ቈላስይስ 2

2 ¹ስለ እናንተ፣ በሎዶቅያም ስላሉት፣ በአካል ላላዩኝም ሁሉ ምን ያህል እንደምጋደል እንድታውቁ እወዳለሁ፤ ²ይኸውም ልባቸው እንዲጽናና፣ በፍቅር እንዲተሳሰር፣ የተሟላ እርግጠኝነትና ማስተዋል ባለው ባለጠግነት ሁሉ ውስጥ እንዲገባ፣ ክርስቶስ ወደ ሆነው ወደ አባታችን ምሥጢር ዕውቀትም እንዲደርስ ነው፤ ³የጥበብና የዕውቀት ሀብት ሁሉ በእርሱ ተሰውሮአል። ⁴ማንም በሚያባብል ንግግር እንዳያስታችሁ ይህን እላለሁ። ⁵በሥጋ ብርቅም እንኳ፣ በመንፈስ ከእናንተ ጋራ ነኝ፤ መልካም ሥርዓታችሁንና በክርስቶስ ያላችሁን የጽኑ እምነት አይቼ ደስ ብሎኛል።

በእርሱ ሥር ሰድዶ መታነጽ

⁶እንግዲህ ጌታን ክርስቶስ ኢየሱስን እንደ ተቀበላችሁት በእርሱ ተመላለሱ፤ ⁷በእርሱ ሥር ሰድዳችሁና ታንጻችሁ፣ እንደ ተማራችሁት በእምነት ጸንታችሁ፣ ምስጋናም እያበዛችሁ ኑሩ።

⁸እንደ ሰው ወግ፣ እንደ ዓለም መሠረታዊ መናፍስት እንጂ እንደ ክርስቶስ ባልሆነ ፍልስፍናና ከንቱ ማታለል ማንም እንዳይማርካችሁ ተጠንቀቁ። ^a a v8 የዓለም መሠረታዊ መናፍስት፦ ከክርስቶስ ውጭ ሰዎችን ማርከው የሚይዙ መንፈሳዊ ኀይላትና መሠረታዊ መርሖዎች ናቸው። ⁹የመለኮት ሙላት ሁሉ በሥጋ ተገልጦ በእርሱ ይኖራልና፤ ¹⁰ለአለቅነትና ለሥልጣን ሁሉ ራስ በሆነው በእርሱም ሙሉ ሆናችኋል። ¹¹በእርሱም ደግሞ ተገረዛችሁ፤ ይህም በእጅ ያልተደረገ፣ የሥጋን ሰውነት የሚያስወግድ፣ የክርስቶስ መገረዝ ነው። ^b b v11 በእጅ ያልተደረገ መገረዝ፦ ሥጋዊ ሥርዓት ሳይሆን የልብ መንፈሳዊ መለወጥ ነው። ¹²በጥምቀት ከእርሱ ጋራ ተቀበራችሁ፤ በእርሷም ከሙታን ባስነሣው በአባታችን ኀይል በማመን ከእርሱ ጋራ ተነሣችሁ። ¹³በኀጢአታችሁና ባልተገረዘ ሥጋችሁ ሙታን ነበራችሁ፤ አባታችን ግን ኀጢአታችንን ሁሉ ይቅር ብሎ ከእርሱ ጋራ ሕያዋን አደረጋችሁ፤ ¹⁴ይቃወመን የነበረውን ከትእዛዛቱ ጋራ ያለውን የዕዳ ጽሕፈት ደመሰሰ፤ በመስቀልም ላይ ቸንክሮ ከመንገድ አስወገደው። ¹⁵አለቆችንና ሥልጣናትን ትጥቅ አስፈታ፤ በእርሱም ድል ነሥቶ በግልጥ አዋረዳቸው።

¹⁶እንግዲህ በመብል ወይም በመጠጥ፣ ወይም ስለ በዓል፣ ስለ ወር መባቻ ወይም ስለ ሰንበት ማንም አይፍረድባችሁ። ¹⁷እነዚህ ሊመጡ ያሉት ነገሮች ጥላ ናቸው፤ አካሉ ግን የክርስቶስ ነው። ¹⁸በውሸት ትሕትናና በመላእክት አምልኮ ደስ እያለው፣ ባየው ራእይ ላይ እያተኰረ፣ በሥጋዊ አሳቡ በከንቱ የተነፋ ማንም ዋጋችሁን አያሳጣችሁ፤ ¹⁹እንዲህ ያለው ራስ የሆነውን አጥብቆ አልያዘም፤ ሰውነት ሁሉ በመጋጠሚያዎችና በጅማቶች እየተመገበና እየተያያዘ ከአባታችን በሆነ ዕድገት ከእርሱ ያድጋልና።

²⁰ለዓለም መሠረታዊ መናፍስት ከክርስቶስ ጋራ ከሞታችሁ፣ ገና የዓለም አካል እንደ ሆናችሁ ለሥርዓቶቹ ስለ ምን ትገዛላችሁ? ²¹“አትያዝ፤ አትቅመስ፤ አትንካ” የሚሉትን? ²²እነዚህ ሁሉ በመጠቀማቸው የሚጠፉ ናቸው፤ ይኸውም በሰው ትእዛዝና ትምህርት ላይ የተመሠረቱ ስለ ሆኑ ነው። ²³እነዚህ ሥርዓቶች በፈጠራ አምልኮ፣ በውሸት ትሕትናና ሰውነትን በመጨቈን ጥበብ ያላቸው ይመስላሉ፤ ነገር ግን የሥጋን ምኞት በመግታት ረገድ ምንም ዋጋ የላቸውም።