Azaria Anouya neShoko rinobva kunaBaba
Azaria anouya nezvisungo: Baba vedu vanemi kana muri navo; vatsvakei uye vachawanikwa. Asa anoshinga, anochenesa zvifananidzo, anovandudza aritari, uye vanhu vanoita sungano nomwoyo wavo wose — uye vanopiwa zororo kumativi ose.
15 1Mweya waBaba vedu wakauya pamusoro paAzaria mwanakomana waOdhedhi. 2Akabuda kundosangana naAsa, akati kwaari, “Nditeererei, Asa navaJudha vose navaBhenjamini: Baba vedu vanemi kana muinavo. Kana mukavatsvaka, muchavawana; kana mukavasiya, vachakusiyaiwo. 3Kwenguva refu vaIsraeri vakanga vasina Baba vedu, vasina muprista anodzidzisa, uye vasina mutemo. 4Mukutambudzika kwavo vakatendeukira kunaBaba vedu, Mwari waIsraeri, vakavatsvaka, uye vakavawana. 5Munguva idzodzo kwakanga kusina akachengeteka pakubuda kana pakupinda, nokuti nyonganiso huru yakawira vose vaigara munyika. 6Rudzi rwakapwanya rudzi uye guta rakapwanya guta, nokuti Baba vedu vakavatambudza nemarudzi ose okutambudzika. 7Asi imi, simbai; musaora mwoyo, nokuti basa renyu richapiwa mubayiro.”
8Asa akati anzwa mashoko aya, chiprofita chaOdhedhi muprofita, akatsunga mwoyo akabvisa zvifananidzo zvinonyangadza munyika yose yeJudha neyeBhenjamini, uye mumaguta aakanga akunda munyika yezvikomo yeEfuremu. Akavandudza aritari yaBaba vedu pamberi pomukova wetemberi yavo. 9Akaunganidza vaJudha vose navaBhenjamini, pamwe chete navaya vaibva kuEfuremu, kuManase, nokuSimeoni vaigara pakati pavo, nokuti vazhinji vomuIsraeri vakanga vayambukira kwaari pavakaona kuti Baba vedu vaiva naye. 10Vakaungana muJerusarema mumwedzi wechitatu wegore regumi namashanu rokutonga kwaAsa. 11Pazuva iroro vakabayira Baba vedu zvibayiro kubva pazvakapambwa—nʼombe mazana manomwe nemakwai zviuru zvinomwe. 12Vakaita sungano yokutsvaka Baba vedu, Mwari wamadzitateguru avo, nomwoyo wavo wose nomweya wavo wose. 13Ani naani aisazotsvaka Baba vedu, Mwari waIsraeri, aifanira kuurayiwa, angava muduku kana mukuru, angava murume kana mukadzi. 14Vakapika kuna Baba vedu nenzwi guru, nokupururudza, uye nehwamanda nenyanga. 15VaJudha vose vakafara nokuda kwemhiko, nokuti vakapika nomwoyo wavo wose, vakavatsvaka nechido chavo chose, uye vakavawana. Baba vedu vakavapa zororo kumativi ose.
16Mambo Asa akabvisawo mai vake Maaka pachinzvimbo chokuva mai vamambo, nokuti vakanga vagadzira chifananidzo chinonyangadza chaAshera; Asa akachitema pasi, akachikuya kuva guruva, akachipisa muMupata weKidhironi. 17Kunyange nzvimbo dzakakwirira dzisina kubviswa muIsraeri, mwoyo waAsa wakaramba wakazvipira zvizere upenyu hwake hwose. a a v17 Nzvimbo dzakakwirira dzaiva nzvimbo dzokunamatira pamusoro pezvikomo apo paibayirwa zvibayiro, kazhinji kuvamwari vechihedheni. 18Akauya mumba maBaba vedu nezvipo zvakatsaurwa zvababa vake nezvipo zvaakanga atsaura iye—sirivha, goridhe, nemidziyo. 19Uye hakuna kuva nehondo kusvikira gore ramakumi matatu namashanu rokutonga kwaAsa.