Mvita ya Pholu kikuma kya bawu
Pholu wazonza phasi mu lusambulu kikuma kya bakwikidi bana kangananga ha mesu, mu kuzola ni bazyama mwena Kidisitu, kaasi ka ni bakwatama ha mutambu mu nduka za batu, mu mikuku mya madya, holo mu mbona mesu ya banzyo. Mukhanda wa pfuka wuna wubafundaka wukhokama holo hana kitakani; Tata wetu wabafutumuna hakimosi yi Kidisitu.
2 1Nzodi ni luzaya khi mutindu mbati diheka phasi kikuma kya benu, kikuma kya bana benina ku mbanza ya Lawodise, yi kikuma kya boosu bana bisiku ngana ha mesu, 2ndangu mbundu zawu zavutwa kikesa, zazyama hakimosi mu lungongu, amana bakota mu kimvwama kyosu kya kikumbwala kyabasa yi kubakisa, mu kuzaya kitsweki kya Tata wetu, kyenina Kidisitu, 3mwena yandi mwiswekama kuvwa kwosu kwa nduka yi mazaya. 4Mbati zonza bwabu ndangu ka mutu ku kalulembika mu mambu ma kukwikisa. 5Mbatanana yeninahoku mu lutu, yenina yenu mu kitembu, yi kyesi mu kumona lukutakanu lwenu lwabukheti yi kuzyama kwa lukwikilu lwenu mwena Kidisitu.
Ba kutunga yi ba kuzyama mwena yandi
6Buna, bwosu lwátambula Kidisitu Yesu, Pfumu, zingilenu mwena yandi, 7ba kutunga yi ba kuzyama mwena yandi, luzyama mu lukwikilu bwosu lwálonguka, luvutwala matondu lawu.
8Kebenu ni ka mutu ku kalubonga mu nduka za batu yi mu luvunu lwa phamba, mina misi landa mikuku mya batu, mina misi landa bitembu bya tsi, kaasi ka mina misi landa Kidisitu ku. a a v8 Bitembu bya tsi: ngolu za kitembu yi malongi ma theti mana masi simba batu konda Kidisitu. 9Mukuma mwena yandi mwisi zingila bunzambi bwosu mu lutu, 10amana mwena yandi lwálungila, yandi wenina mutwa ha thandu ya biyeka byosu yi ya luyalu lwosu. 11Mwena yandi lwázengila phi mukhanda, mukhanda wukondi sala mu moku, mu kukatula lutu lwa musuni, disongidila mukhanda wa Kidisitu. b b v11 Mukhanda wukonda sala mu moku: kuviluka kwa mbundu kwa kitembu, kaasi ka tsadidi ya lutu ku. 12Lwázikama hakimosi yi yandi mu mbotika, mwamuna lwáfutumuka phi hakimosi yi yandi mu lukwikilu lwa ngolu za Tata wetu, wuna wámufutumuna ku bafwa. 13Lwákala bafwa mu masumu menu yi mu musuni wukondi zengila mukhanda, kaasi Tata wetu wáluzingisa hakimosi yi yandi, mu kulolula masumu metu moosu, 14mu kuzima mukanda wa pfuka za betu yi mikuku myawu, mina myákala mu kufundisa betu. Wáyambula mukanda wawu, mu kuwukhoka ha kitakani. 15Wádisa biyeka yi luyalu lwa ngolu zawu, amana wábasisa tsoni ha mesu ma batu boosu, mu kubanunga mwena yandi.
16Buna ka mutu ku kalufundisa kikuma kya bya kudya, kya bya kunwa, kya mukinzi, kya ngondi ya pha keti kya kilumbu kya Saba. 17Byabina byenina kivula kya bima bina byakwísa, kaasi kyedika kyenina kya Kidisitu. 18Ka mutu ku kalubotula lufutu lwenu mu kusangwala mu dikulumuna dya luvunu yi mu kusambila bawanzyo, mu kudihana ku mbona mesu kámona, mu kuzakama yi lulendu lwa phamba kikuma kya mabanza mandi ma musuni, 19amana kisi simbidila mutwa ku, mwena yandi mwisi tuka lutu lwosu, lwisi tambula madya amana lwenina ba kuzyamisa mu bikhosu yi mu misinga, amana lwisi kula mu kukula kwa Tata wetu.
20Yuka ni lwáfwa hakimosi yi Kidisitu mu bitembu bya tsi, kikuma kya biki, bwosu lwenina kaka bitini bya tsi, lwisi yukila mikuku myawu? 21«Kusimbaku, kuyedikaku, kubwetaku»? 22Byabina byosu byazíluka mu kusadila byawu, mukuma byenina ba kulanda mitsiku mya batu yi malongi ma batu. 23Mikuku mina misi monika mya nduka: kusambila kwa batu kwa bawu-bawu, dikulumuna dya luvunu, kunyokuna lutu, kaasi myenina mya phamba mu kukandisa mbongi ya musuni.
