ଦ୍ଵିତୀୟ ବଂଶାବଳୀ 15 FHB Father's Heart Bible™

15 ¹ଆମ୍ଭମାନଙ୍କ ପିତାଙ୍କ ଆତ୍ମା ଓଦେଦଙ୍କ ପୁତ୍ର ଅସରୀୟଙ୍କ ଉପରେ ଆସିଲେ। ²ସେ ଆସାଙ୍କୁ ଭେଟିବା ପାଇଁ ବାହାରିଗଲେ ଓ ତାହାଙ୍କୁ କହିଲେ, “ହେ ଆସା, ଆଉ ସମସ୍ତ ଯିହୂଦା ଓ ବିନ୍ୟାମୀନ, ମୋʼ କଥା ଶୁଣନ୍ତୁ; ତୁମ୍ଭେମାନେ ଯେପର୍ଯ୍ୟନ୍ତ ଆମ୍ଭମାନଙ୍କ ପିତାଙ୍କ ସଙ୍ଗରେ ଥାଅ, ସେପର୍ଯ୍ୟନ୍ତ ସେ ତୁମ୍ଭମାନଙ୍କ ସଙ୍ଗରେ ଅଛନ୍ତି। ଯଦି ତୁମ୍ଭେମାନେ ତାହାଙ୍କର ଅନ୍ଵେଷଣ କରିବ, ତେବେ ତାହାଙ୍କୁ ପାଇବ; କିନ୍ତୁ ଯଦି ତୁମ୍ଭେମାନେ ତାହାଙ୍କୁ ତ୍ୟାଗ କରିବ, ତେବେ ସେ ତୁମ୍ଭମାନଙ୍କୁ ତ୍ୟାଗ କରିବେ। ³ବହୁକାଳ ପର୍ଯ୍ୟନ୍ତ ଇସ୍ରାଏଲ ଆମ୍ଭମାନଙ୍କ ପିତାଙ୍କ ବିନା, ଶିକ୍ଷାଦାୟକ ଯାଜକ ବିନା ଓ ବ୍ୟବସ୍ଥା ବିନା ରହିଥିଲା। ⁴ମାତ୍ର ସେମାନେ ଆପଣାମାନଙ୍କ ସଙ୍କଟ ସମୟରେ ଇସ୍ରାଏଲର ପରମେଶ୍ଵର ଆମ୍ଭମାନଙ୍କ ପିତାଙ୍କ ଆଡ଼କୁ ଫେରି ତାହାଙ୍କର ଅନ୍ଵେଷଣ କଲେ, ପୁଣି ତାହାଙ୍କୁ ପାଇଲେ। ⁵ସେହି ସମୟମାନଙ୍କରେ ବାହାରକୁ ଯିବା କି ଭିତରକୁ ଆସିବା ଲୋକ ପାଇଁ କୌଣସି ନିରାପତ୍ତା ନ ଥିଲା, କାରଣ ନାନା ଦେଶନିବାସୀ ସମସ୍ତଙ୍କ ଉପରେ ମହା ଉତ୍ପାତ ଘଟିଥିଲା। ⁶ପୁଣି ଗୋଷ୍ଠୀ ଗୋଷ୍ଠୀକୁ ଓ ନଗର ନଗରକୁ ଚୂର୍ଣ୍ଣ କଲା, ଯେଣୁ ଆମ୍ଭମାନଙ୍କ ପିତା ସର୍ବପ୍ରକାର ସଙ୍କଟ ଦ୍ଵାରା ସେମାନଙ୍କୁ ବ୍ୟଥିତ କରିଥିଲେ। ⁷ମାତ୍ର ତୁମ୍ଭେମାନେ ବଳବାନ ହୁଅ; ତୁମ୍ଭମାନଙ୍କ ହସ୍ତ ଶିଥିଳ ନ ହେଉ, କାରଣ ତୁମ୍ଭମାନଙ୍କ କର୍ମର ଫଳ ମିଳିବ।”

