ኣቦ ንጣዖተኛ ልብታት ይገንሕ

ዓበይቲ ጣዖታቶም ናብ ልቦም ኣእትዮም ክማኸርዎ መፁ፥ ኣቦና ኸዓ ከም ብዝሒ እቲ ጣዖታት ከም ዝምልሰሎም በለ። ኖህን ዳንኤልን ኢዮብን እኳ፥ ኣብ በዳሊት ምድሪ ኾይኖም፥ ንነፍሶም ጥራሕ ምደሓኑ። ብፅድቂ ኻልእ ሰብ ዝድሕን ሓደ እኳ የለን።

ምዕራፍ 14።

ሽዑ ገሊኦም ዓበይቲ እስራኤል ናባይ መፂኦም ኣብ ቅድመይ ተቐመጡ። ቃል ኣቦናውን ናባይ መፀ፦

ኦ ወዲ ሰብ፥ እዞም ሰባት እዚኣቶም ጣዖታቶም ናብ ልቦም ኣእትዮም፥ መዐንቀፊ በደሎም ከዓ ኣብ ቅድሚኦም ብቐጥታ ኣንበሮም ኣለዉ። ፈፂመ ክጥይቑኒ ክሓድጎምዶ እየ? ስለዙይ ተዛረቦም እሞ ከምዙይ በሎም፦ እቲ ልዑል ኣቦ ከምዙይ ይብል፦ ካብ ቤት እስራኤል ዝኾነ ሰብ ጣዖታቱ ናብ ልቡ ኣእትዩ፥ መዐንቀፊ በደሉ ኣብ ቅድሚኡ ኣንቢሩ፥ ሽዑ ናብ እቲ ነቢይ እንተ መፀ፥ ኣነ ኣቦኻትኩም ባዕለይ ከም ብዝሒ ጣዖታቱ ክምልሰሉ እየ፥ ነቶም ኩሎም ብጣዖታቶም ካባይ ዝረሓቑ ቤት እስራኤል ብልቦም ክሕዝ ምእንቲ እዩ።

ስለዙይ ንቤት እስራኤል በሎም፦ እቲ ልዑል ኣቦ ከምዙይ ይብል፦ “ተነስሁ! ካብ ጣዖታትኩም ተመለሱ፥ ገፅኩም ከዓ ካብ ኩሉ ርኹስ ነገርኩም መለሱ። ካብ እስራኤል ዝኾነ ሰብ ወይ ኣብ እስራኤል ዝነብር ጓና ካባይ ተፈልዩ፥ ጣዖታት ናብ ልቡ ኣእትዩ፥ መዐንቀፊ በደሉ ኣብ ቅድሚኡ ኣንቢሩ፥ ሽዑ ክጥይቐኒ ናብ ነቢይ እንተ መፀ፥ ኣነ ኣቦኻትኩም ባዕለይ ክምልሰሉ እየ። ገፀይ ኣብ ልዕሊ እቲ ሰብ እቱይ ክገብር እየ፥ ምልክትን መመሰሊን ከዓ ክገብሮ እየ፤ ካብ ህዝበይ ክቆርፆ እየ። ሽዑ ኣነ ኣቦኻትኩም ምዃነይ ክትፈልጡ ኢኹም።

እቲ ነቢይ ቃል ክዛረብ እንተ ተስሓበ፥ ኣነ ኣቦኻትኩም ነቲ ነቢይ እቱይ ኣስሒበዮ፤ ኢደይ ኣብ ልዕሊኡ ዘርጊሐ ከዓ ካብ ማእኸል ህዝበይ እስራኤል ከጥፍኦ እየ። በደሎም ክስከሙ እዮም፤ በደል እቲ ጠያቒ ከም በደል እቲ ነቢይ ማዕረ ክኸውን እዩ፥ ምእንቲ ቤት እስራኤል ደጊም ካባይ ከይስሕቱ፥ ብኩሉ ኽድዓቶም ከዓ ከይረኽሱ፤ ንሳቶም ውሉደይ ክኾኑ እዮም፥ ኣነ ድማ ኣቦኦም ክኸውን እየ፥ ይብል እቲ ልዑል ኣቦ።”

