ሆሴዕ 5

5 ¹ካህናት ሆይ፣ ይህን ስሙ! የእስራኤል ቤት ሆይ፣ አድምጡ! የንጉሡ ቤት ሆይ፣ አዳምጡ! ፍርዱ ለእናንተ የተወሰነ ነውና፣ በምጽጳ ወጥመድ፣ በታቦር ላይም የተዘረጋ መረብ ሆናችኋልና።

²“ዐመፀኞች በግድያ ጠልቀዋል፤ እኔ ግን ሁሉንም እቀጣቸዋለሁ። ³ኤፍሬምን አውቀዋለሁ፣ እስራኤልም ከእኔ የተሰወረ አይደለም፤ ኤፍሬም ሆይ፣ አሁን አመንዝረሃል፣ እስራኤልም ረክሷል።

⁴“ሥራቸው ወደ አባታቸው እንዲመለሱ አይፈቅድላቸውም፤ የዝሙት መንፈስ በውስጣቸው አለና፣ አባታችንንም አያውቁም። ⁵የእስራኤል ትዕቢት በእርሱ ላይ ይመሰክራል፤ እስራኤልና ኤፍሬም በኀጢአታቸው ይሰናከላሉ፤ ይሁዳም ከእነርሱ ጋራ ይሰናከላል። ⁶በበጎቻቸውና በከብቶቻቸው አባታችንን ሊፈልጉ ይሄዳሉ፣ ነገር ግን አያገኙትም፤ ከእነርሱ ርቋልና። ⁷ለአባታችን ታማኝ አልሆኑም፣ ዲቃላ ልጆችን ወልደዋልና። አሁን ሰርቀ ጨረቃ ከዕርሻቸው ጋራ ይበላቸዋል።

⁸“በጊብዓ ቀንድ ንፉ፣ በራማ መለከት ንፉ። በቤትዐዌን የጦር ድምፅ አሰሙ፤ ብንያም ሆይ፣ ወደ ኋላህ ተመልከት! ⁹ኤፍሬም በቅጣት ቀን ባድማ ይሆናል፤ በእስራኤል ነገዶች መካከል የተረጋገጠውን አስታውቃለሁ። ¹⁰የይሁዳ መሳፍንት የድንበር ድንጋይ እንደሚያፈልሱ ሆነዋል፤ ቍጣዬን እንደ ውሃ በእነርሱ ላይ አፈሳለሁ። ¹¹ኤፍሬም ተጨቍኗል፣ በፍርድም ተቀጥቅጧል፤ ከንቱ ጣዖታትን ለመከተል ቈርጦ ነበርና። ¹²ስለዚህ ለኤፍሬም እንደ ብል፣ ለይሁዳም ቤት እንደ መበስበስ ነኝ።

¹³“ኤፍሬም በሽታውን አየ፣ ይሁዳም ቍስሉን አየ፤ ስለዚህ ኤፍሬም ወደ አሦር ሮጠ፣ ወደ ታላቁም ንጉሥ ተማጸነ። ያ ንጉሥ ግን ሊፈውስህ ወይም የሚመግለውን ቍስልህን ሊያድንልህ አይችልም። ¹⁴ለኤፍሬም እንደ አንበሳ፣ ለይሁዳም ቤት እንደ ደቦል አንበሳ እሆናለሁና። እኔው ራሴ ቀዳድጄ እሄዳለሁ፤ ተሸክሜ እወስዳለሁ፣ የሚያድንም አይኖርም። ¹⁵እንደ ገና ወደ ስፍራዬ እመለሳለሁ፤ በደላቸውን አምነው ፊቴን እስኪሹ ድረስ፤ በመከራቸው ትጋት ይፈልጉኛል።”