Uba Ya Fallasa Annabawan Ƙarya

Annabawan da suke ƙirƙirar wahayinsu ne ake nufi. Suna cewa salama inda babu ita, suna shafa farar ƙasa a kan garu marar ƙarfi wanda Ubanmu ya yi alkawari zai rushe shi da hadari. Aka faɗa wa matan da suke ɗaure layu a wuyan hannu don su kama mutane cewa za a yayyage layun.

Babi na 13.

Maganar Ubanmu ta zo mini,

“Ɗan Mutum, ka yi annabci game da annabawan Isra'ila masu yin annabci, ka kuma ce wa waɗanda suke yin annabci bisa ga zuciyarsu, ku ji maganar Ubanmu! Uba Mai Iko Duka ya ce, Kaito ga wawayen annabawan da suke bin ruhunsu, waɗanda kuma ba su ga kome ba! Ya Isra'ila, annabawanka suna kama da diloli a cikin kango. Ba ku hau zuwa wuraren da suka rushe ba, ba ku kuma gina katanga wa gidan Isra'ila ba, don su tsaya daram a yaƙi a ranar Ubanmu. Suna ganin wahayin ƙarya da duban ƙarya, suna cewa, ‘In ji Allah,’ alhali kuwa Ubanmu bai aike su ba—duk da haka suna sa rai a tabbatar da maganarsu. ^a Ba wahayin ƙarya kuka gani ba, ba kuma duban ƙarya kuka faɗa ba, sa'ad da kuka ce, ‘In ji Ubanmu,’ alhali kuwa ban taɓa magana ba?

Saboda haka ga abin da Uba Mai Iko Duka ya ce, Domin kun faɗi ƙarya kun kuma ga wahayin ƙarya, ina gāba da ku—in ji Uba Mai Iko Duka. Hannuna yana gāba da annabawan da suke ganin wahayin ƙarya suke kuma faɗar ƙarya. Ba za su kasance a cikin majalisar mutanena ba, ba kuma za a rubuta su a littafin Isra'ila ba, ba kuma za su shiga ƙasar Isra'ila ba. Sa'an nan za ku sani ni ne Uba Mai Iko Duka.

“I, domin sun ɓatar da mutanena, suna cewa ‘Salama,’ alhali kuwa babu salama; sa'ad da wani ya gina wata katanga marar ƙarfi, sai su shafa mata farar shafawa. Ka gaya wa masu shafa mata farar shafawa cewa za ta fāɗi. Ruwan sama mai ambaliya zai sauko, ƙanƙara za ta fāɗi, iska mai ƙarfi kuma za ta buso. Sa'ad da katangar ta fāɗi, ba za a tambaye ku ba, ‘Ina farar shafawar da kuka shafa mata?’

Saboda haka ga abin da Uba Mai Iko Duka ya ce, Cikin fushina zan saki iska mai ƙarfi, cikin hasalata kuma ruwan sama mai ambaliya, cikin zafin fushina kuma ƙanƙara don halaka. Zan rushe katangar da kuka shafa mata farar shafawa, in kuma baje ta ƙasa, har tushenta yă bayyana. Za ta fāɗi, ku kuma za ku hallaka a cikinta. Sa'an nan za ku sani ni ne Ubanku. Haka zan zubar da fushina a kan katangar da kuma a kan waɗanda suka shafa mata farar shafawa. Zan kuwa gaya muku, Katangar ta ƙare, haka kuma waɗanda suka shafa mata. Wato annabawan Isra'ila da suka yi annabci game da Urushalima, suka kuma ga wahayin salama dominta alhali kuwa babu salama—in ji Uba Mai Iko Duka.

“Kai kuwa, Ɗan Mutum, ka kafa fuskarka gāba da matan mutanenka waɗanda suke yin annabci bisa ga zuciyarsu. Ka yi annabci game da su. Ka ce, Uba Mai Iko Duka ya ce, Kaito ga matan da suke dinka ɗamarun sihiri a kan kowane wuyan hannu, suke kuma yin lulluɓai domin kawuna na kowane irin tsawo don kama rayuka! Za ku kama rayukan mutanena, ku kuma kiyaye rayukanku da rai? Kun ƙazantar da ni a cikin mutanena saboda 'yan tafukan sha'ir da gutsattsarin burodi, kuna kashe rayukan da bai kamata su mutu ba, kuna kuma bar rayukan da bai kamata su rayu ba da rai, ta wurin yin ƙarya ga mutanena masu sauraren ƙarya.

Saboda haka Uba Mai Iko Duka ya ce, Ina gāba da ɗamarunku na sihiri da kuke kama rayuka kamar tsuntsaye da su. Zan tsiga su daga hannuwanku, in kuma 'yantar da rayukan da kuke kama kamar tsuntsaye. Zan tsage lulluɓanku, in kuma ceci mutanena daga hannuwanku; ba kuwa za su ƙara zama kamun ganima a hannuwanku ba. Sa'an nan za ku sani ni ne Ubanku. Domin kun karya zuciyar mai adalci da ƙarya, alhali ni ban kawo masa baƙin ciki ba, kun kuma ƙarfafa mugu kada yă juya daga mugunyar hanyarsa domin yă ceci ransa, saboda haka ba za ku ƙara ganin wahayin ƙarya ba, ba kuma za ku ƙara yin duba ba. Zan ceci mutanena daga hannuwanku, za ku kuma sani ni ne Ubanku.”