ሆሴዕ 5 FHB Father's Heart Bible™

5 ¹ኣቱም ካህናት፥ እዙይ ስምዑ! ኣቱም ቤት እስራኤል፥ ኣቕልቡ! ኣቱም ቤት ንጉስ፥ ስምዑ! ኣብ ምፅጳ መፈንጠር፥ ኣብ ታቦር ድማ ዝተዘርግሐ መርበብ ስለ ዝኾንኩም፥ እቲ ፍርዲ ንኣኻትኩም እዩ።

²“እቶም ዓመፀኛታት ናብ ምሕራድ ኣዕሚቖም ኣለዉ፥ ኣነ ግና ንዅሎም ክቐፅዖም እየ። ³ንኤፍሬም እፈልጥ እየ፥ እስራኤልውን ካባይ ኣይተሰወረን፤ ኦ ኤፍሬም፥ ሕዚ ኣመንዚርካ ኢኻ፥ እስራኤልውን ረኺሱ ኣሎ።

⁴“ግብርታቶም ናብ ኣቦኦም ክምለሱ ኣይሓድጎን፥ መንፈስ ምንዝርና ኣብ ውሽጦም ስለ ዘሎ፥ ንኣቦናውን ኣይፈልጡን። ⁵ትዕቢት እስራኤል ኣብ ልዕሊኡ ይምስክር፤ እስራኤልን ኤፍሬምን ብሓጢኣቶም ይዕንቀፉ፤ ይሁዳውን ምሳታቶም ይዕንቀፍ። ⁶ምስ ኣባጊዖምን ኣሓኦምን ንኣቦና ክደልዩ ክኸዱ እዮም፥ ግና ኣይረኽብዎን፤ ካባታቶም ርሒቑ እዩ። ⁷ንኣቦና ጠሊሞምዎ፥ ድቓላ ውሉድ ወሊዶም እዮም እሞ። ሕዚ እታ ሓዳስ ወርሒ ምስ ገራሁኦም ክትበልዖም እያ።

⁸“ኣብ ጊብዓ መለኸት፥ ኣብ ራማ ድማ መለኸት ንፍሑ። ኣብ ቤት ኣዌን ናይ ውግእ ኣውያት ኣስምዑ፤ ኦ ብንያም፥ ንድሕሬኻ ጠምት! ⁹ኤፍሬም ብመዓልቲ መቕፃዕቲ ዑና ክኸውን እዩ፤ ኣብ ማእኸል ነገዳት እስራኤል ብርግፅ አፍልጥ ኣለኹ። ¹⁰መሳፍንቲ ይሁዳ ከምቶም ናይ ወሰን እምኒ ዝደፍኡ ኮይኖም እዮም፤ ኣብ ልዕሊኦም ቍጥዓይ ከም ማይ ከፍስስ እየ። ¹¹ኤፍሬም ግፉዕ እዩ፥ ብፍርዲ ድማ ደቒቑ እዩ፥ ነቶም ከንቱ ጣዖታት ክስዕብ ስለ ዝመረፀ። ¹²ስለዙይ ኣነ ንኤፍሬም ከም ብልዕ፥ ንቤት ይሁዳ ድማ ከም ብስብስ እየ።

¹³“ኤፍሬም ሕማሙ ረአየ፥ ይሁዳ ድማ ክፉት ቍስሉ ረአየ፤ ስለዙይ ኤፍሬም ናብ ኣሶር ጐየየ፥ ናብቲ ዓብዪ ንጉስ ድማ ተማሕፀነ። እቲ ንጉስ እቲ ግና ከሕውየኩም፥ ነቲ ዝበስበሰ ቍስልኹምውን ክፍውሶ ኣይኽእልን እዩ። ¹⁴ኣነ ንኤፍሬም ከም ኣንበሳ፥ ንቤት ይሁዳ ድማ ከም ሽደን ኣንበሳ ክኸውን እየ። ኣነ ባዕለይ ክቕዳድ እሞ ክኸይድ እየ፤ ክወስድ እየ፥ ዘድሕንውን የለን። ¹⁵ናብ መሕደሪየይ ተመሊሰ ክኸይድ እየ፥ ንበደሎም ክሳዕ ዝእመኑን ገፀይ ክሳዕ ዝደልዩን፤ ብፀበባኦም ኣፅኒዖም ክደልዩኒ እዮም።”