Asai Tebu senzüka Aram shimtet
Baasha anema alidang, Asai pei Tebu dang mayimtena, Tebu ki taribi agi Aram yimjung akar. Hananii pa dang ashi, asen Tebu tenüki alima ajaklen reprangdak, pa dang pei mulung ajak agi sempetba nisungtem yongya-a. Asai aji ainkar tsüngden chiok, aser tanaben pei teyonga memerükba asoshi pa madak masü, saka tesamadaktsüertem bushi.
16 1Asa chubatsü küm semer-trokbuba nung, Israel chuba Baashai Yihuda anema atu, aser Yihuda chuba Asa linük nungi shibaisa adoktsü mesüra aitsü manüngtsü asoshi, pai Rama nung ki yanglu. 2Asai Tebu ki aser chuba ki terizüngdak nungi taribi aser hon bendena, Damaska nung aliba Aram chuba Ben-hadad dangi iba osang yoka ashi: 3“Ana tsüngda nung yimjung ka aliang, kübu aser nebu tsüngda nung yimjung liasüba ama. Ajiang, ni ne dangi taribi aser hon yokdi. Tang oa, Israel chuba Baasha den ne yimjungji raksa-ang, idangji pai ni nungi atsünga aotsü.”
4Ben-hadadi Asa chuba dang anga, aser Israel yimtitem anema pa temeranger telok tanishirtem yoka. Parnoki Ijon, Dan, Abel-maim, aser Naftali terizüngdak yimtitem ajak amak. 5Kodang Baashai aji angashi, pai Rama nung ki yangluba anen, aser pei tasena senzüka toktsü. 6Asa chubai Yihuda ajak ayongten; aser Baashai Rama ki yangluba lung aser süngpak parnoki bener ao, aser idak agi pai Geba aser Mizpa ki yanglu.
7Idangji tangur Hananii Yihuda chuba Asa dangi arua pa dang ashi, “Nai ne Tebu dak masü Aram chuba dak tashia alinung, pa temeranger telok ne ket nungi aenshia aogo. 8Kus nunger aser Libia nungeri talungtsü aser kor anishirtem mezüngdangteti den temeranger telok tulu masü no? Aji saka nai ne Tebu dak tashia alinung, pai parnok ne ket nung bendanga agütsü. 9Kechiaser Tebu tenüki, mulung pa den ochishia aliba parnok ajungshitsü asoshi, alima ajak nükzüka reprang. Nai iba nung tamashi inyakogo; tang nungi na dang rara alitsü.”
10Iba indang Asai tangur anema ain adoka, pa tepuokdak nung puok, kechiaser pai iba indang pa dang kanga rasa liasü. Aser iba mapang nung pai ano nisung karitem kanga kangshi.
11Asa mapatem, mezüngbuba nungi tatembangbuba tashi, Yihuda aser Israel chubatem kaket nung zülua lir. 12Pa chubatsü küm semer-tukububa nung, Asa tsüng nung komo adok, aser komoji kanga sashia liasü. Aji saka pa shirangba nungbo pai Tebu mebushi, saka shirang anebtsürtembo bushi. 13Idangji Asa pa chubatsü küm pezü ser ka nung asü, pei tebutem den mejang. 14Parnoki pa Dawid yimti nung pei asoshi kusaba leper nung arem. Aser teronem yanglurtem shisatsürtemi renemba teronem aser tapu jenti temezüba liangmesen agi sübanga yipten nung pa menden, aser pa asoshi mi tulu ka arong. a a v14 Mi tulu ajii chuba sentsüwangshi asoshi teronem rong; ibai tetemsü rongtsüba masü, aji Israel nungeri meinyak.