Asa pora Pitri ke chari kene Aram ke basi loise

Baasha logot te mukabila kora homoi, Asa tar Pitri ke nasudhi kene mondir laga chandi dikene Aram laga modot kinise. Hanani pora tai ke koise, amar Pitri laga suku khan pura prithibi te ghuri thake, Tai nimite pura mon dikene thaka mon khan bisari kene. Asa pora dorshi ke jail te bondh korise, aru pichete tar bemar thaka theng nimite Tai ke nohoi, daktor khan ke bisarise.

Adhyay 16.

Asa laga chotis-sa saal te, Israel laga raja Baasha tu Judah ke hamla korise, aru Judah laga raja Asa laga desh pora kun bhi ula bole aru ghusi bole na paribo nimite Ramah ke mojbut korise. Asa pora amar Pitri laga ghor aru raja laga ghor laga bhandar ghor khan pora chandi aru sona loi kene, Damascus te thaka Aram laga raja Ben-Hadad ke eitu kotha logote pathai dise: “Moi laga pitri aru tumar pitri majot te thaka nisina, moi aru tumi majot te ekta vachan thaki bole dibi. Sabi, moi tumi ke chandi aru sona pathai di ase. Etiya jabi aru Israel laga raja Baasha logot tumar vachan bhangai dibi, titia tai moi pora hati jabo.”

Ben-Hadad pora raja Asa logot mani loise, aru Israel laga sheher khan birodhe tar laga sena cmdr khan ke pathai dise. Tarkhan pora Ijon, Dan, Abel-maim, aru Naphtali laga sob bhandar sheher khan ke marise. Jitia Baasha pora eitu hunise, tai Ramah ke mojbut kora bondh korise aru tar kaam chari dise. Raja Asa pora pura Judah ke joma korise; Baasha pora Ramah ke mojbut kora pathor aru khuri khan ke tarkhan loi jaise, aru eitu khan logote tai Geba aru Mizpah ke mojbut korise.

Tetiya darshak Hanani tu Judah laga raja Asa logote ahhise aru tar ke koise, “Tumi Aram laga raja uporte bharosa korise aru tumar Pitri uporte nohoi, karne tar sena tumar hath pora polai jaise. Cushite aru Libyan khan tu gina bo napara rath aru ghora choda khan logote dangor ekta sena thaka nohoi? Tumi tumar Pitri uporte bharosa korise, karne Tai tarkhan ke tumar hath te di dise. Kilemane amar Pitri laga suku khan tu pura prithibi te sai ase, jun khan laga mon Tar logote pura di ase tarkhan ke takot dibole. Tumi eitu te murkho kaam korise; etiya pora tumar logote lorai khan thakibo.”

Asa eitu nimite darshak uporte khong uthise aru tar ke bondhi ghor te hali dise, kilemane eitu nimite tai tar uporte bisi khong thakise; hei somoi te tai kunba manuh khan ke bhi bisi dukh dise.

Asa laga kaam khan, shuru pora shesh tak, Judah aru Israel laga Raja khan laga Kitab te likha ase. Tar rajyo laga untalis-sa saal te, Asa laga theng te bemar hoise, aru hei bemar bisi bhoyanok thakise. Hoilebi tar bemar te bhi tai amar Pitri ke bisara nai, kintu khali daktar khan ke he bisarise. Tetiya Asa tar baba khan logote aram korise, aru tar rajyo laga ekchalis-sa saal te morise. Tarkhan pora tai ke tar nijor kobor te kobor dise, juntu tai nijor karne David laga Sheher te khundi kene banaise, aru hunar thaka khushbu bona manuh khan pora bonai diya alag-alag misha-mishi kora attar aru khushbu masala logote dhaka ekta mora-khat te tai ke rakhi dise, aru tar nimite dangor ekta jui jolaise. ^a