ሕዝቅኤል 13

13 ¹የአባታችን ቃል እንዲህ ሲል ወደ እኔ መጣ፤

²“የሰው ልጅ ሆይ፣ ትንቢት በሚናገሩ በእስራኤል ነቢያት ላይ ትንቢት ተናገር፤ ከገዛ ልባቸው ትንቢት የሚናገሩትንም እንዲህ በላቸው፦ የአባታችንን ቃል ስሙ! ³ጌታ አባታችን እንዲህ ይላል፦ የገዛ መንፈሳቸውን የሚከተሉ፣ ነገር ግን ምንም ያላዩ ሞኝ ነቢያት ወዮላቸው! ⁴እስራኤል ሆይ፣ ነቢያትህ በፍርስራሽ መካከል እንዳሉ ቀበሮዎች ናቸው። ⁵ወደ ክፍተቶቹ አልወጣችሁም፤ የእስራኤልም ቤት በአባታችን ቀን በሚደረገው ውጊያ ጸንቶ እንዲቆም ቅጥር አልሠራችሁም። ⁶ሐሰተኛ ራእይና የውሸት ሟርት ያያሉ፤ አባታችን ሳይልካቸው፣ ‘እግዚአብሔር እንዲህ ይላል’ ይላሉ፤ ነገር ግን ቃላቸው ይጸና ዘንድ ተስፋ ያደርጋሉ። ^a a v6 እነዚህ ነቢያት ፈጽሞ ባልሰጣቸው ቃላት ላይ የአብን ስም ይጠራሉ፤ ይህም እውነተኛ ድምፁ ሳይሆን፣ በሥልጣኑ ላይ የቀረበ የተጭበረበረ የይገባኛል ጥያቄ ነው። ⁷እኔ ሳልናገር፣ ‘አባታችን እንዲህ ይላል’ ባላችሁ ጊዜ ሐሰተኛ ራእይ አላያችሁምን? የውሸትስ ሟርት አልተናገራችሁምን?

⁸ስለዚህ ጌታ አባታችን እንዲህ ይላል፦ ሐሰትን ስለ ተናገራችሁ፣ ውሸትንም ስላያችሁ፣ እኔ በእናንተ ላይ ነኝ፤ ይላል ጌታ አባታችን። ⁹እጄ ሐሰተኛ ራእይ በሚያዩና ውሸትን በሚተነብዩ ነቢያት ላይ ነው። በሕዝቤ ጉባኤ ውስጥ አይሆኑም፤ በእስራኤልም መዝገብ አይጻፉም፤ ወደ እስራኤልም ምድር አይገቡም። ያን ጊዜ እኔ ጌታ አባታችን እንደ ሆንሁ ታውቃላችሁ።

¹⁰“አዎን፣ ሰላም በሌለበት ‘ሰላም’ እያሉ ሕዝቤን ስላሳቱ፤ አንድ ሰው ደካማ ቅጥር ሲሠራ፣ እነርሱ በኖራ ይቀቡታል። ¹¹በኖራ ለሚቀቡት ቅጥሩ እንደሚወድቅ ንገራቸው። የሚያጥለቀልቅ ዝናብ ይመጣል፤ የበረዶ ድንጋይ ይወርዳል፤ ዐውሎ ነፋስም ይነሣል። ¹²ቅጥሩ በሚወድቅበት ጊዜ፣ ‘የቀባችሁበት ኖራ የት አለ?’ ተብላችሁ አትጠየቁምን?

¹³ስለዚህ ጌታ አባታችን እንዲህ ይላል፦ በመዓቴ ዐውሎ ነፋስን አሰማራለሁ፤ በቍጣዬ የሚያጥለቀልቅ ዝናብ፣ በመቅሠፍቴም ለማጥፋት የበረዶ ድንጋይ አወርዳለሁ። ¹⁴በኖራ የቀባችሁትን ቅጥር አፈርሳለሁ፤ መሠረቱም እስኪገለጥ ድረስ ከመሬት ጋራ አስተካክለዋለሁ። ይወድቃል፤ በውስጡም ትጠፋላችሁ። ያን ጊዜ እኔ አባታችሁ እንደ ሆንሁ ታውቃላችሁ። ¹⁵እንግዲህ ቍጣዬን በቅጥሩና በኖራ በቀቡት ላይ እጨርሳለሁ። እንዲህም እላችኋለሁ፦ ቅጥሩ ጠፍቷል፤ የቀቡትም የሉም። ¹⁶ስለ ኢየሩሳሌም ትንቢት የተናገሩ፣ ሰላም በሌለበትም ጊዜ ስለ እርስዋ የሰላም ራእይ ያዩ የእስራኤል ነቢያት እነዚህ ናቸው፤ ይላል ጌታ አባታችን።

¹⁷“አንተም የሰው ልጅ ሆይ፣ ከገዛ ልባቸው ትንቢት በሚናገሩ በሕዝብህ ሴቶች ላይ ፊትህን አቅና፤ በእነርሱም ላይ ትንቢት ተናገር። ¹⁸እንዲህም በል፦ ጌታ አባታችን እንዲህ ይላል፦ ነፍሳትን ለማጥመድ በእጅ አንጓ ሁሉ ላይ አስማተኛ ማሰሪያ ለሚሰፉ፣ ለማንኛውም መጠን ራስ መሸፈኛ ለሚሠሩ ሴቶች ወዮላቸው! የሕዝቤን ነፍሳት ታጠምዳላችሁ፤ የገዛ ራሳችሁንስ በሕይወት ታኖራላችሁን? ¹⁹ስለ እፍኝ ገብስና ስለ ፍርፋሪ እንጀራ ብላችሁ፣ ውሸትን ለሚያዳምጥ ሕዝቤ በመዋሸት፣ መሞት የሌለባቸውን ነፍሳት እየገደላችሁ፣ መኖር የሌለባቸውንም ነፍሳት በሕይወት እያስቀራችሁ፣ በሕዝቤ መካከል አረከሳችሁኝ።

²⁰ስለዚህ ጌታ አባታችን እንዲህ ይላል፦ ነፍሳትን እንደ ወፎች በምታጠምዱበት በአስማተኛ ማሰሪያችሁ ላይ እኔ ነኝ። ከክንዶቻችሁም ላይ እገነጥላቸዋለሁ፤ እንደ ወፎች ያጠመዳችኋቸውንም ነፍሳት እፈታለሁ። ²¹መሸፈኛዎቻችሁን እገነጥላለሁ፤ ሕዝቤንም ከእጃችሁ አድናለሁ፤ ከእንግዲህም በእጃችሁ ምርኮ አይሆኑም። ያን ጊዜ እኔ አባታችሁ እንደ ሆንሁ ታውቃላችሁ። ²²እኔ ኀዘን ባላደረስሁበት ጊዜ ጻድቁን በውሸት ተስፋ ስላስቆረጣችሁ፣ ክፉውንም ሕይወቱን ለማዳን ከክፉ መንገዱ እንዳይመለስ ስላበረታታችሁ፣ ²³ከእንግዲህ ሐሰተኛ ራእይ አታዩም፤ ሟርትም አትሠሩም። ሕዝቤን ከእጃችሁ አድናለሁ፤ እኔም አባታችሁ እንደ ሆንሁ ታውቃላችሁ።”