Kolosaliklarga salom

Pavlus Masihning hamma narsa ustidan oliy ekanini ulugʻlaydi va Uni kamsitmoqchi boʻlgan quruq falsafalardan ogohlantiradi.

1-bob.

Otamizning irodasi bilan Iso Masihning havoriysi boʻlgan Pavlusdan va birodarimiz Timoʻtiydan — Kolosadagi Masihga mansub muqaddas va sodiq birodarlarimizga: Otamizdan sizlarga inoyat va tinchlik boʻlsin.

Imoningiz uchun shukr

Biz sizlar uchun ibodat qilganimizda, Rabbimiz Iso Masihning Otasi boʻlgan Otamizga doimo shukr aytamiz. Chunki biz sizlarning Iso Masihga boʻlgan imoningiz va barcha azizlarga boʻlgan sevgingiz haqida eshitdik. Sizlar uchun osmonda saqlanayotgan umid tufayli shunday qilamiz; bu umid haqida sizlar haqiqat kalomida — Xushxabarda allaqachon eshitgansizlar. Bu Xushxabar sizlarga ham yetib keldi va butun dunyoda meva berib, oʻsib borayotgani kabi, sizlar Otamizning inoyati haqida eshitib, uni haqiqatan tushungan kundan beri sizlarning oranglarda ham meva berib, oʻsib bormoqda. Sizlar buni bizning suyukli xizmatdoshimiz Epafrasdan oʻrgandingiz. U biz uchun Masihning sodiq xizmatchisidir va u bizga sizlarning Muqaddas Ruhdagi sevgingiz haqida aytib berdi.

Shuning uchun biz bu haqda eshitgan kundan beri sizlar uchun ibodat qilishdan toʻxtamadik. Biz sizlar har xil ruhiy donolik va idrok bilan Uning irodasini bilishga toʻla boʻlishingizni soʻrab ibodat qilamiz. Shunda sizlar Rabbimizga loyiq yashab, Uni butunlay mamnun qilasizlar; har bir ezgu ishda meva berib, Otamizni bilishda oʻsib borasizlar. Uning ulugʻvor qudrati bilan har tomonlama kuchayib, har qanday qiyinchilikka quvonch bilan bardosh berib, sabr-toqat koʻrsatasizlar. Sizlarni nurdagi azizlarning merosidan bahramand boʻlishga loyiq qilgan Otamizga shukr aytasizlar. U bizni zulmat hukmronligidan qutqarib, Oʻzining suyukli Oʻgʻlining Shohligiga olib kirdi. Biz Unda najotga, yaʼni gunohlarning kechirilishiga egamiz.

Hamma narsadan ustun boʻlgan Oʻgʻil

U koʻzga koʻrinmas Otamizning surati, butun yaratilishning toʻngʻichidir. ^a Chunki hamma narsa Unda yaratildi — osmondagi va yerdagi, koʻrinadigan va koʻrinmaydigan narsalar, taxtlar, hukmronliklar, kuchlar, hokimiyatlar — hammasi U orqali va U uchun yaratildi. U hamma narsadan avval mavjud va hamma narsa Unda birlashib turibdi. U tananing, yaʼni jamoatning boshidir. U ibtido, oʻlimdan tirilganlarning toʻngʻichidir; toki hamma narsada birinchi oʻrinda U boʻlsin. Chunki Otamiz Oʻzining butun toʻliqligi Oʻgʻilda yashashini maʼqul koʻrdi va U orqali, xochda toʻkilgan qoni orqali tinchlik oʻrnatib, yerdagi boʻlsin, osmondagi boʻlsin — hamma narsani Oʻzi bilan yarashtirishni maʼqul koʻrdi.

Bir vaqtlar sizlar yovuz ishlaringiz tufayli Otamizdan uzoqlashgan va fikr-oʻyingizda Unga dushman edingiz. Ammo endi Otamiz sizlarni Masihning jismoniy tanasi orqali, Uning oʻlimi bilan Oʻzi bilan yarashtirdi; toki sizlarni Oʻz huzurida muqaddas, benuqson va ayblanishdan xoli qilib keltirsin. Faqat sizlar imonda mustahkam va barqaror turib, eshitgan Xushxabaringizning umididan chetga chiqmasangizgina shunday boʻladi. Bu Xushxabar osmon ostidagi butun borliqqa eʼlon qilindi va men, Pavlus, uning xizmatchisi boʻldim.

Pavlusning jamoat uchun chekkan azoblari

Endi men sizlar uchun chekayotgan azoblarimdan quvonaman va Masihning tanasi, yaʼni jamoat yoʻlida Masih chekkan azoblarning hali kam qolgan qismini oʻz tanamda toʻldiraman. ^b Otamiz sizlar uchun menga bergan vazifaga koʻra, men jamoatning xizmatchisi boʻldim; bu vazifa — Otamizning kalomini toʻliq eʼlon qilishdir. Bu sir asrlar va avlodlar davomida yashirin edi, ammo endi Uning muqaddas xalqiga oshkor qilindi. Otamiz ularga bu sirning gʻayriyahudiylar orasidagi ulugʻvor boyligini oshkor qilishni maʼqul koʻrdi; bu sir — sizlarning ichingizdagi Masih, yaʼni ulugʻvorlik umididir. Biz Uni eʼlon qilamiz; har bir insonni Masihda yetuk qilib keltirish uchun, butun donolik bilan har kimni ogohlantirib, hamma kishiga taʼlim beramiz. Men ana shu maqsadda mehnat qilaman; Otamiz menga bergan va ichimda shunchalik qudrat bilan taʼsir etayotgan butun kuch bilan kurashaman.