Avāna Shitkasang Makhaleiabing Eina Khuithui
Pāngmonbing, awunga kala yur chi saikorali hoa. Athumwui otsakna athumli latungngasak mahaira, kala yao kala sei khuida phāda vāra tharan ithumwui Avāna khuithuihaira. Ana Judahli par thāda, Ephraimli kazingkha̱ thāda ngasāra da hānga, chiwui thili kakhanangna athumli latungngasak eina tangda ngalanra.
5 1Hi nganālu, O pāngmonbing! Nganātitkhuilu, O Israelwui shimkhur! Nganākhuilu, awungawui shimkhur! Kaja bichar hi nathumwui vangna, khikhalajila nathum Mizpahli khalen kala Taborli khalen kasang sāhaira.
2"Khalāng ot kasābingna shaokathatli thuklak eina vāhaira, kha ina athum saikorali hāngmachinra. 3Ina Ephraimli thei, kala Israel iwui eina mangathummana; kaja ara, O Ephraim, na khalatta khayorva̱wui otsak sāhaira, kala Israel sākhamāng ngasakhaira.
4"Athumwui otsakna athumli athumwui Avāli mai ngareiung khavai mahairarmana, kaja khayorva̱wui manglā athumwuili lei, kala athumna ithumwui Avāli matheimana. 5Israelwui langkasona awui pongli shākhi mi; Israel kala Ephraim athumwui moreili kongluira; Judahla athum ngasoda kongluira. 6Athumwui yao kala seibing ngasoda athumna ithumwui Avāli phākhuida vāra, kha athumna ali masamphangmara; ana athumwui eina ngalanthuihaira. 7Athumna ithumwui Avāli shitkasang maleilakla sai, kaja athumna shāmnaobing pharāhaira. Ara changwokna athumli athumwui luibing ngasoda tukshaira.
8"Gibe-ahli angaji khonglu, Ramahli talla̱ khonglu. Beth-avenli ningkhangashar khonglu; nawui khanukshong yanglu, O Benjamin! 9Ephraim tandi khami zimiksholi ramcho ngasāra; Israelwui shangbing ngachaili ina kachangkhat kahai chi theingasakra. 10Judahwui wungnaobing thari phurabing thāda ngasāhaira; athumwuitungli ina iwui malungkhavāt tara̱ thāda rotāra. 11Ephraim rekharekhaira, bicharli akha̱ sāmihaira, kaja ana arema meoma̱ shurkhavai ningchānga. 12Chiwui vang eina ina Ephraimli makung thāda ngasāra, kala Judahwui shimkhurli par thāda ngasāra.
13"Ephraimna awui khalattawui kazāt thei, Judahna awui khamā thei; chieina Ephraim Assyriali yongvāhaira, awunga khangamali khorumda hānga. Kha awunga china nathumli maraimirarmana, lah nathumwui khamā chi maraimirarmana. 14Kaja ina Ephraimli kazingkha̱ thāda ngasāra, kala Judahwui shimkhurli kazingkha̱nao thāda ngasāra. Ina khalatta serkazamda vāhaora; ina khuivāra, kala khipānakha makānmimara. 15Athumna athumwui khayonkhamāng mayāda iwui mai phāranglakha eina tangda, ina latluida iwui pamkhavaili ngalanra; athumwui kakhanang atamli athumna thuklak eina ili phāra."
