Kolosse manuh khan ke salam

Paul pora sob jinis uporte Khrista laga sob pora dangor sthan ke uthai ase, aru Taike chuta kori dibole khali gyan khan pora hoshiyar thakibole koi ase.

Adhyay 1.

Paul, amar Pitri laga itcha pora Khrista Jisu laga ekjon apostle, aru amar bhai Timothy pora, Kolosse te thaka Khrista te pobitro aru biswasi bhai-bhoini khan ke: amar Pitri pora tumikhan ke anugrah aru shanti thaki bole.

Tumikhan laga biswas nimite dhanyavad

Amikhan hodai amar Pitri, amar Prabhu Jisu Khrista laga Pitri ke dhanyavad di ase, tumikhan nimite prathana kori kene, kilemane amikhan tumikhan laga Khrista Jisu te biswas aru sob pobitro manuh khan nimite tumikhan laga morom laga kotha hunise, sorgot te tumikhan nimite rakhi diya asha nimite, juntu tumikhan age pora hosa laga kotha, susamachar te hunise, juntu tumikhan logot ponchise, aru tumikhan laga majot te kineka hoise, tineka pura prithibi te phol dhori kene aru bari ase, jun din pora tumikhan hunise aru amar Pitri laga anugrah hosa pora bujise. Tumikhan eitu Epaphras, amar morom laga sangi noukar, amikhan laga naam te Khrista laga ekjon biswasi sewak pora sikhise, aru tar he Pobitro Atma te tumikhan laga morom laga kotha amikhan ke koise.

Etiya, jun din pora amikhan hunise, amikhan tumikhan nimite prathana kora rukha nai, sob atmik gyaan aru bujhdari te Tar itcha laga gyaan pora tumikhan ke bhorta hobole mangi ase, titia tumikhan Prabhu laga jukti thaka nisena berabo, Tar ke pura khushi kori kene, sob bhal kaam te phol dhori kene aru amar Pitri laga gyaan te bari jabo, Tar mahima thaka takot pora sob shakti te takot pai kene, khushi logot sob dhorjo aru soburi nimite, amar Pitri ke dhanyavad di kene, jun pohor te pobitro manuh khan laga uttoradhikar te bhag lobole tumikhan ke jukti banaise. Tar he amikhan ke andhar laga raj pora bachai loise aru amikhan ke Tar morom laga Putro laga rajyo te anise, Jun te amikhan mukti, paap khan laga maph pai ase.

Sob jinis uporte Putro

Tar he dikhi napara amar Pitri laga protimurti ase, sob srishti uporte prothom jonom. ^a Kilemane sob jinis Tar te bonaise—sorgo aru prithibi te thaka jinis khan, dikhi para aru dikhi napara, singhason khan, raj khan, shakti khan, adhikar khan—sob Tar dwara aru Tar nimite bonaise. Aru Tar he sob jinis age te ase, aru Tar te sob jinis eke logot thaki ase. Tar he gaw laga, mondoli laga matha ase. Tar he shuruwat ase, mora pora prothom jonom, titia sob jinis te Tar he prothom jagah pabo. Kilemane amar Pitri Tar sob bhorta Putro te thakibole khushi hoise, aru Tar dwara sob jinis nijor logot milai dibole, prithibi te thaka jinis hoilebi sorgo te thaka jinis hoilebi, Tar krus laga khoon pora shanti bonai kene.

Age te tumikhan amar Pitri pora dur te thakise, tumikhan laga bhabona te dushman, tumikhan laga paap kaam khan nimite. Kintu etiya amar Pitri tumikhan ke Khrista laga gau-mangso laga gaw te mora dwara milai loise, tumikhan ke Tar age te pobitro, golti nathaka, aru dukh dibole napara bonai dibole, jodi tumikhan hosa pora biswas te thaki thake, bhetimul aru mojbut, tumikhan huna susamachar laga asha pora na hili kene, juntu sorgo laga nicher sob srishti te prachar hoise, jun laga moi, Paul, ekjon sewak hoise.

Mondoli nimite Paul laga dukh

Moi etiya tumikhan nimite moi laga dukh te khushi kori ase, aru Khrista laga dukh khan te etiya bhi komti thaka jinis moi laga gau-mangso te pura kori ase, Tar gaw, mondoli nimite. ^b Moi amar Pitri pora tumikhan nimite moi ke diya kaam dwara eitu laga sewak hoise: amar Pitri laga kotha pura prachar koribole. Juntu lukai thaka kotha jug jug aru purukh khan tak lukai thakise kintu etiya Tar pobitro manuh khan ke dikhai dise. Tarkhan ke amar Pitri Porjati khan majot te eitu lukai thaka kotha laga mahima thaka dhun dikhai dibole basi loise, juntu tumikhan te Khrista ase, mahima laga asha. Amikhan Tar ke prachar kori ase, sob gyaan pora sob manuh ke hoshiar kori kene aru sikhai kene, sob manuh ke Khrista te siddho hoi kene age te rakhibole. Eitu nimite moi mehnat kori ase, amar Pitri pora diya sob takot pora lorai kori kene, juntu moi bhitor te eneka shakti pora kaam kori ase.