Hosea 5

5 ¹Ẹ gbọ́ èyí, ẹ̀yin àlùfáà! Ẹ fetí sílẹ̀, ilé Israẹli! Ẹ tẹ́tí sílẹ̀, ilé ọba! Nítorí ìdájọ́ náà jẹ́ fún yín, nítorí ẹ ti jẹ́ ìdẹkùn ní Mispa àti àwọ̀n tí a nà lórí Tabori.

²“Àwọn ọlọ̀tẹ̀ ti jìn jìnnà sínú ìpànìyàn, ṣùgbọ́n èmi yóò bá gbogbo wọn wí. ³Èmi mọ Efraimu, Israẹli kò sì fi ara pamọ́ kúrò lọ́dọ̀ mi; nítorí nísinsìnyí, Efraimu, ìwọ ti ṣe àgbèrè, Israẹli sì ti di aláìmọ́.

⁴“Àwọn iṣẹ́ wọn kì yóò jẹ́ kí wọn padà sọ́dọ̀ Baba wọn, nítorí ẹ̀mí àgbèrè ń bẹ nínú wọn, wọn kò sì mọ Baba wa. ⁵Ìgbéraga Israẹli jẹ́rìí lòdì sí i; Israẹli àti Efraimu kọsẹ̀ nínú ẹ̀ṣẹ̀ wọn; Juda pẹ̀lú sì kọsẹ̀ pẹ̀lú wọn. ⁶Pẹ̀lú agbo àgùntàn wọn àti agbo màlúù wọn ni wọn yóò lọ wá Baba wa kiri, ṣùgbọ́n wọn kì yóò rí i; ó ti fà sẹ́yìn kúrò lọ́dọ̀ wọn. ⁷Wọn ti ṣe àìṣòótọ́ sí Baba wa, nítorí wọn ti bí àwọn ọmọ àlè. Nísinsìnyí oṣù tuntun yóò jẹ wọn run pẹ̀lú oko wọn.

⁸“Ẹ fọn ìwo ní Gibea, ìpè ní Rama. Ẹ ké igbe ogun ní Beti-afeni; wo ẹ̀yìn rẹ, Benjamini! ⁹Efraimu yóò di ahoro ní ọjọ́ ìjìyà; nínú àwọn ẹ̀yà Israẹli ni mo sọ ohun tí ó dájú di mímọ̀. ¹⁰Àwọn ọmọ-ọba Juda ti dàbí àwọn tí ń ṣí òkúta ààlà; sórí wọn ni èmi yóò tú ìbínú mi jáde bí omi. ¹¹Efraimu ni a ni lára, a sì tẹ̀ẹ́ mọ́lẹ̀ nínú ìdájọ́, nítorí ó pinnu láti máa lépa àwọn òrìṣà asán. ¹²Nítorí náà, èmi dàbí kòkòrò aṣọ fún Efraimu, àti bí ìjẹrà fún ilé Juda.

¹³“Efraimu rí àìsàn ara rẹ̀, Juda sì rí egbò rẹ̀ tí ó ṣí sílẹ̀; nítorí náà Efraimu sáré lọ sí Asiria, ó ránṣẹ́ sí ọba ńlá rẹ̀. Ṣùgbọ́n ọba náà kò lè wò ọ́ sàn, bẹ́ẹ̀ ni kò lè mú ọgbẹ́ rẹ tí ń jó sàn. ¹⁴Nítorí èmi yóò dàbí kìnnìún fún Efraimu, àti bí ọmọ kìnnìún fún ilé Juda. Èmi tìkára mi yóò fàya, èmi yóò sì lọ; èmi yóò gbé e lọ, kì yóò sì sí ẹni tí yóò gbà á sílẹ̀. ¹⁵Èmi yóò padà lọ sí ibùjókòó mi lẹ́ẹ̀kan sí i, títí wọn yóò fi jẹ́wọ́ ẹ̀bi wọn tí wọn yóò sì wá ojú mi; nínú ìpọ́njú wọn, wọn yóò fi ìtara wá mi.”