2ይ ዜና 15 FHB Father's Heart Bible™

15 ¹መንፈስ ኣቦና ናብ ልዕሊ ኣዛርያስ ወዲ ዖዴድ ወረደ። ²ንኣሳ ክራኸቦ ወፀ፤ ከምዙይ ድማ በሎ፦ “ኦ ኣሳን ኵሉ ይሁዳን ብንያምን፥ ስምዑኒ፤ ምስኡ እንተለኹም ኣቦና ምሳኻትኩም እዩ፤ እንተ ደለኹም ኽትረኽብዎ ኢኹም፤ እንተ ሓዲግኩምዎ ድማ ክሓድገኩም እዩ። ³እስራኤል ንነዊሕ ዘመን ብዘይ ኣቦና፥ ብዘይ ዝምህር ካህን፥ ብዘይ ሕጊ ነበረ። ⁴ኣብ ፀበባኦም ግና ናብ ኣቦና፥ ኣምላኽ እስራኤል ተመሊሶም ደለይዎ፤ ረኸብዎ ድማ። ⁵በቲ ዘመን እቲ ዝወፅእ ወይ ዝኣቱ ሓደ እኳ ብሰላም ኣይነበረን፤ ኣብ ኵሎም እቶም ኣብተን ሃገራት ዝነብሩ ዓብዪ ሽበራ ወሪዱ ነበረ እሞ። ⁶ህዝቢ ንህዝቢ፥ ከተማ ድማ ንከተማ ጨፍለቐ፤ ኣቦና ብዅሉ ዓይነት ፀበባ ኣሸበሮም እሞ። ⁷ንስኻትኩም ግና ትባዕ በሉ፤ ኣይትድከሙ፤ ስራሕኹም ዓስቢ ኽረክብ እዩ እሞ።”

⁸ኣሳ ድማ እዝ ቃላት እዙይ፥ እቲ ትንቢት ዖዴድ ነብዪ ምስ ሰምዐ፥ ተጠናኸረ፤ ነቶም ዘፀይፍ ጣዖታት ካብ ኵሉ ምድሪ ይሁዳን ብንያምን፥ ካብተን ኣብ ከረን ኤፍሬም ዝሓዘን ከተማታትን ኣርሓቐ። ነቲ መሰውኢ ኣቦና ኣብ ቅድሚ ኣፍ ደገ ቤተ መቕደሱ ኣሐደሶ። ⁹ንዅሉ ይሁዳን ብንያምን፥ ምስኣቶም ዝነብሩ ካብ ኤፍሬምን ምናሴን ስምኦንን ዝኾኑን ኣከቦም፤ ካብ እስራኤል ብዙሓት፥ ኣቦና ምስኡ ምዃኑ ምስ ረአዩ፥ ናብኡ ተሳጊሮም እዮም እሞ። ¹⁰ኣሳ ኣብ ዝነገሰሉ መበል ዓሰርተ ሓሙሽተ ዓመት ድማ፥ ኣብ ሳልሳይ ወርሒ ናብ ኢየሩሳሌም ተኣከቡ። ¹¹በታ መዓልቲ እቲኣ ኸዓ ካብቲ ዝዘመትዎ ንኣቦና ሸውዓተ ሚእቲ ብዕራይን ሸውዓተ ሽሕ በጊዕን ሰውኡ። ¹²ነቦና፥ ኣምላኽ ኣቦታቶም፥ ብምሉእ ልቦምን ብምሉእ ነፍሶምን ክደልይዎ ድማ ኪዳን ኣተዉ። ¹³ነቦና፥ ኣምላኽ እስራኤል፥ ዘይደልዮ ኵሉ፥ ንእሽተይ ኮነ ዓብዪ፥ ሰብኣይ ኮነ ሰበይቲ፥ ይቕተል ነበረ። ¹⁴ነቦና ብዓብዪ ድምፂ፥ ብእልልታ፥ ብመለኸትን ብቐርንን መሓሉ። ¹⁵ኵሉ ይሁዳ በቲ ማሕላ ተሓጐሱ፤ ብምሉእ ልቦም መሓሉ፥ ብምሉእ ድሌቶም ደለይዎ፥ ረኸብዎ ድማ እሞ። ኣቦና ኸዓ ብዙርያኦም ዕረፍቲ ሃቦም።

¹⁶ንጉስ ኣሳ ድማ ንእኖኡ መዓካ፥ ነቲ ዘፀይፍ ምስሊ ኣስታሮት ስለ ዝገበረት፥ ካብ ንግስትነታ ሰዓራ፤ ነቲ ምስሊ ድማ ቈሪፁ ደቒቑ ኣብ ሩባ ቄድሮን ኣንደዶ። ¹⁷እቲ በረኽቲ ኻብ እስራኤል እኳ እንተ ዘይተኣለየ፥ ልቢ ኣሳ ግና ምሉእ ዕድሚኡ ፍፁም ኮይኑ ፀንሐ። ^a a v17 እቲ በረኽቲ፥ መስዋእቲ ዝስውኡሉ፥ መብዛሕትኡ ጊዜ ንጣዖታት ዝሰግዱሉ፥ ኣብ ርእሲ ኰረብታ ዝነበረ ቦታታት ኣምልኾ እዩ ነይሩ። ¹⁸ነቲ ኣቦኡ ዝቐደሶን ንሱ ባዕሉ ዝቐደሶን ነገራት፥ ብሩርን ወርቅን ኣቑሑን ናብ ቤት ኣቦና ኣእተዎ። ¹⁹ክሳዕ ኣሳ ዝነገሰሉ መበል ሰላሳን ሓሙሽተን ዓመት ድማ ውግእ ኣይነበረን።