Azafu wátula kivuvu kwena Alami, ka kwena Tata ku
Ku thwala ya Basha, Azafu wásumba lusadisu lwa Alami ni phalata ya nzu ya Tata wetu, ka mu kuhyula Tata wetu ku. Anani wumuzimbwadi ni meso ma Tata wetu misi zyeta tsi yosu, mu kusosa mbundu zina zidihani kwa yandi mu bufwana. Azafu wásya mmoni-mambu mu boloku, amana kunima wásosa bandomvi, ka Tata wetu ku, kikuma kya malu mandi mabela.
16 1Muna mvula makumatatu yi sambanu ya luyalu lwa Azafu, Basha kinga kya Kiseledi wánwanisa Yuta, amana wátunga Lama hanga ka mutu ku kalubuka ho kakota muna kinzunga kya Azafu kinga kya Yuta. 2Azafu wábonga phalata yi wolu muna homa ha kuvwa ha nzu ya Tata wetu yi ha nzu ya kinga, amana wáhitika byawu kwena Beni-Adadi kinga kya Alami, wuna wázinga ku Tamasi, ni ndinga yayi: 3«Yambula bulunda bukala hana kati dya meni yi ngeyi, bwosu bwákala hana kati dya tata wama yi tata waku. Tala, yikúhitika phalata yi wolu. Kwenda buthwena amana wakulula bulunda bwaku yi Basha kinga kya Kiseledi, hanga kakatuka kwena meni.»
4Beni-Adadi wáyukana yi kinga Azafu, amana wáthuma bapfumu ba makesa mandi mu kunwanisa mbanza za Kiseledi. Bábula Iyoni, Dani, Abele-Mayimi, yi mbanza zoosu za kuvwa za Nefutadi. 5Tangwa Basha káyuka mana, wálembwa kutunga Lama amana wásisa kisalu kyandi. 6Kinga Azafu wákutikisa batu boosu ba Yuta, amana bánata matadi yi miti mana Basha katungila Lama; amana ni byawu wátunga Ngeba yi Misipa.
7Buna Anani mmoni-mambu wisa kwena Azafu kinga kya Yuta, amana wumuzimbwadini: «Mukuma wátula kivuvu kyaku kwena kinga kya Alami, ka kwena Tata waku ku, makesa mandi máhuluka mu koku kwaku. 8Aketi bisi Kusi yi bisi Libiya bákala dibuka dya mbuta dya makesa, yi makalu ma mvita yi baphunda malendaku mu kutanga? Kaasi mukuma wátula kivuvu kyaku kwena Tata waku, yandi wákuheka bawu mu koku kwaku. 9Mukuma mesu ma Tata wetu masi kangala tsi yosu, mu kubasyamisa bana bakangama kwena yandi yi mbundu yimosi. Mu dyambu dina, wáhanga bwa kilawu; tukila buthwena, kwakála mvita kwena ngeyi.»
10Nganzi zátombuka kwena Azafu kikuma kya mmoni-mambu, amana wámusika mu boloku ya phophu, mukuma kakala yi nganzi kikuma kya dyambu dina. Muna tangwa dina phi, wányokuna batu bahika mu kingolu-ngolu.
11Mihangu mya Azafu, tukila ma theti tii yi ma tsuka, másonama muna mukanda wa bakinga ba Yuta yi Kiseledi. 12Muna mvula makumatatu yi vwa ya luyalu lwandi, malu ma Azafu mákala yi maladi, amana maladi mana mákala ma ngolu lawu. Kaasi nana mu kimbefu kyandi, kásandaku Tata wetu ku, kaasi bandomvi kaka. 13Buna Azafu wálembwa kumosi yi bakhaka bandi, wafwa muna mvula makumaya yi mosi ya luyalu lwandi. 14Bámuzika muna dizyamu dyandi meni, dina kádiholila mu mbanza ya Tavidi; bámutula hana thangi ya bidilu, yina yázala mananasi yi masi ma mutindu yi mutindu, mana báyidika batu ba ngangu ba kusanga masi; amana báwika mbawu ya mbuta kikuma kyandi. a a v14 Mbawu yina ya mbuta yázokisa mananasi mu kuzitisa kinga; yákalaku kuyoka mvumbi, kikalulu kina bisi Kiseledi bákalaku hanga.