ኣርባዕተ ዘፍርሑ ፍርድታት ኣቦ

ቃል ኣቦናውን ናባይ መፀ፦

ኦ ወዲ ሰብ፥ ሓንቲ ሃገር ብምጥፍፋእ ኣባይ ሓጢኣት እንተ ሰርሐት፥ ኣነ ኢደይ ኣብ ልዕሊኣ ዘርጊሐ ቀለባ ክቆርፅ፥ ጥሜት ክሰደላ፥ ካብኣ ከዓ ሰብን እንስሳን ክቆርፅ እየ፥ እዞም ሰለስተ ሰባት እዚኣቶም፥ ኖህን ዳንኤልን ኢዮብን፥ ኣብኣ እንተ ዝነብሩ፥ ብፅድቆም ንነፍሶም ጥራሕ ምደሓኑ፥ ይብል እቲ ልዑል ኣቦ።

ወይ ኣነ ናብታ ሃገር እቲኣ ኣራዊት በረኻ እንተ ሰዲደ፥ ንሳቶም ከዓ ሰብ ኣልቦ ጌሮም ባድማ እንተ ገበርዋ፥ ካብቲ ኣራዊት ዝተልዓለ ብኣኣ ዝሓልፍ ሰብ እንተ ዘይሃለወ፥ ህያው ከም ዝኾንኩ፥ ይብል እቲ ልዑል ኣቦ፥ እዞም ሰለስተ ሰባት እዚኣቶም ኣብኣ እንተ ዝነብሩ እኳ፥ ኣወዳት ኮነ ኣዋልድ ከድሕኑ ኣይምኸኣሉን። ባዕልቶም ጥራሕ ምደሓኑ፥ እታ ሃገር ግና ባድማ ምኾነት።

ወይ ኣነ ናብታ ሃገር እቲኣ ሰይፊ እንተ ኣምፂአ እሞ ‘ሰይፊ ብምድሪ ይሕለፍ’ እንተ ኢለ፥ ካብኣ ከዓ ሰብን እንስሳን እንተ ቆሪፀ፥ ህያው ከም ዝኾንኩ፥ ይብል እቲ ልዑል ኣቦ፥ እዞም ሰለስተ ሰባት እዚኣቶም ኣብኣ እንተ ዝነብሩ እኳ፥ ኣወዳት ኮነ ኣዋልድ ከድሕኑ ኣይምኸኣሉን፤ ባዕልቶም ጥራሕ ምደሓኑ።

ወይ ናብታ ሃገር እቲኣ መቕሰፍቲ እንተ ሰዲደ፥ ቍጥዓይ ከዓ ብደም ኣብ ልዕሊኣ እንተ ኣፍሰስኩ፥ ካብኣ ሰብን እንስሳን ንምቑራፅ፥ ህያው ከም ዝኾንኩ፥ ይብል እቲ ልዑል ኣቦ፥ ኖህን ዳንኤልን ኢዮብን ኣብኣ እንተ ዝነብሩ እኳ፥ ወዲ ኮነ ጓል ከድሕኑ ኣይምኸኣሉን፤ ብፅድቆም ንነፍሶም ጥራሕ ደኣ ምደሓኑ።

እቲ ልዑል ኣቦ ከምዙይ ይብል፦ ኣርባዕተ ዘፍርሕ ፍርድታተይ፥ ሰይፍን ጥሜትን ኣራዊት በረኻን መቕሰፍትን፥ ሰብን እንስሳን ንምቑራፅ ናብ ኢየሩሳሌም እንተ ሰዲደ፥ ክንደይ ዝገደደ ኽኸውን! ይኹን እምበር፥ ዝተረፉ ኣብኣ ክተርፉ እዮም፥ እቶም ዝወፁ ኣወዳትን ኣዋልድን። ንሳቶም ናባኻትኩም ክወፁ እዮም፥ መንገድታቶምን ግብሮምን ምስ ረኣኹም ከዓ፥ በቲ ኣብ ልዕሊ ኢየሩሳሌም ዘምፃእክዎ መዓት፥ በቲ ኣብ ልዕሊኣ ዘምፃእክዎ ኩሉ፥ ክትፅናንዑ ኢኹም። ኣካይዳኦምን ግብሮምን ምስ ረኣኹም፥ ንሳቶም ከፅናንዑኹም እዮም፥ ኣብኣ ዝገበርክዎ ኩሉ ብዘይ ምኽንያት ከም ዘይኮነ ድማ ክትፈልጡ ኢኹም፥ ይብል እቲ ልዑል ኣቦ።