2 IZikhronike 15

15 ¹UMoya kaBaba wethu wehlela phezu kuka-Azariya, indodana ka-Odedi. ²Waphuma wayokuhlangabeza u-Asa, wathi kuye: “Ngizweni, Asa nani nonke bakwaJuda nabakwaBhenjamini: uBaba wethu unani ngesikhathi nina nisenaye. Uma nimfuna, niyakumthola; uma nimlahla, naye uyakunilahla. ³Isikhathi eside u-Israyeli wayengenaye uBaba wethu, engenaye umpristi ofundisayo, engenawo nomthetho. ⁴Ekuhluphekeni kwabo baphendukela kuBaba wethu, uNkulunkulu ka-Israyeli, bamfuna, bamthola. ⁵Ngalezo zikhathi akekho owayephephile kwabaphumayo nabangenayo, ngokuba isiyaluyalu esikhulu sabehlela bonke ababehlala emazweni. ⁶Isizwe sachoboza isizwe, nomuzi wachoboza umuzi, ngokuba uBaba wethu wabahlupha ngazo zonke izinhlobo zosizi. ⁷Kodwa nina, yibani namandla; ningadangali, ngokuba umsebenzi wenu uyakuvuzwa.”

⁸Kwathi u-Asa esewezwa la mazwi, isiprofetho sika-Odedi umprofethi, waqunga isibindi, wasusa izithombe ezinengekayo kulo lonke izwe lakwaJuda nelakwaBhenjamini, nasemizini ayeyithumbile ezintabeni zakwa-Efrayimi. Walungisa kabusha i-altare likaBaba wethu elaliphambi komnyango wethempeli lakhe. ⁹Wabutha bonke abakwaJuda nabakwaBhenjamini, kanye nalabo ababevela kwa-Efrayimi, nakwaManase, nakwaSimeyoni ababehlala phakathi kwabo, ngokuba abaningi kwa-Israyeli babeweleke kuye lapho bebona ukuthi uBaba wethu wayenaye. ¹⁰Babuthana eJerusalema ngenyanga yesithathu yonyaka weshumi nanhlanu wokubusa kuka-Asa. ¹¹Ngalolo suku benza umhlatshelo kuBaba wethu bethatha empangweni—izinkabi ezingamakhulu ayisikhombisa nezimvu eziyizinkulungwane eziyisikhombisa. ¹²Benza isivumelwano sokufuna uBaba wethu, uNkulunkulu wawokhokho babo, ngayo yonke inhliziyo yabo nangawo wonke umphefumulo wabo. ¹³Wonke umuntu owayengayikumfuna uBaba wethu, uNkulunkulu ka-Israyeli, wayeyakubulawa, kungaba omncane noma omkhulu, kungaba owesilisa noma owesifazane. ¹⁴Bafunga kuBaba wethu ngezwi elikhulu, ngokumemeza, nangamacilongo nangezimpondo. ¹⁵Bonke abakwaJuda bathokoza ngalesi sifungo, ngokuba bafunga ngayo yonke inhliziyo yabo, bamfuna ngaso sonke isifiso sabo, bamthola. UBaba wethu wabaphumuza nxazonke.

¹⁶INkosi u-Asa yamsusa unina uMahakha ekubeni yindlovukazi, ngokuba wayenze isithombe esinengekayo sika-Ashera; yasigawula, yasicolisa saba luthuli, yasishisa esigodini saseKidroni. ¹⁷Nakuba izindawo eziphakeme zingasuswanga kwa-Israyeli, inhliziyo ka-Asa yahlala izinikele ngokupheleleyo zonke izinsuku zokuphila kwakhe. ^a a v17 Izindawo eziphakeme kwakuyizindawo zokukhonzela eziphezu kwamagquma lapho kwakwenziwa khona imihlatshelo, ngokuvamile konkulunkulu bezizwe. ¹⁸Wangenisa endlini kaBaba wethu izipho uyise ayezinikele nezipho yena ayezinikele—isiliva, igolide, nezitsha. ¹⁹Kwakungekho mpi kwaze kwaba ngonyaka wamashumi amathathu nanhlanu wokubusa kuka-Asa.