Paulwui Ngarar Athumwui Vang eina
Paulna mangāli matheilaka shitkasangbingwui vang seihāli hotnailak eina sāra, athum pheichumngasak philosophy, zāthui ain, kazingrao mahākhami eina matsaksāla Khristali lungthāksanga ngasakshapra. Athumwui kokkhamang lairik chi crossli kakhonghaira; ithumwui Avāna athumli Khrista zangda ringshokluihaira.
2 1Ina nathumwui vang, Laodiceali khaleibing kala ili phasā eina masamphanglakbing saikorawui vang eina, kathada panglāk eina ngararra kaji nathumna theikhavai ina ningchānga. 2Chithākha athumwui wuklung kasatsang ngasak khavai, leikashili ngarumda sākazak khavai, kala ningsanglak kala theishingkakhuiwui kashāng saikora samphang khavai, chiya ithumwui Avāwui ngathum kahai Khrista chi theikakhui samphang khavaina. 3Awuili thangkhamei kala theikakhuiwui lan saikora ngathumda lei. 4Khipānakha suikaphanep tui eina nathumli mathānngui ngasakhao khavai, ina hi kahāngna. 5Iphasāna nathumwui eina katāva̱li leisālala, manglā eina nathumli ngasopamda lei, kala nathumwui mathasek kala Khristali nathumwui shitkasang nganingtit chi theida ina ringphai.
Awuili Shimphung Sa̱titta kala Sāngakar
6Chiwui vang eina nathumna Proho Khrista Jishuli khuikahai thada, awui lungli ringlu. 7Awuili shimphung sa̱titta kala sāngakarhaida, tamchithei kahai thada shitkasangli nganingtitta, ningkashi eina pemtinghailu.
8Khipānakha mikumowui thangkhamei kala arema mikhanam eina, miwui khangachā athishurda, okathuiwui apuk-apagawui manglā athishurda, Khrista athishurda maningla, nathumli matukkhui khavai ning ngasharlu. a a v8 Okathuiwui apuk-apagawui manglā: Khristawui eina katāda mibingli tukkhui ngasak kaji manglāwui pangshapbing kala angayung shiyanbing. 9Kaja Varewui khangachā katonga chi phasā khangachā eina awuili lei, 10kala awuili nathum pem ngasakhaira, a khangam kala pangshap saikorawui akhavāna. 11Awuili nathumla ahui rimshokhaira; pāng eina masākapai ahui rimshok, phasāwui asā khuithui eina, chiya Khristawui ahui rimshokna. b b v11 Pāng eina masākahai ahui rimshok: phasā kakā khokharum ot maningla, wuklungli manglā kadhar onhai chi. 12Ra̱hik einava awui lungli ngasoda chifarumhaida, chili nathumla ali kathiwui eina ringshok ngasak kahai ithumwui Avāwui pangshapli shitkasang eina awui lungli ngasoda ringkhaluihaira. 13Nathumwui morei kala ahui marimkashok phasāli nathum thida leisai, kha ithumwui Avāna nathumli awui lungli ngasoda ringngasakhaira, ithumwui morei saikora pheomihaida, 14ithumwui aworli kahapa awui shiyanbing eina ngasoda kaikashe leiman kapi chi kha-yangkheimida, ana hili katāhailaga krushli kāpsangmihaowa. 15Ana khamungabing kala pangshap kasingbingwui raisāri khuithuihaida, athumli phonglāk eina khayak ngasakhaida, awui lungli athumwuitungli ngararkhuihaowa.
16Chiwui vang eina kashakazā, kazang, phanit, kachāng kadhar, lah Sabbathwui vang eina khipānakha nathumli bichar masāpaimana. 17Hikathā hi rāki kaji otbingwui khaya̱ mānga, kha khamashung chi Khristawuina. 18Mikhanam khangahui kala kazingraobingli khorum sāda ringphāda, awui theida khamahā chili ning parlaga, awui phasāwui ning eina maram maleila langsolaga khalei mi khipānakha nathumwui sāman shimān ngasakalu, 19kala Akhavāli masingtitla, awui eina phasā katonga angating kala khayaikhamilung eina phauira ngashik ngarokta, ithumwui Avā eina kharā reisang eina reisang ngasaka.
20Nathumna Khristali ngasoda okathuiwui apuk-apagawui manglābingli thihaiakha, chithākha okathuiwui mi thada khalei thada, khisāda chiwui shiyanbingli hamsangkhala? 21"Masingalu, mamazapalu, masāza̱alu"? 22Hikathā saikora sakta shimānra, khikhalajila mikumowui ningkhami kala tamkachithei athishurda leira. 23Hikathā shiyanbing hi mi khalattawui sākhui khorum, mikhanam khangahui, kala phasāli sāshi kasā eina, thangkhamana da phaningla, kha phasāwui khamathang ngalan khavai tongkazā maleimana.
