Davidwui Wuklung Tongda Masot
Davidwui laa.
Davidna ngakaowa masoli ngahānkāmi kala ali ngāchāng ngasakkahai vang awui Avāli ningkashi mi. Laa kakharāngli kakhui chi ningkaphā akha: kahāk leilaga, ana kateo mibingli yang kala ngaraimik kasābingli kahāida sāda leiya. Kharing akhali ana aphungkahai chi mathāngmi.
138 1Ina iwuklung tongda nali sochikatra; varebingwui mangāli nali masotlaa sāra. 2Nawui makhangachei leikashi kala nawui ningkatongwui vang, ina nawui kathara khorumshim chili nali khorumlaga namingli ningkashi mira; kaja nana naming saikorawuitungli nawui tui reingasakhaira. 3Ina khangakaona chithang, nana ili ngahānkāmihaira; iwui manglāli yāng eina nana ili malung pingngasakhaira.
4Okathuiwui awunga saikorana nali sochikatra, O iwui Avā, kaja athumna nawui khamorwui tui shāhaira. 5Athumna ithumwui Avāwui shongfa pongli laa sāra, kaja ithumwui Avāwui tekhamatei hakmahālaka. 6Ithumwui Avā juimeikapa chithālala, ana khangazanabingli yangtai, kha ana langkasobingli katāva̱wui eina theira.
7Ina kakhanangwui alungli zatlala, nana iwui mirin phārimira; iwui yangkashebingwui malungkhavātli lāngda nana napāng katingra, kala nawui yāpangna ili huimira. 8Ithumwui Avāna iwui vang awui khangarān ungshung ngasakra; nawui makhangachei leikashi, O iwui Avā, katang mavaimana. Nawui pāng eina sākahai ot chi mahorhailakalu.