⁸ଆସା ଏହିସବୁ ବାକ୍ୟ, ଅର୍ଥାତ୍‍ ଓଦେଦ ଭାବବାଦୀଙ୍କ ଭବିଷ୍ୟଦ୍‍ବାକ୍ୟ ଶୁଣନ୍ତେ, ସେ ସାହସ ଧରି ଯିହୂଦା ଓ ବିନ୍ୟାମୀନର ସମୁଦାୟ ଦେଶରୁ, ପୁଣି ଇଫ୍ରୟିମ ପର୍ବତମୟ ଅଞ୍ଚଳରେ ଆପଣା ଅଧିକୃତ ନଗରସମୂହରୁ ସେହି ଘୃଣ୍ୟ ପ୍ରତିମାସବୁ ଦୂର କଲେ, ଆଉ ପିତାଙ୍କ ମନ୍ଦିର-ଦ୍ଵାର ସମ୍ମୁଖସ୍ଥ ଆମ୍ଭମାନଙ୍କ ପିତାଙ୍କ ଯଜ୍ଞବେଦି ପୁନଃସ୍ଥାପନ କଲେ। ⁹ପୁଣି ସେ ସମସ୍ତ ଯିହୂଦା ଓ ବିନ୍ୟାମୀନକୁ, ଆଉ ସେମାନଙ୍କ ମଧ୍ୟରେ ବାସ କରୁଥିବା ଇଫ୍ରୟିମ, ମନଃଶି ଓ ଶିମୀୟୋନର ଲୋକମାନଙ୍କୁ ଏକତ୍ର କଲେ; କାରଣ ଇସ୍ରାଏଲ ମଧ୍ୟରୁ ଅନେକ ଲୋକ ଆମ୍ଭମାନଙ୍କ ପିତା ତାହାଙ୍କ ସଙ୍ଗରେ ଅଛନ୍ତି ବୋଲି ଦେଖି ତାହାଙ୍କ ପକ୍ଷକୁ ଚାଲି ଆସିଥିଲେ। ¹⁰ଆସାଙ୍କ ରାଜତ୍ଵର ପଞ୍ଚଦଶ ବର୍ଷର ତୃତୀୟ ମାସରେ ସେମାନେ ଯିରୂଶାଲମରେ ଏକତ୍ର ହେଲେ। ¹¹ସେହି ଦିନ ସେମାନେ ଆପଣାମାନଙ୍କ ଆନୀତ ଲୁଟଦ୍ରବ୍ୟରୁ ସାତ ଶହ ଗୋରୁ ଓ ସାତ ହଜାର ମେଷ ଆମ୍ଭମାନଙ୍କ ପିତାଙ୍କ ଉଦ୍ଦେଶ୍ୟରେ ବଳିଦାନ କଲେ। ¹²ପୁଣି ସେମାନେ ଆପଣାମାନଙ୍କ ସମସ୍ତ ଅନ୍ତଃକରଣ ଓ ସମସ୍ତ ପ୍ରାଣ ସହିତ ଆପଣାମାନଙ୍କ ପିତୃଗଣର ପରମେଶ୍ଵର ଆମ୍ଭମାନଙ୍କ ପିତାଙ୍କ ଅନ୍ଵେଷଣ କରିବେ ବୋଲି ନିୟମ କଲେ। ¹³ଆଉ ଯେକେହି ଇସ୍ରାଏଲର ପରମେଶ୍ଵର ଆମ୍ଭମାନଙ୍କ ପିତାଙ୍କ ଅନ୍ଵେଷଣ ନ କରିବ, ସେ କ୍ଷୁଦ୍ର ହେଉ କି ମହାନ ହେଉ, ପୁରୁଷ ହେଉ କି ସ୍ତ୍ରୀ ହେଉ, ତାହାର