Wazodi wa Mambu ma Bilumbu 15 FHB Father's Heart Bible™

15 ¹Kitembu kya Tata wetu kyakwísa hana thandu ya Aziya, mwana wa Odizi. ²Wálubuka mu kutundakana yi Asa amana wámuzimbwala: «Lunguyuka, benu Asa yi Yuta dyosu yi Benzyame: Tata wetu kenina yi benu bwosu benu lwenina yi yandi. Yuka ni lunsanda, lukámmona; yuka ni lummyambula, yandi kaluyámbula. ³Mukuma mu thangu yalonga, Kiseledi kákala konda Tata wetu, konda nganga Nzambi wisi longa, amana konda mitsiku. ⁴Muna kiwayi kya bawu, bávutuka kwena Tata wetu, Nzambi wa Kiseledi, bámusanda amana bámona. ⁵Muna matangwa mana, kákala konda luvuvamu kwena wuna kakala lubuka holo kakala kota, mukuma mvwalangani yalonga yábwa hana thandu ya batu boosu bana bázinga mu bitsi. ⁶Kanda dyánikumuna kanda dikwawu amana mbanza yánikumuna mbanza yikwawu, mukuma Tata wetu wábatula mu kiwayi kya mitindu myosu. ⁷Kaasi benu, lukala yi ngolu; lukatulaku kikesa, mukuma lukatámbula mfutu wa kisalu kyenu.»

⁸Buna Asa káyuka mazu mana, mbikutulu ya Odizi mbikudi, wábonga kikesa amana wákatula banzambi ba biteki ba nzanzi mu tsi yosu ya Yuta yi Benzyame, yi mu mbanza zina kábaka mu malondi ma Efwayimi. Wávutula mesa ma kimenga ma Tata wetu ku thwala ya mwelu wa nzu yandi. ⁹Wátedisa Yuta dyosu yi Benzyame, kumosi yi bana bátuka mu Efwayimi, Manase yi Simeyoni bana bázinga hana kati dya bawu, mukuma batu balawu ba Kiseledi básabuka kwena yandi buna bámona ni Tata wetu kákala yi yandi. ¹⁰Bákhokama ku Yelusalemi muna ngonda ya tatu, muna mvula ya kumi yi tanu ya kipfumu kya Asa. ¹¹Muna kilumbu kina bátambika kimenga kwena Tata wetu mu muluta—bangombi makhama tsambwadi yi mameme mafunda tsambwadi. ¹²Básya bulunda mu kusanda Tata wetu, Nzambi wa batata bawu, ni mbundu zawu zoosu yi moya myawu myosu. ¹³Wosu wuna kasandaku Tata wetu, Nzambi wa Kiseledi, bafwana kumuhonda, yuka wa khunda holo wa mbuta, yuka yakala holo mukhetu. ¹⁴Bádya ndefi kwena Tata wetu ni ndinga ya ngolu, ni kukalunga, yi mpungi yi mbila. ¹⁵Yuta dyosu dyásangwala kikuma kya ndefi, mukuma bádya ndefi ni mbundu zawu zoosu, bámusanda ni luzolu lwawu lwosu amana bámona. Amana Tata wetu wábaheka kuvunda ku mbandu zoosu.

¹⁶Kinga Asa wákatula phi ngudi yandi Maaka mu kukala ngudi wa pfumu, mukuma kásala mbunzu ya nzanzi kikuma kya Asela; wáyizengula, wáyinikuna tii yíkituka fusyangeni amana wáyiyokisa mu sambwa dya Setoni. ¹⁷Yuka ni bifulu bya zulu bikatuluku mu Kiseledi, mbundu ya Asa yásala yakangama mvimba mu bilumbu byandi byosu. ^a a v17 Bifulu bya zulu byákala bizika bya ha thandu ya mongu kuna bakala tambika makimenga, mbala mingi kwena banzambi ba biteki. ¹⁸Wánata mu nzu ya Tata wetu makabu mana tata wandi kánenginaya yi makabu mana yandi meni kánenginaya—mbongu, wolu yi bima. ¹⁹Amana mvita yákalaku tii yikuna mvula ya makumatatu yi tanu ya luyalu lwa Asa.