以西結書 14

14 ¹有幾個以色列嘅長老嚟到我度,坐喺我面前。 ²我哋嘅父嘅話臨到我,話:

³人子啊,呢啲人已經將佢哋嘅偶像接咗入自己心裏面,又將令佢哋跌倒犯罪嘅絆腳石擺喺自己面前。我豈可以俾佢哋嚟求問我呢? ⁴所以你要對佢哋講,同佢哋話:至高無上嘅父咁講:凡以色列家嘅人,將佢嘅偶像接咗入心裏面,又將令佢跌倒犯罪嘅絆腳石擺喺自己面前,然後嚟到先知度,我——你哋嘅父——就必親自照佢眾多嘅偶像回答佢, ⁵為咗要奪回以色列家嘅心,佢哋全都因住偶像離棄咗我。

⁶所以你要對以色列家講:至高無上嘅父咁講:「你哋要悔改!離棄你哋嘅偶像,將你哋嘅臉轉離一切你哋所憎惡嘅嘢。 ⁷凡以色列人,或者寄居喺以色列嘅外族人,離棄咗我,將偶像接咗入心裏面,又將自己嘅絆腳石擺喺面前,然後嚟到先知度求問我,我——你哋嘅父——就必親自回答佢。 ⁸我要向嗰個人變臉,使佢成為一個記號同一句諺語;我要將佢從我子民中剪除。噉你哋就會知道我係你哋嘅父。

⁹如果先知被引誘講咗一句話,係我——你哋嘅父——引誘咗嗰個先知;我要伸手攻擊佢,將佢從我子民以色列中滅絕。 ¹⁰佢哋必要擔當自己嘅罪——求問嘅人嘅罪同先知嘅罪一樣, ¹¹為咗要令以色列家唔再離開我流蕩,唔再用佢哋一切嘅悖逆玷污自己。佢哋要做我嘅兒女,我要做佢哋嘅父,呢個係至高無上嘅父宣告嘅。」

父嘅四個可怕審判

¹²我哋嘅父嘅話臨到我,話:

¹³人子啊,如果一個地方因住不忠得罪我,我就伸手攻擊佢,斷絕佢嘅糧食供應,俾饑荒臨到佢,將人同牲畜都從佢當中剪除, ¹⁴就算有呢三個人——挪亞、但以理、約伯——喺當中,佢哋亦都只可以憑住自己嘅義救返自己,呢個係至高無上嘅父宣告嘅。

¹⁵又或者我使野獸經過嗰地,搞到佢冇晒人、變成荒涼,因住啲野獸,冇人敢經過, ¹⁶我指住我嘅永生起誓,呢個係至高無上嘅父宣告嘅,就算呢三個人喺當中,佢哋都救唔到自己嘅仔女。只有佢哋自己得救,個地就荒涼晒。

¹⁷又或者我使刀劍臨到嗰地,話:『俾刀劍經過嗰地,』將人同牲畜都從佢當中剪除, ¹⁸我指住我嘅永生起誓,呢個係至高無上嘅父宣告嘅,就算呢三個人喺當中,佢哋都救唔到自己嘅仔女;只有佢哋自己得救。

¹⁹又或者我使瘟疫臨到嗰地,用血傾倒我嘅烈怒喺佢身上,將人同牲畜都從佢當中剪除。 ²⁰我指住我嘅永生起誓,呢個係至高無上嘅父宣告嘅,就算挪亞、但以理、約伯喺當中,佢哋都救唔到自己嘅仔女;只可以憑住自己嘅義救返自己。

²¹至高無上嘅父咁講:當我打發我四個可怕嘅審判——刀劍、饑荒、野獸同瘟疫——臨到耶路撒冷,將人同牲畜都剪除,情況豈不係更加嚴重嗎! ²²但係當中仍然會有生還者,有啲仔女會被帶出嚟。佢哋會出到嚟你度,你見到佢哋嘅行為同作為,你就會因住我降喺耶路撒冷嘅災禍——就係我加喺佢身上嘅一切——得到安慰。 ²³當你見到佢哋嘅行為同作為,佢哋就會安慰你,噉你就會知道我喺嗰度所做嘅一切,冇一樣係無緣無故嘅,呢個係至高無上嘅父宣告嘅。