Toogu Kwanda Maotik che po Lembech
Ko maotik che suubei kabuusennywa icheegei. Mwaei kalya ole ma mi kalya, ak koluulei koriito ne kobetak koek ne lalei, ne yanjei Kwandanyo kobar eng' usoonet ne oo. Ak chepyoosok che tuche charunee eng' eunek si kokwar piik, keleenji kole keng'etchini charunechuuto.
Ng'alaali Kwandanyo eng' mustarisyek 2–23
13 1Ki ityi ng'olyootap Kwandanyo anee, kole:
2“Weeriitap chii, maoten agobo maotigap Israel che maoteni, ak ileenji che maoteni kobun muguleldanywa: Ogas ng'olyootap Kwandanyo! 3Mwaei Kiptaiyat Kwanda kole: Pwo eng' maotik che perber che suubei kabuusennywa icheegei ago che ma kigeer kiy age tugul! 4Israel, maotiguk ko uu lelwek che mi karatwek. 5Ma otogoste oldo che kobetak koriito, ak ma oteeche koriito agobo kootap Israel, si kotonon eng' lugeet eng' peetuutap Kwandanyo. 6Keerei icheek ng'ang'utik che po lembech ak ng'oorset ne po lembech, koleenji, ‘Mwaei Kamuktaindet,’ ago ma kiyookto icheek Kwandanyo—ago igen icheek kole kigimit ng'aleekwak. a a v6 Guurei maotichu kainetap Kwanda eng' ng'aleek che ma kigoonchi icheek—ko weekutyet ne po lembech agobo kimnateennyi, ma kutiinnyi ne po iman. 7Tos ma kigeer ng'ang'utyet ne po lembech ak kimwa ng'oorset ne po lembech, ye kimwae, ‘Mwaei Kwandanyo,’ ago ma ang'alaal anee?
8Mwaei anyun Kiptaiyat Kwanda kole: Amu kimwae lembech ak kigeer lembechek, atononchinigei okweek—mwaei Kiptaiyat Kwanda. 9Tononchini eunnyu maotik che keerei ng'ang'utik che po lembech ak che ng'oorse lembech. Ma komi icheek kapkirwoogetap piiguk, ak ma kisir eng' sirutyetap kootap Israel, ak ma kochut emetap Israel. Yeityo onai ole aa Kiptaiyat Kwanda.
10“Ee, amu ki kobetos piiguk, koleenji, ‘Kalya,’ ago ma mi kalya; ngo teech chiito koriito ne ma kagim, komale eng' malyeet ne leel. 11Leenji che male eng' malyeet ne leel kole koputi. Nyo ropta ne oo, koputi koigap ropta, ak komong' usoonet ne po kimnateet. 12Ye koputi koriito, tos ma kitebewok, ‘Mi ano malyeet ne kimale?’
13Mwaei anyun Kiptaiyat Kwanda kole: Ayookto usoonet ne po kimnateet eng' nereegekyuk, ak ropta ne oo eng' angeennyu, ak koigap ropta eng' ng'wanindanyu si king'em. 14Aluuli koriito ne kimale eng' malyeet ne leel, ak ariribi agoi ng'wony, si kotook lumdaennyi. Koputi, ak opetok eng' kwenunnyi. Yeityo onai ole aa Kwandang'wong'. 15Aiisoogu anyun angeennyu agobo koriito ak agobo che male eng' malyeet ne leel. Aleenjin, Kabeeten koriito, ak icheek che male. 16Maotigap Israel che ki maoteni agobo Jerusalem ak che ki keerei ng'ang'utik che po kalya agobo ineendet ago ma mi kalya—mwaei Kiptaiyat Kwanda.
17“Ak inyee, Weeriitap chii, tononchini taing'ung' kwonyiik che po piiguk che maoteni kobun muguleldanywa. Maoten agobo icheek. 18Mwa, Mwaei Kiptaiyat Kwanda kole: Pwo eng' kwonyiik che chigole ratuutik che po sageiywek eng' kurereetap eut age tugul, ak che yae ngoroigap met agobo koindo age tugul si koriim saboonik! Tos oriime saboondap piiguk, ak osob saboonwekwok? 19Ki omurwon anee eng' kwenutap piiguk agobo eunegap baale ak koskolenyigap kimnyet, kobar saboonik che ma nyolu komeyo ak kosar saboonik che ma nyolu kosob, eng' lembech eng' piiguk che kase lembechek.
20Mwaei anyun Kiptaiyat Kwanda kole: Atononchinigei ratuutikwok che po sageiywek che oriime saboonik ko uu toriitik. Aluuli icheek eng' eunekwok ak abis saboonik che oriime ko uu toriitik. 21Aluuli ngoroigap metikwok ak asar piiguk eng' eunekwok; ma koegu kogeny ko uu tiongik che kaariim eng' eunekwok. Yeityo onai ole aa Kwandang'wong'. 22Amu kinyalil muguleldap chiito ne po iman eng' lembech, ago ma kayanchi anee choteet; ak ki okimit kiptengeginik si mata koweigei eng' ooreennyi ne ya si kosar saboondanyi, 23noonaa ma kogeer kogeny ng'ang'utik che po lembech, ak ma oboisyee ng'oorset kogeny. Asar piiguk eng' eunekwok, ak onai ole aa Kwandang'wong'.”