2ይ ዜና 16 FHB Father's Heart Bible™

16 ¹ኣብ መበል ሰላሳን ሹድሽተን ዓመቱ ንኣሳ፥ ባኦስ ንጉስ እስራኤል ናብ ይሁዳ ወረረ፤ ናብ ኣሳ ንጉስ ይሁዳ ሓደ እኳ ከይኣቱን ካብኡ ኸይወፅእን ኢሉ ድማ ንራማ ዓረዳ። ²ኣሳ ድማ ካብ መዛግብ ቤት ኣቦናን ካብ ቤተ መንግስትን ብሩርን ወርቅን ኣውፂኡ፥ ናብ ወልደ ኣዴር ንጉስ ሶርያ፥ እቲ ኣብ ደማስቆ ዝነብር፥ ሰዲዱ ከምዙይ ኢሉ ለኣኾ፦ ³“ኪዳን ኣብ መንጎና ይኹን፥ ከምቲ ኣቦይን ኣቦኻን ዝኣተውዎ። እንሆ፥ ብሩርን ወርቅን ልኢኸልካ ኣለኹ፤ ኪድ እሞ ነቲ ምስ ባኦስ ንጉስ እስራኤል ዘለካ ኪዳን ኣፍርሶ፥ ካባይ ምእንቲ ኽግለስ።”

⁴ወልደ ኣዴር ድማ ምስ ንጉስ ኣሳ ተሰማምዐ፤ ሓለቓ ሰራዊቱ ኸዓ ናብ ከተማታት እስራኤል ሰደደ፤ ንዒዮንን ንዳንን ኣቤልማይምን ኵለን ከተማታት መዛግብ ንፍታሌምን ድማ ሰዓረን። ⁵ባኦስ እዙይ ምስ ሰምዐ፥ ንራማ ምዕራድ ሓዲጉ ስራሑ ኣቋረፀ። ⁶ንጉስ ኣሳ ድማ ንኵሉ ይሁዳ ኣከበ፤ ነቲ ባኦስ ራማ ዝዓረደሉ ኣእማንን ኣእዋምን ድማ ኣልዒሎም ወሰዱ፤ ብኣኣቶም ከዓ ንጊብዓን ንምፅጳን ዓረደን።

⁷ሽዑ ኣናኒ እቲ ረኣዪ ናብ ኣሳ ንጉስ ይሁዳ መፂኡ ከምዙይ በሎ፦ “ኣብ ኣቦኻ ዘይኮነስ ኣብ ንጉስ ሶርያ ስለ ዝተወከልካ፥ ሰራዊት ንጉስ ሶርያ ካብ ኢድካ ኣምለጠ። ⁸ኩሳውያንን ሊብያውያንን፥ ቍፅሪ ዘይብሉ ሰረገላን ፈረሰኛን ዘለዎም፥ ዓብዪ ሰራዊት ኣይነበሩንዶ? ኣብ ኣቦኻ ስለ ዝተወከልካ ግና ኣብ ኢድካ ኣሕሊፉ ሃቦም። ⁹ኣዒንቲ ኣቦና ነቶም ልቦም ምስኡ ፍፁም ዝኾነ ምእንቲ ኸበርትዖም ኣብ ኵላ ምድሪ ይዝዋወራ እየን። ብእዙይ ዓሺኻ፤ ካብ ሕዚ ንደሓር ውግእ ኪህልወካ እዩ።”

¹⁰ኣሳ ድማ በዙይ ነገር በቲ ረኣዪ ኰረየ፤ ብዛዕባ እዙይ ተቘጢዕዎ ነበረ እሞ ኣብ ቤት መቑሕ ኣሰሮ። በቲ ጊዜ እቲ ኸዓ ንገለ ካብቲ ህዝቢ ብጭካነ ገፍዐ።

¹¹ናይ ኣሳ ነገር፥ ካብ መጀመርታ ክሳዕ መወዳእታ፥ ኣብ መፅሓፍ ነገስታት ይሁዳን እስራኤልን ተፅሒፉ ኣሎ። ¹²ኣብ መበል ሰላሳን ትሽዓተን ዓመት ምንጋሱ፥ ኣእጋር ኣሳ ሓመመ፤ እቲ ሕማም ድማ የመና ኸቢድ ነበረ። ኣብ ሕማሙ እኳ ንኣቦና ኣይደለየን፤ ንሐካይም ደኣ እምበር። ¹³ኣሳ ድማ ኣብ መበል ኣርብዓን ሓደን ዓመት ምንጋሱ ሞተ፤ ምስ ኣቦታቱ ኸዓ ደቀሰ። ¹⁴ኣብቲ ባዕሉ ኣብ ከተማ ዳዊት ዝዀዓቶ መቓብሩ ቀበርዎ፤ ብቐመማትን ብኽኢላታት ሸቱ ዝተዳለወ ዝተፈላለየ ዝተሓወሶ ምዑዝ ሽቱን ዝመልአ ዓራት ኣደቀስዎ፤ ዓብዪ ሓዊ ድማ ኣንደዱሉ። ^a a v14 እቲ ዓብዪ ሓዊ ንኽብሪ እቲ ንጉስ ኢሉ ቀመማት እዩ ዘንደደ፤ እስራኤል ዘይለመድዎ ምንዳድ ሬሳ ኣይነበረን።