን ስለማያውቁ፣ ይህን ሁሉ ስለ ስሜ ያደርጉባችኋል። ²²መጥቼ ባልነገርኋቸው ኖሮ ኀጢአት ባልሆነባቸውም ነበር፤ አሁን ግን ለኀጢአታቸው ምክንያት የላቸውም። ²³እኔን የሚጠላ አባቴንም ይጠላል። ²⁴ማንም ሌላ ያላደረገውን ሥራ በመካከላቸው ባላደረግሁ ኖሮ ኀጢአት ባልሆነባቸውም ነበር። አሁን ግን እኔንም አባቴንም አይተው ጠልተዋል። ²⁵ነገር ግን ይህ የሆነው በሕጋቸው ተጽፎ የሚገኘው፣ ‘ያለ ምክንያት ጠሉኝ’ የሚለው ቃል ይፈጸም ዘንድ ነው።

²⁶“ከአብ ዘንድ የምልክላችሁ አጽናኙ በሚመጣ ጊዜ፣ እርሱም ከአብ የሚወጣው የእውነት መንፈስ፣ ስለ እኔ ይመሰክራል። ^b b v26 ኢየሱስ ተስፋ የሰጠው አጽናኝ መንፈስ ቅዱስ ነው፤ ከአብ ዘንድ በኢየሱስ የሚላክ ሲሆን፣ ኢየሱስ የገለጠውን ሁሉ ደቀ መዛሙርቱን ስለሚመራ እዚህ “የእውነት መንፈስ” ተብሎ ተጠርቷል።

²⁷“እናንተም ከመጀመሪያው ከእኔ ጋራ ስለ ነበራችሁ ትመሰክራላችሁ።”