Paul pora tarkhan karne kori thaka kathin kaam

Kitia bhi nadikha biswasi khan nimite Paul pora prarthana te bisi kosto kore, tarkhan Khrista te jor dhori thakibo koi kene, chalak gyaan, khana laga niyom, nohoile sorgodoot laga darshan pora dhori luwa nahoi. Tarkhan uporte thaka rin laga hisab tu age pora cross te perek mari dise; amar Pitri pora tarkhan ke Khrista logote jinda kori uthai dise.

Adhyay 2.

Moi tumikhan karne, Laodicea te thaka khan karne, aru moi ke nijor suku pora kitia bhi dekha nai thaka sob khan karne kiman kathin kori ase, eitu tumikhan janibo moi itcha kore, titia tarkhan laga mon bhorsa pabo, morom te eke logote bandhi hobo, aru pura biswas aru bujhi bo laga pura dhan sob te ahhibo — amar Pitri laga lukai thaka kotha, juntu Khrista ase, eitu laga gyaan te ahhibo, kun laga bhitor te buddhi aru gyaan laga sob dhan lukai kene ase. Kun bhi manuh pora mitha kotha di kene tumikhan ke thogabo na pare, eitu karne moi eitu koi ase. Moi gau-mangso pora dur te thakile bhi, atma pora moi tumikhan logot te ase, aru tumikhan laga bhal niyom aru Khrista te thaka tumikhan laga biswas laga mojbut dekhi kene khushi ase.

Tar bhitor te shikor loi kene aru bona hua

Etiya, tumikhan Prabhu Khrista Jisu ke grohon kora nisena, Tar bhitor te bera bi, Tar bhitor te shikor loi kene aru bona hoi kene, sikhai diya nisena biswas te mojbut hoi kene, aru dhanyavad pora bhorta hoi kene.

Sabi, kun bhi manuh pora gyaan laga kotha aru khali thoga pora tumikhan ke dhori bo na pare, juntu manuh laga niyom hisab te, prithibi laga mula atma khan hisab te ase, Khrista hisab te nohoi. ^a Kilemane Isor laga pura purota Tar bhitor te gau-mangso rup te thake, aru Tar bhitor te tumikhan ke pura kori dise, juntu Tar he sob sason aru adhikar uporte matha ase. Tar bhitor te tumikhan ke bhi sunnot kori dise — hath pora nabona sunnot — gau-mangso laga gau ulai phela — Khrista laga sunnot. ^b Baptizma te Tar logote tumikhan ke kobor dise, aru juntu te amar Pitri laga takot te biswas kori kene Tar logote tumikhan ke bhi uthai dise, juntu pora Tar ke mora pora jinda kori uthaise. Tumikhan laga paap aru sunnot nakora gau-mangso te tumikhan mori thakise, kintu amar Pitri pora tumikhan ke Tar logote jinda kori dise, aru amikhan laga sob paap maph kori dise, amikhan birodh te thaka dhar laga chithi, tar niyom khan logote, eitu mitai dise. Eitu ke Tar pora hatai dise, aru Cross te mari kene lagai dise. Tar pora sason kora khan aru adhikar khan laga hathiyar chingi loi dise aru manuh khan age te taikhan ke sorom khila dise, Tar bhitor te taikhan uporte jit paise.

Etiya kha-luwa, pani kha, purbo, notun chand, nahole Sabbath din laga kotha te kun bhi manuh pora tumikhan ke bisar nakoribi. Eitu khan ahhibole thaka jinis khan laga chaya ase, kintu asol tu Khrista laga ase. Misa nomro aru sorgoduth khan ke puja kora te khushi kori kene, tai dekha darshan khan te mon di kene, tai laga gau-mangso laga mon pora eku karan nathaki kene phutani kora, eneka kun bhi manuh pora tumikhan laga inam loi jabo nadibi, aru juntu Matha ke dhori narakhe, kun pora pura gau, hur aru rog khan dwara khabai kene aru jurai kene, amar Pitri pora aha dangor hua pora dangor hoi.

Jodi tumikhan Khrista logote prithibi laga mula atma khan nimite mori jaise, tene hole kele, etiya bhi prithibi laga ekta nisena, tumikhan tar niyom khan mani thake? “Hath nadhuribi, nachakhibi, na chubi”? Eitu khan sob cholai kene khotom hoi jai, kilemane eitu khan manuh laga hukum aru sikhai laga uporte bona ase. Eitu niyom khan — nijor pora bonai diya puja, misa nomro, aru gau ke dukh diya — eitu khan buddhi thaka nisena lage, kintu gau-mangso laga itcha ke rukhabole eku daam nai.