ኣሳ ንኣቦ ደልዩ ዕረፍቲ ረኸበ

ኣሳ ነቲ ናይ ጓኖት መሰውኢታትን በረኽትን ኣወገደ፤ እታ ምድሪ ድማ ንህንፃ ዝኸውን ዓሰርተ ዓመት ዕረፍቲ ረኸበት። ሚልዮን ዝኾነ ሰራዊት ኵሳውያን ምስ ደየበ፥ ፀሎቱ፥ ነቲ ሓይሊ ዘይብሉ ኻብ ሓያል ክትረድእ ዝኽእል ኣቦኡ ጥራሕ ምዃኑ እዩ ነይሩ — እቶም ኵሳውያን ከዓ ተሰባበሩ።

ምዕራፍ 14።

ኣብያ ምስ ኣቦታቱ ደቀሰ፤ ኣብ ከተማ ዳዊት ድማ ቀበርዎ። ወዱ ኣሳ ኸዓ ነገሰ፤ እታ ምድሪ ድማ ዓሰርተ ዓመት ሰላም ረኸበት። ኣሳ ድማ ኣብ ቅድሚ ኣቦና ፅቡቕን ቅኑዕን ነገር ገበረ። ነቲ ናይ ጓኖት መሰውኢታትን በረኽትን ኣወገደ፤ ሓወልትታት ሰበረ፤ ናይ ኣምልኾ ዓፀዳት ኣስታሮት ድማ ቈረፀ። ንይሁዳ ኸዓ ንኣቦና፥ ነቲ ኣምላኽ ኣቦታቶም፥ ክደልዩን ሕግን ትእዛዝን ክሕልዉን ኣዘዞም። ካብ ኵለን ከተማታት ይሁዳ ድማ ነቲ በረኽትን መዓጠኒ መሰውኢታትን ኣወገደ፤ እታ መንግስቲ ኸዓ ኣብ ትሕቲኡ ሰላም ረኸበት። እታ ምድሪ ሰላም ስለ ዝረኸበት፥ ኣብ ይሁዳ ዝተዓረዳ ኸተማታት ሰርሐ። ኣቦና ዕረፍቲ ስለ ዝሃቦ ኸዓ፥ በቲ ዓመታት እቱይ ውግእ ኣይገበረን። ንይሁዳ ድማ “ነዘን ከተማታት እዚኣተን ንስራሕ፤ ብመካበብያን ብግንብታትን ብመዓፁን ብመሸጐርን ከዓ ንኸበን። ንኣቦና ደሊናዮ ኢና እሞ፥ እታ ምድሪ ገና ናትና እያ፤ ደሊናዮ፥ ንሱ ኸዓ ኣብ ዙርያና ዅሉ ዕረፍቲ ሃበና” በሎም። ሰሪሖም ድማ ሰለጦም።

ኣሳ ኸዓ ዓብዪ ዋልታን ኲናትን ዝሓዙ ሰለስተ ሚእቲ ሽሕ ካብ ይሁዳ፥ ዋልታን ቀስትን ዝሓዙ ኽልተ ሚእትን ሰማንያን ሽሕ ካብ ብንያም ዘለዉ ሰራዊት ነበሮ፤ ኵሎም ሓያላት ጀጋኑ ነበሩ።

ዛራ እቲ ኵሳዊ ኸዓ ሚልዮን ሰራዊትን ሰለስተ ሚእቲ ሰረገላታትን ሒዙ ናብኣቶም ወፀ፤ ክሳዕ ማሪሳ ድማ ገስገሰ። ኣሳ ድማ ናብኡ ወፀ፤ ኣብ ለሰ ፄፋታ ኣብ ማሪሳ ኸዓ ንውግእ ተሰለፉ። ሽዑ ኣሳ ናብ ኣቦና ኣምላኹ ኸምዙይ ኢሉ ኣእወየ፦ “ኦ ኣቦ፥ ነቲ ሓይሊ ዘይብሉ ኻብ ሓያል ክትረድእ ዝኽእል ንስኻ ጥራሕ ኢኻ። ኣብ ልዕሌኻ ተኣማሚንና ኢና እሞ፥ ኦ ኣምላኽና፥ ርድኣና፤ ብስምካ ድማ ነዝ ብዙሕ ሰራዊት እዙይ ንገጥም ኣለና። ንስኻ ኣምላኽና ኢኻ፤ ሰብ ኣይስዓርካ።”

ኣቦና ድማ ነቶም ኵሳውያን ኣብ ቅድሚ ኣሳን ኣብ ቅድሚ ይሁዳን ወቕዖም፤ እቶም ኵሳውያን ከዓ ሃደሙ። ኣሳን ህዝቡን ድማ ክሳዕ ጌራራ ሰዓብዎም፤ እቶም ኵሳውያን ከዓ ኣብ ቅድሚ ኣቦናን ሰራዊቱን ስለ ዝተሰባበሩ፥ ሓደ እኳ ኽሳዕ ዘይተርፍ ወደቑ። ሰብ ይሁዳ ድማ ብዙሕ ምርኮ ዘመቱ። ኣብ ልዕሊአን ካብ ኣቦና ፍርሓት ስለ ዝወደቐ፥ ነተን ኣብ ዙርያ ጌራራ ዝነበራ ዅለን ከተማታት ወቕዕወን። ብዙሕ ምርኮ ኣብኣተን ስለ ዝነበረ ኸዓ፥ ንዅለን ከተማታት ዘመትወን። ነቲ ናይ ጓሶት ድንኳናትውን ወቕዑ፤ ብዙሕ ኣባጊዕን ኣግማልን ማሪኾም ድማ ናብ ኢየሩሳሌም ተመለሱ።