ሕዝቅኤል 14

14 ¹ከዚያም ከእስራኤል ሽማግሌዎች አንዳንዶቹ ወደ እኔ መጥተው በፊቴ ተቀመጡ። ²የአባታችንም ቃል ወደ እኔ መጣ፤

³የሰው ልጅ ሆይ፣ እነዚህ ሰዎች ጣዖቶቻቸውን በልባቸው ውስጥ አኑረዋል፤ የበደላቸውንም መሰናክል በፊታቸው አኑረዋል። ታዲያ ፈጽሞ እንዲያማክሩኝ ልፈቅድላቸውን? ⁴ስለዚህ እንዲህ ብለህ ተናገራቸው፤ ንገራቸውም፤ ጌታ አባት እንዲህ ይላል፤ ከእስራኤል ቤት ማንም ሰው ጣዖቶቹን በልቡ ውስጥ ቢያኖር፣ የበደሉንም መሰናክል በፊቱ ቢያኖር፣ ከዚያም ወደ ነቢዩ ቢመጣ፣ እኔ አባታችሁ እንደ ጣዖቶቹ ብዛት ራሴ እመልስለታለሁ፤ ⁵ይህም ሁሉ በጣዖቶቻቸው ከእኔ የራቁትን የእስራኤልን ቤት ልቦች ልይዝ ነው።

⁶ስለዚህ የእስራኤልን ቤት እንዲህ ብለህ ንገር፤ ጌታ አባት እንዲህ ይላል፤ “ንስሐ ግቡ! ከጣዖቶቻችሁ ተመለሱ፤ ፊታችሁንም ከአስጸያፊ ነገሮቻችሁ ሁሉ መልሱ። ⁷ከእስራኤል ማንም ሰው ወይም በእስራኤል የሚኖር መጻተኛ ከእኔ ተለይቶ፣ ጣዖቶችን በልቡ አኑሮ፣ የበደሉን መሰናክል በፊቱ አኑሮ፣ ከዚያም ያማክረኝ ዘንድ ወደ ነቢይ ቢመጣ፣ እኔ አባታችሁ ራሴ እመልስለታለሁ። ⁸ፊቴንም በዚያ ሰው ላይ አዞራለሁ፤ ምልክትና ምሳሌም አደርገዋለሁ፤ ከሕዝቤም መካከል አስወግደዋለሁ። ያን ጊዜ እኔ አባታችሁ እንደ ሆንሁ ታውቃላችሁ።

⁹ነቢዩም አንዳች ቃል እንዲናገር ቢታለል፣ ያን ነቢይ እኔ አባታችሁ አታልዬዋለሁ፤ እጄንም በእርሱ ላይ ዘርግቼ ከሕዝቤ ከእስራኤል መካከል አጠፋዋለሁ። ¹⁰በደላቸውንም ይሸከማሉ፤ የጠያቂው በደል እንደ ነቢዩ በደል ይሆናል፤ ¹¹ይህም የእስራኤል ቤት ከእንግዲህ ከእኔ እንዳይስቱ፣ በዐመፃቸውም ሁሉ ራሳቸውን እንዳያረክሱ ነው። እነርሱም ልጆቼ ይሆናሉ፤ እኔም አባታቸው እሆናለሁ፤ ይላል ጌታ አባት።”

የአባታችን አራት አስፈሪ ፍርዶች

¹²የአባታችንም ቃል ወደ እኔ መጣ፤

¹³የሰው ልጅ ሆይ፣ አንድ አገር ታማኝ ባለመሆን በእኔ ላይ ኀጢአት ቢሠራ፣ እጄን በእርሱ ላይ ዘርግቼ የእንጀራ ድጋፉን አጠፋለሁ፤ ራብንም እሰድድበታለሁ፤ ሰውንና እንስሳንም ከእርሱ አጠፋለሁ፤ ¹⁴እነዚህ ሦስት ሰዎች፣ ኖኅ፣ ዳንኤልና ኢዮብ፣ በዚያ አገር ቢኖሩ፣ በጽድቃቸው ራሳቸውን ብቻ ያድናሉ፤ ይላል ጌታ አባት።

¹⁵ወይም በዚያ አገር የዱር አራዊትን ብሰድድ፣ እነርሱም ሕዝቡን አጥፍተው ባድማ ቢያደርጉት፣ ከአራዊቱም የተነሣ የሚያልፍበት ባይኖር፣ ¹⁶ሕያው እኔ ነኝና፣ ይላል ጌታ አባት፣ እነዚህ ሦስት ሰዎች በዚያ ቢኖሩ እንኳ፣ ወንዶችንም ሆነ ሴቶች ልጆችን ማዳን አይችሉም። እነርሱ ብቻ ይድናሉ፤ አገሩ ግን ባድማ ይሆናል።

¹⁷ወይም በዚያ አገር ላይ ሰይፍን ባመጣ፣ ‘ሰይፍ በአገሩ ያልፍ’ ብዬም ሰውንና እንስሳን ከእርሱ ባጠፋ፣ ¹⁸ሕያው እኔ ነኝ፣ ይላል ጌታ አባት፣ እነዚህ ሦስት ሰዎች በዚያ ቢኖሩ እንኳ፣ ወንዶችንም ሆነ ሴቶች ልጆችን ማዳን አይችሉም፤ እነርሱ ብቻ ይድናሉ።

¹⁹ወይም በዚያ አገር ላይ ቸነፈርን ብሰድድ፣ ሰውንና እንስሳን ከእርሱ ለማጥፋት ቍጣዬን በደም ባፈስስበት፣ ²⁰ሕያው እኔ ነኝና፣ ይላል ጌታ አባት፣ ኖኅ፣ ዳንኤልና ኢዮብ በዚያ ቢኖሩ እንኳ፣ ወንድ ወይም ሴት ልጅን ማዳን አይችሉም፤ በጽድቃቸው ራሳቸውን ብቻ ነው የሚያድኑት።

²¹ጌታ አባት እንዲህ ይላል፤ ሰውንና እንስሳን ለማጥፋት አራቱን አስፈሪ ፍርዶቼን፣ ሰይፍን፣ ራብን፣ የዱር አራዊትንና ቸነፈርን በኢየሩሳሌም ላይ በምሰድድበት ጊዜ እንዴት የባሰ ይሆን! ²²ነገር ግን በዚያ የሚተርፉ ይኖራሉ፤ የሚወጡ ወንዶችና ሴቶች ልጆች። ወደ አንተም ይወጣሉ፤ መንገዳቸውንና ሥራቸውንም ባየህ ጊዜ፣ በኢየሩሳሌም ላይ ስላመጣሁት መቅሰፍት፣ በእርሷም ላይ ስላመጣሁት ሁሉ ትጽናናለህ። ²³አካሄዳቸውንና ሥራቸውን ባየህ ጊዜ ያጽናኑሃል፤ በዚያም ያደረግሁትን ሁሉ ያለ ምክንያት እንዳላደረግሁ ታውቃለህ፤ ይላል ጌታ አባት።