ପ୍ରାଣଦଣ୍ଡ ହେବ। ¹⁴ଆଉ ସେମାନେ ଉଚ୍ଚସ୍ଵରରେ ଓ ଜୟଧ୍ଵନିରେ, ପୁଣି ତୂରୀ ଓ ଶିଙ୍ଗା ବଜାଇ ଆମ୍ଭମାନଙ୍କ ପିତାଙ୍କ ଉଦ୍ଦେଶ୍ୟରେ ଶପଥ କଲେ। ¹⁵ପୁଣି ସମସ୍ତ ଯିହୂଦା ସେହି ଶପଥ ବିଷୟରେ ଆନନ୍ଦ କଲେ, କାରଣ ସେମାନେ ଆପଣାମାନଙ୍କ ସମସ୍ତ ଅନ୍ତଃକରଣ ସହିତ ଶପଥ କଲେ ଓ ଆପଣାମାନଙ୍କ ସମସ୍ତ ବାଞ୍ଛା ସହିତ ତାହାଙ୍କର ଅନ୍ଵେଷଣ କରି ତାହାଙ୍କୁ ପାଇଲେ। ଆଉ ଆମ୍ଭମାନଙ୍କ ପିତା ସେମାନଙ୍କୁ ଚତୁର୍ଦ୍ଦିଗରେ ବିଶ୍ରାମ ଦେଲେ।

¹⁶ଆଉ ଆସା ରାଜା ଆପଣା ମାତା ମାଖାଙ୍କୁ ମଧ୍ୟ ରାଜମାତା ପଦରୁ ଦୂର କଲେ, କାରଣ ସେ ଆଶେରା ପାଇଁ ଏକ ଘୃଣ୍ୟ ପ୍ରତିମା ନିର୍ମାଣ କରିଥିଲେ; ପୁଣି ଆସା ତାହାର ପ୍ରତିମା କାଟି ପକାଇ ଚୂର୍ଣ୍ଣ କରି କିଦ୍ରୋଣ ଉପତ୍ୟକାରେ ଦଗ୍ଧ କଲେ। ¹⁷ଯଦ୍ୟପି ଇସ୍ରାଏଲ ମଧ୍ୟରୁ ଉଚ୍ଚସ୍ଥଳୀସବୁ ଦୂର କରାଗଲା ନାହିଁ, ତଥାପି ଆସାଙ୍କ ଅନ୍ତଃକରଣ ତାହାଙ୍କ ସମଗ୍ର ଜୀବନକାଳ ପର୍ଯ୍ୟନ୍ତ ସମ୍ପୂର୍ଣ୍ଣ ରୂପେ ଏକନିଷ୍ଠ ରହିଲା। ^a a v17 ଉଚ୍ଚସ୍ଥଳୀ ଥିଲା ପର୍ବତ-ଶୃଙ୍ଗସ୍ଥ ଦେବମନ୍ଦିର, ଯେଉଁଠାରେ ବଳିଦାନ, ପ୍ରାୟଶଃ ଦେବତାମାନଙ୍କ ଉଦ୍ଦେଶ୍ୟରେ ଉତ୍ସର୍ଗ କରାଯାଉଥିଲା। ¹⁸ଆଉ ସେ ଆପଣା ପିତାଙ୍କ ଉତ୍ସର୍ଗୀକୃତ ଦ୍ରବ୍ୟ ଓ ଆପଣାର ଉତ୍ସର୍ଗୀକୃତ ଦ୍ରବ୍ୟ, ଅର୍ଥାତ୍‍ ରୌପ୍ୟ, ସୁବର୍ଣ୍ଣ ଓ ପାତ୍ରସମୂହ ଆମ୍ଭମାନଙ୍କ ପିତାଙ୍କ ଗୃହକୁ ଆଣିଲେ। ¹⁹ପୁଣି ଆସାଙ୍କ ରାଜତ୍ଵର ପଞ୍ଚତ୍ରିଂଶ ବର୍ଷ ପର୍ଯ୍ୟନ୍ତ ଆଉ ଯୁଦ୍ଧ ହେଲା ନାହିଁ।