Lukumu lwa Tavidi lwa mbundu yosu
Dya Tavidi.
Tavidi wisi vutula matondu kwena Tata wandi mukuma wámuvutula muna kilumbu kina káhanga amana wámupheka kikesa. Nzayilu yina yenina ha kati-kati yenina luzolu lumosi: ata buna watombwama, wisi tala batu ba kudikulumuna amana wisi bika bakwa lulendu kwa kyana. Tata wetu kalungisa lukanu lwandi muna luzingu.
138 1Yikúzitisa yi mbundu yama yosu; ku thwala ya banzambi yiyímbila khembu yaku. 2Yifukama ku thwala ya nzu yaku yabukheti amana yivutula matondu mu khumbu yaku kikuma kya lungongu lwaku lwa bulunda yi kwikama kwaku, mukuma wátombula ndinga yaku hana thandu ya khumbu yaku yosu. 3Muna kilumbu dina yáhanga, wámvutwadini; wámpheka kikesa, yi ngolu muna moya wama.
4Bakyamvu boosu ba tsi bakuzitisa, A Tata, mukuma báyuka ndinga za munwa waku. 5Bakúyimbila nzila za Tata wetu, mukuma khembu ya Tata wetu yineni. 6Keti buna Tata wetu watombwama, kabati tala batu ba kudikulumuna, kaasi kazaya bakwa lulendu tuka kuna kyana.
7Keti buna yidyata hana kati dya biwayi, wisi hulula luzingu lwama; wisi yuna koku dyaku hana thandu ya khabu za bambeni bama, amana koku dyaku dya kitata disi mphulula. 8Tata wetu kalungisa lukanu lwandi kikuma kya meni; lungongu lwaku lwa bulunda, Tata wama, lwisi zinga mvula yi mvula. Yambwadilaku muhangu wa moku maku.
