Ezekieli 14

14 ¹Ndipo baadhi ya wazee wa Israeli wakaja kwangu, wakaketi mbele yangu. ²Neno la Baba yetu likanijia, kusema:

³Mwana wa Adamu, watu hawa wamezichukua sanamu zao mioyoni mwao, nao wameweka kikwazo cha hatia yao mbele yao kabisa. Je, niwaache waniulize hata kidogo? ⁴Basi sema nao, uwaambie: Baba Mwenye Enzi asema hivi: Mtu yeyote wa nyumba ya Israeli achukuaye sanamu zake moyoni mwake, na kuweka kikwazo cha hatia yake mbele yake, kisha akamwendea nabii, Mimi Baba yako, nitamjibu mwenyewe kwa kadiri ya wingi wa sanamu zake, ⁵ili nipate kuinasa mioyo ya nyumba ya Israeli, ambao wote wamenigeuzia kisogo kwa ajili ya sanamu zao.

⁶Kwa hiyo iambie nyumba ya Israeli: Baba Mwenye Enzi asema: "Tubuni! Geukeni mwache sanamu zenu, mgeuze nyuso zenu mbali na machukizo yenu yote. ⁷Mwisraeli yeyote, au mgeni akaaye Israeli, ajitengaye nami, akazichukua sanamu moyoni mwake, akaweka kikwazo cha hatia yake mbele yake, kisha akamwendea nabii ili aniulize, Mimi Baba yako, nitamjibu mwenyewe. ⁸Nitauelekeza uso wangu dhidi ya mtu huyo, nami nitamfanya kuwa ishara na mithali; nitamkatilia mbali na watu wangu. Ndipo mtakapojua ya kuwa Mimi ndimi Baba yenu.

⁹Kama nabii akishawishika kunena neno, Mimi Baba yako, ndiye niliyemshawishi nabii huyo; nami nitaunyoosha mkono wangu dhidi yake, nimwangamize kutoka miongoni mwa watu wangu Israeli. ¹⁰Nao watachukua hatia yao—hatia ya yule aulizaye itakuwa sawa na ile ya nabii, ¹¹ili nyumba ya Israeli isipotoke tena mbali nami, wala wasijitie unajisi kwa uasi wao wote. Nao watakuwa watoto wangu, nami nitakuwa Baba yao, asema Baba Mwenye Enzi."

Hukumu Nne za Kutisha za Baba

¹²Neno la Baba yetu likanijia, kusema:

¹³Mwana wa Adamu, nchi ikinitenda dhambi kwa kukosa uaminifu, nami nikaunyoosha mkono wangu dhidi yake nikakatilia mbali riziki yake ya chakula, nikaipeleka njaa, nikawakatilia mbali watu na wanyama, ¹⁴kama watu hawa watatu—Nuhu, Danieli, na Ayubu—wangekuwamo ndani yake, wangejiokoa nafsi zao tu kwa haki yao, asema Baba Mwenye Enzi.

¹⁵Au kama nikipeleka wanyama wakali katika nchi ile, nao wakaiacha ukiwa isiyo na watu, wala mtu hapiti kwa sababu ya wanyama hao, ¹⁶kama niishivyo, asema Baba Mwenye Enzi, hata kama watu hawa watatu wangekuwamo ndani yake, wasingeweza kuwaokoa wana wala binti. Wao peke yao wangeokoka, bali nchi ingesalia ukiwa.

¹⁷Au kama nikileta upanga juu ya nchi ile, nikasema, 'Upanga na upite katikati ya nchi,' nikiwakatilia mbali watu na wanyama toka humo, ¹⁸kama niishivyo, asema Baba Mwenye Enzi, hata kama watu hawa watatu wangekuwamo ndani yake, wasingeweza kuwaokoa wana wala binti; wao peke yao ndio wangeokoka.

¹⁹Au kama nikipeleka tauni katika nchi ile, nikamwaga ghadhabu yangu juu yake kwa damu, ili kuwakatilia mbali watu na wanyama toka humo. ²⁰Kama niishivyo hakika, asema Baba Mwenye Enzi, hata kama Nuhu, Danieli, na Ayubu wangekuwamo ndani yake, wasingeweza kumwokoa mwana wala binti; ila nafsi zao tu, kwa haki yao.

²¹Baba Mwenye Enzi asema hivi: Je, si vibaya zaidi nitakapopeleka hukumu zangu nne za kutisha—upanga, njaa, wanyama wakali, na tauni—juu ya Yerusalemu ili kuwakatilia mbali watu na wanyama! ²²Lakini watabaki ndani yake walionusurika, wana na binti watakaotolewa. Nao watakuja kwenu, na mtakapoziona njia zao na matendo yao, mtafarijika kuhusu ile maafa niliyoileta juu ya Yerusalemu—yote niliyoyaleta juu yake. ²³Nao watakufarijini mtakapoziona tabia zao na matendo yao, nanyi mtajua ya kuwa sikutenda humo neno lolote pasipo sababu, asema Baba Mwenye Enzi.