Koyawegei Kwanda eng' Che Kateweerin
Kiguure tisiik, laitoryat, ak pororyet tugul. Ma chame poisyonikwak koweeksei icheek, ak ye koba kocheeng' kobooto keechiirek ak tuuga, ko kagoyawegei Kwandanyo. Koguure ineegei ko uu manunet eng' Judah ak ko uu ng'etundo eng' Ephraim, yeityo koiu kot koweeksei icheek ng'wanindo.
Ng'alaali Kwandanyo eng' mustarisyek 2–15
5 1Ogas chu, tisiik! Oitaan iit, kootap Israel! Oitaan iit, kootap laitoryat! Amu kirwoogutik ko agobo okweek, amu ki oek mesteet eng' Mispa ak regereiywot ne kigeering'at eng' Tabor.
2“Kagoba che rebeka korobto eng' pareet, ago atigon tugul icheek. 3Angen Ephraim, ak ma ki kounygei Israel eng' anee; amu nguno, Ephraim, kaiyai ibeetapkei inyee, ak kagomurwon Israel.
4“Ma chame poisyonikwak koweeksei icheek Kwandanywa, amu mi tamirmiryet ne po kugoinatet kwenunnywa, ak ma ngen Kwandanyo. 5Paoryanji menatetap Israel agobo ineendet; koriichkei Israel ak Ephraim eng' tengekwekwak; koriichkei kora Judah kobooto icheek. 6Kobooto keechiirekwak ak tyong'iikwak koba kocheeng' Kwandanyo, ago ma nyoor ineendet; kagoyawegei eng' icheek. 7Kagoteweeri Kwandanyo, amu kagosich lagok che po sarbuch. Nguno koamei arawet ne leel icheek kobooto mbareenikwak.
8“Oguut igoondit eng' Gibea, iryageet eng' Ramah. Oguut waagaat eng' Beth-aben; igeer let, Benjamin! 9Koek Ephraim karaatya eng' peetuutap kergong'yet; eng' ortinwegap Israel aboorun kiit ne iman. 10Pounigap Judah kagoek ko uu che inaktoe kiwotet; aroong'ji icheek nereegek ko uu peek. 11Kagisastae Ephraim, kagiguoten eng' kirwooget, amu ki machei koosup kanamonik che po kariik. 12Aoo ko uu kuutik eng' Ephraim, ak ko uu manunet eng' kootap Judah.
13“Kogeer Ephraim myandanyi, kogeer Judah kacheennyi; kolabat anyun Ephraim koba Assyria, kosaaei laitoryat ne oo. Ago ma imuuchi laitoryanooto kosoop inyee, anan kosoop pirutyeng'ung' ne mong'u. 14Amu aoo ko uu ng'etundo eng' Ephraim, ak ko uu ng'etundo ne neran eng' kootap Judah. Anee kerin aluuli ak awechigei; aib, ak ma mi ne sarei. 15Aweekyigei kogeny koonnyu, agoi koboortoi tengekwekwak ak kocheeng' tainnyu; eng' kwong'utennywa kocheeng'o anee miising'.”