Hosea 5 FHB Father's Heart Bible™

5 ¹Iguai ũndũ ũyũ, inyuĩ athĩnjĩri Ngai! Thikĩrĩriai, inyuĩ nyũmba ya Isiraeli! Iguai, inyuĩ nyũmba ya mũthamaki! Amu ciira ũcio nĩ wanyu, tondũ mũtuĩkĩte mũtego kũu Mizipa na wavu ũtambũrũkĩtio igũrũ rĩa Taboru.

²“Aremi nĩmarikĩte thĩinĩ wa ũũragani, no niĩ nĩngaamaherithia othe. ³Nĩnjũũĩ Efiraimu, na Isiraeli ndahithĩtwo harĩ niĩ; nĩgũkorwo rĩu, wee Efiraimu, nĩũhũũrĩte ũmaraya, na Isiraeli nĩathaahĩtio.

⁴“Ciĩko ciao itikaametĩkĩria macookerere Ithe wao, tondũ roho wa ũmaraya ũrĩ thĩinĩ wao, na matiũĩ Ithe witũ. ⁵Mwĩtĩĩo wa Isiraeli nĩũmũrutĩire ũira; Isiraeli na Efiraimu nĩmahĩngagwo nĩ mehia mao; o na Juda nĩahĩngagwo hamwe nao. ⁶Marĩ na ndũũru ciao cia mbũri na cia ng'ombe nĩmagaathiĩ gũcaria Ithe witũ, no matikaamuona; nĩehereire kũrĩ o. ⁷Nĩmagarũrũkĩire Ithe witũ, nĩgũkorwo nĩmaciarĩte ciana cia ũhũũni. Na rĩĩrĩ, mweri ũrĩa mwerũ nĩũkaameria o hamwe na mĩgũnda yao.

⁸“Huhai coro kũu Gibea, na karumbeta kũu Rama. Anĩrĩrai mbaara kũu Bethi-aveni; wĩrorere na thuutha, wee Benjamini! ⁹Efiraimu nĩagaatuĩka ihooru mũthenya wa kũherithio; thĩinĩ wa mĩhĩrĩga ya Isiraeli nĩngũmenyithania ũndũ ũrĩa wa ma. ¹⁰Anene a Juda matuĩkĩte ta arĩa meeheragia ihiga rĩa mũhaka; igũrũ rĩao nĩngaaita marakara makwa ta maaĩ. ¹¹Efiraimu nĩahiinyĩrĩirio, akahehenjwo nĩ ciira, tondũ eerutĩte gũthingata mĩhianano ĩtarĩ kĩene. ¹²Nĩ ũndũ ũcio niĩ ndĩ ta memenyi harĩ Efiraimu, na ta ũbuthu harĩ nyũmba ya Juda.

¹³“Efiraimu nĩoonire mũrimũ wake mwene, Juda akĩona kĩronda gĩake kĩrĩa kĩhingũkĩte; kwoguo Efiraimu agĩtengʼera Ashuri, agĩthaitha mũthamaki ũrĩa mũnene wakuo. No mũthamaki ũcio ndangĩhota gũkũhonia, kana kũhonia kĩronda gĩaku kĩrĩa kĩorũ. ¹⁴Nĩgũkorwo niĩ ngaatuĩka ta mũrũũthi harĩ Efiraimu, na ta mũrũũthi mwĩthĩ harĩ nyũmba ya Juda. Niĩ mwene nĩngaatambuura njooke thiĩ; nĩngakuua ngĩthiĩ, na gũtirĩ mũndũ ũkaahonokia. ¹⁵Nĩngacooka rĩngĩ kũndũ gwakwa, nginya rĩrĩa makeetĩkĩra mahĩtia mao na macarie ũthiũ wakwa; mĩnyamaroinĩ yao nĩmakaanjaria na kĩyo.”