Asaei Bou jeiko Siria pienkei
Baasha khulimbo yola shanga, Asaei haobou to suma, chem thanshang ka chandinam leko Siria jongsak lekei. Hananiei hao to laukei, seneibü Bou you kho hao to maangpon pendouei kibü mütshuong lamla kaodak pendou chühsühda. Asaei hapbou kho haian phokei, hoba latetche haoeibü you mangshatjinei seneibü Bou lato mangshat haksotibü shuong lambei.
16 1Asa po khujinto lakboubüa Israelbü Choba Baashaei Jihuda khulimbo loukei, hoba Jihuda Choba Asa kaodak ka aoyoukei ahaula ayingsi atla shanga Rama kümbülekei. 2Asaei seneibü Bou chem hoba Chobaeibü chem thanshang ka chandinam hoba hon lekei, hoba Damaskaa kibü Siriabü Choba Benhadad jungto hai lauko hautikei, 3“Thangjam che seti kanglanga kiya, kübou si kabou kanglanga kikei tegü; chühashi, ngei chandinam hoba hon ka la jongsakda; hauashi, Israel Choba Baasha yoa kaibü thangjam kuklushi, kheijinei haoei kü ka lele to hauanlabü.”
4Hobaje Benhadadei Asa Choba to ngüha lekei, hoba Israel sangnyu shuong khulimbo haoeibü sepai tan leiyeibü shuong hautikei. Hoba haoenei Ijon, Dan, Abelmaim hoba Naftalieibü thanshang sangnyu pendou leilukukei. 5Hobaje ladang Baashaei kho ditkei, haoei Rama kümbüleibü nangkei, hoba haoeibü kümsilei apyokei. 6Hobaje Asa Chobaei Jihuda pendou huishaikei; hoba haoenei Baashaei Rama kümbüleibü laang hoba wa jungan satkei, hoba khübü yoa haoei Geba hoba Mizpa kümbülekei.
7Kheijinei Hanani hapbou Jihuda Choba Asa jungto loukei, hoba hao to laukei, “Nyi Siria Choba to mailembei, kaibü Bou to amailem, khoei haoeibü sepai tan kaibü ik ka satenkei. 8Kushbü hoba Libiabü aweenko kibü kailong hoba koli sepai yoa sepai tan yaangbü akitei lo? Aishanga nyi kaibü Bou to mailembei, haoei haoen kaibü ik to khümbo kukei. 9Aishanga maangpon khümboei hao yoa ngühmaanglanko kibü shuong hau kingaitila shanga, seneibü Boueibü nyekei kaodak pendou chühko kida. Nyi ho to ngoualoua küma; tou phaia nyi yoa wapyo kilabü.”
10Hobaje Asaei hapbou khulimbo khauangkei hoba hao thüngdang to mojikei, aishanga haoei ho shanga hao to aeibou maangpokkei; tokei kho jihsiphaia haoei müt atei to aeibou khonkutikei.
11Tou Asaeibü kümsilei, shaangbou ka thonbou sühko, Jihuda si Israelbü Choba shuong Lüngbüdobü lea doan kia. 12Asa songdak po khujinto güboubüa haoeibü you to mou longkei, hoba kho mou aeibou kaangkei. Khei yingasikei haoeibü shat ongkei haoei seneibü Bou to alam, lausikei shat maibü shuong lolo lambei. 13Kheijinei Asaei haoeibü bousi shuong yoa yepbei, haoeibü songdak po saonyito che boubüa haikei. 14Haoenei hao Dawid sangnyua jembü shanga jakbü haoeibü hee to khünkei, hoba shikmei hoba ponlem kümbü thit thitbüei lamlebü phang phang naanglabü onang naanglepbü shen thüka hao yeptikei, hoba hao shanga wan yaangbü che jikkei. a a v14 Wan yaangbü kho Choba nyensang shanga shikmei juokbü kikei; kho müt juokbü aying, khübü Israelbüei aküm.
